18–BOB
Xudo Habashistonni jazolaydi
1 Holingga voy! Ey Habashiston daryolari ortidagi,
Qanotlar guvullashiga toʻlgan yurt!
2 Nil daryosi orqali xabarchilarini joʻnatadigan,
Dengiz orqali papirus kemalarini yuboradigan yurt!
Sening holingga voy!
Boringlar, ey chaqqon xabarchilar,
Baland boʻyli, terisi tiniq xalqqa,
Uzoqdan ham, yaqindan ham qoʻrqinchli boʻlgan elatga,
Kuchli, zabt etuvchi millatga,
Yurtida daryolari bor xalqqa.
3 Ey olam ahli, yurt xalqi!
Togʻlarda bayroq koʻtarilganda, koʻrasiz,
Burgʻu chalinganda, eshitasiz.
4 Mana, Egam menga shunday demoqda:
“Qoq tushda kuydiray degan yorqin quyosh nuri kabi,
Hosil mavsumida osmonni bosay degan qora bulut kabi,
Endi jim boʻlib, Oʻz maskanimdan kuzatib turaman.”
5 Hosil yigʻilmasdan oldin, gʻuncha ochilganda,
Uzum pishib yetilay deganda
Egam novdalarni tok qaychi ila kesadi,
Kurtaklarni esa uzib tashlaydi.
6 Ularning hammasi qolib ketadi
Togʻlardagi yirtqich qushlarga,
Dashtdagi yovvoyi hayvonlarga.
Ular yem boʻladi yozda yirtqich qushlarga,
Qishda yovvoyi hayvonlarga.
7 Oʻsha paytda hadyalar keltirar Sarvari Olamga
Baland boʻyli, terisi tiniq Habash xalqi,
Uzoqdagilar ham, yaqindagilar ham qoʻrqadigan xalq,
Kuchli, zabt etuvchi xalq,
Yurtida daryolari boʻlgan xalq.
Ha, bu xalq hadyalar keltirar Sion togʻiga
Sarvari Olamga atalgan joyga.
18–БОБ
Худо Ҳабашистонни жазолайди
1 Ҳолингга вой! Эй Ҳабашистон дарёлари ортидаги,
Қанотлар гувиллашига тўлган юрт!
2 Нил дарёси орқали хабарчиларини жўнатадиган,
Денгиз орқали папирус кемаларини юборадиган юрт!
Сенинг ҳолингга вой!
Боринглар, эй чаққон хабарчилар,
Баланд бўйли, териси тиниқ халққа,
Узоқдан ҳам, яқиндан ҳам қўрқинчли бўлган элатга,
Кучли, забт этувчи миллатга,
Юртида дарёлари бор халққа.
3 Эй олам аҳли, юрт халқи!
Тоғларда байроқ кўтарилганда, кўрасиз,
Бурғу чалинганда, эшитасиз.
4 Мана, Эгам менга шундай демоқда:
“Қоқ тушда куйдирай деган ёрқин қуёш нури каби,
Ҳосил мавсумида осмонни босай деган қора булут каби,
Энди жим бўлиб, Ўз масканимдан кузатиб тураман.”
5 Ҳосил йиғилмасдан олдин, ғунча очилганда,
Узум пишиб етилай деганда
Эгам новдаларни ток қайчи ила кесади,
Куртакларни эса узиб ташлайди.
6 Уларнинг ҳаммаси қолиб кетади
Тоғлардаги йиртқич қушларга,
Даштдаги ёввойи ҳайвонларга.
Улар ем бўлади ёзда йиртқич қушларга,
Қишда ёввойи ҳайвонларга.
7 Ўша пайтда ҳадялар келтирар Сарвари Оламга
Баланд бўйли, териси тиниқ Ҳабаш халқи,
Узоқдагилар ҳам, яқиндагилар ҳам қўрқадиган халқ,
Кучли, забт этувчи халқ,
Юртида дарёлари бўлган халқ.
Ҳа, бу халқ ҳадялар келтирар Сион тоғига
Сарвари Оламга аталган жойга.
