7–BOB
1 Isroilni shifolamoqchi boʻlib turganimda,
Uning buzuqligi oshkor boʻldi,
Samariyaning jinoyatlari ochildi.
Ular makkorona ish tutishadi,
Oʻgʻrilar xonadonlarni oʻmarishadi,
Qaroqchilar yoʻltoʻsarlik qilishadi.
2 Qilgan barcha qabihliklari yodimda,
Biroq ular buni xayoliga keltirmaydi.
Mana, ular gunohlarga botishdi,
Koʻz oʻngimda bu gunohlar gavdalanadi.
Saroydagi fitnalar
3 Odamlar shohni yovuzliklari bilan xushnud qilar,
Ular beklarni hiylalari bilan shod etar.
4 Ularning hammasi sadoqatsiz va makkor,
Lovullagan tandirga oʻxshaydi.
Novvoy xamirini qorib boʻlguncha,
Xamir oshib tayyor boʻlguncha,
Hatto olov kovlashga ham ehtiyoj yoʻq.
5 Shoh ziyofat bergan kuni
Beklar shohga maydan ichirishdi,
Shoh mazaxchilar bilan hamtovoq boʻldi.
6 Ularning yuraklari tandirga oʻxshaydi,
Shohga qarshi ular fitna uyushtiradi,
Kechasi bilan gʻazabi choʻgʻday tutab yotadi,
Saharga kelib, olovday lovullab yonadi.
7 Tandirday qizishgan bu hamma odamlar,
Hukmdorlarini yamlamay yutyaptilar.
Natijada shohlari birin–ketin nobud boʻlyapti ,
Ammo birontasi ham Menga iltijo qilmayapti.”
Isroil va oʻzga xalqlar
8 Efrayim boshqa xalqlarga qorishgan.
U xom pishgan nonga oʻxshab qolgan.
9 Oʻzga xalqlar uning kuchini kesdi,
U esa buni anglamaydi.
Sochlari oqarib boʻldi,
U esa buni payqamaydi.
10 Isroilning magʻrurligi
Oʻziga qarshi guvohlik beradi.
Boshiga tushgan kulfatlarga qaramay
Isroil oʻz Egasi Xudoga qaytmaydi,
Yuzini Unga burmaydi.
11 Egamiz shunday deydi:
“Efrayim kabutarga oʻxshar,
Ham befarosat, ham ovsar.
U Misrdan yordam soʻraydi,
Pir etib Ossuriyaga uchadi.
12 Uchganda, Men unga toʻr tashlayman,
Ovlangan qushday yerga tushiraman.
Toʻdalashganini eshitsam, jazosini beraman.
13 Xalqimning holiga voy!
Axir, ular Mendan uzoqlashdi!
Endi nobud boʻlishadi!
Axir, Menga qarshi bosh koʻtarishdi!
Ularni xalos qilardim–u,
Ammo Menga yolgʻon gapirishdi.
14 Ular Menga chin dildan iltijo qilmaydi,
Ammo toʻshaklarida yotib, faryod chekishadi.
Butparastlarday badanlarini tilib,
Bugʻdoy va sharob talab qilishadi .
Menga qarshi bosh koʻtarishadi.
15 Men Oʻzim ularni boqdim, kuchaytirdim,
Ular esa Menga qarshi fitna qiladi.
16 Hamma yoqdan madad izlaydi,
Men, Xudoyi Taologa esa yuz burmaydi.
Ular yaroqsiz bir kamonga oʻxshaydi,
Ularga aslo ishonib boʻlmaydi.
Beklari haqoratli soʻzlar aytganlari uchun
Qilichdan halok boʻladi.
Bu qilmishlari uchun
Misrda kulgi boʻlishadi.”
7–БОБ
1 Исроилни шифоламоқчи бўлиб турганимда,
Унинг бузуқлиги ошкор бўлди,
Самариянинг жиноятлари очилди.
Улар маккорона иш тутишади,
Ўғрилар хонадонларни ўмаришади,
Қароқчилар йўлтўсарлик қилишади.
2 Қилган барча қабиҳликлари ёдимда,
Бироқ улар буни хаёлига келтирмайди.
Мана, улар гуноҳларга ботишди,
Кўз ўнгимда бу гуноҳлар гавдаланади.
Саройдаги фитналар
3 Одамлар шоҳни ёвузликлари билан хушнуд қилар,
Улар бекларни ҳийлалари билан шод этар.
4 Уларнинг ҳаммаси садоқатсиз ва маккор,
Ловуллаган тандирга ўхшайди.
Новвой хамирини қориб бўлгунча,
Хамир ошиб тайёр бўлгунча,
Ҳатто олов ковлашга ҳам эҳтиёж йўқ.
5 Шоҳ зиёфат берган куни
Беклар шоҳга майдан ичиришди,
Шоҳ мазахчилар билан ҳамтовоқ бўлди.
6 Уларнинг юраклари тандирга ўхшайди,
Шоҳга қарши улар фитна уюштиради,
Кечаси билан ғазаби чўғдай тутаб ётади,
Саҳарга келиб, оловдай ловуллаб ёнади.
7 Тандирдай қизишган бу ҳамма одамлар,
Ҳукмдорларини ямламай ютяптилар.
Натижада шоҳлари бирин–кетин нобуд бўляпти ,
Аммо биронтаси ҳам Менга илтижо қилмаяпти.”
Исроил ва ўзга халқлар
8 Эфрайим бошқа халқларга қоришган.
У хом пишган нонга ўхшаб қолган.
9 Ўзга халқлар унинг кучини кесди,
У эса буни англамайди.
Сочлари оқариб бўлди,
У эса буни пайқамайди.
10 Исроилнинг мағрурлиги
Ўзига қарши гувоҳлик беради.
Бошига тушган кулфатларга қарамай
Исроил ўз Эгаси Худога қайтмайди,
Юзини Унга бурмайди.
11 Эгамиз шундай дейди:
“Эфрайим кабутарга ўхшар,
Ҳам бефаросат, ҳам овсар.
У Мисрдан ёрдам сўрайди,
Пир этиб Оссурияга учади.
12 Учганда, Мен унга тўр ташлайман,
Овланган қушдай ерга тушираман.
Тўдалашганини эшитсам, жазосини бераман.
13 Халқимнинг ҳолига вой!
Ахир, улар Мендан узоқлашди!
Энди нобуд бўлишади!
Ахир, Менга қарши бош кўтаришди!
Уларни халос қилардим–у,
Аммо Менга ёлғон гапиришди.
14 Улар Менга чин дилдан илтижо қилмайди,
Аммо тўшакларида ётиб, фарёд чекишади.
Бутпарастлардай баданларини тилиб,
Буғдой ва шароб талаб қилишади .
Менга қарши бош кўтаришади.
15 Мен Ўзим уларни боқдим, кучайтирдим,
Улар эса Менга қарши фитна қилади.
16 Ҳамма ёқдан мадад излайди,
Мен, Худойи Таолога эса юз бурмайди.
Улар яроқсиз бир камонга ўхшайди,
Уларга асло ишониб бўлмайди.
Беклари ҳақоратли сўзлар айтганлари учун
Қиличдан ҳалок бўлади.
Бу қилмишлари учун
Мисрда кулги бўлишади.”
