3–BOB
Iso Masih — Muso paygʻambardan yuqori
1 Ey birodarlarim, sizlar Xudoning aziz xalqisizlar. Xudo sizlarni Oʻz huzuriga kirishga daʼvat etgan. Kelinglar, Xudoning Elchisi va biz eʼtirof etgan eʼtiqodimizning Oliy ruhoniysi Iso haqida mulohaza qilaylik. 2 Xudo Isoni Oliy ruhoniy qilib tayinladi. Muso Xudoning xonadonida sodiq xizmatkor boʻlgani kabi, Iso ham Xudoga sodiq boʻldi. 3 Biroq Iso Musodan koʻra, koʻproq ulugʻvorlikka loyiq boʻldi. Axir, uyning oʻzi emas, uni qurgan odam koʻproq eʼtiborga sazovor–ku! 4 Albatta, har bir uyning quruvchisi bor, ammo aslida butun borliqning binokori — Xudo. 5 Muso sodiq qul edi . U Xudoning butun xalqi orasida eng ishonchlisi boʻlib, uning xizmati kelajakda oshkor boʻladigan ilohiy haqiqatning sharpasi edi, xolos. 6 Masih esa sodiq Oʻgʻil edi. Unga Xudoning xonadonini boshqarish topshirildi. Xudoning xonadoni esa bizmiz. Biz faqat jasur boʻlib, umidimizni mahkam tutishimiz kerak . Axir, biz bu umidimiz bilan faxrlanamiz.
Imondan qaytmanglar!
7 Shunday ekan, Muqaddas Ruhning aytgan ushbu gaplarini yodingizda tuting:
“Qaniydi, bugun Mening ovozimga quloq solsangiz!
8 Menga qarshi isyon qilgan otalaringizday tosh yurak boʻlmanglar,
Meni sahroda sinagan oʻsha ajdodlaringizday boʻlmanglar.
9 Otalaringiz qirq yil qilgan ishlarimni koʻrsa ham,
U yerda Meni sinab koʻrdilar.
10 Shu bois Men bu nasldan gʻazablanib, dedim:
«Ular doim Mendan yuz oʻgirishadi,
Amrlarimga boʻysunishdan bosh tortishadi.»
11 Shuning uchun gʻazablanib, ont ichdim:
«Ular farogʻat diyorimga kirmaydi», dedim.”
12 Ey birodarlarim, ehtiyot boʻlinglar! Yomon niyatga qalbingizdan oʻrin bermanglar, Xudoga boʻlgan ishonchingizni yoʻqotmanglar. Aks holda, bu illatlar sizlarni barhayot Xudodan qaytaradi. 13 Har kunni Muqaddas bitiklardagi “bugun” deb bilib, bir–biringizga nasihat qilinglar. Tagʻin birortangiz gunohga aldanib, yuragingizni tosh qilmanglar. 14 Axir, biz Masihga sherik boʻldik. Faqat boshida ega boʻlgan imonimizni oxirigacha mahkam tutishimiz lozim. 15 Bir–biringizga Zaburdagi shu soʻzlarni eslatib turinglar:
“Qaniydi, bugun Mening ovozimga quloq solsangiz!
Menga qarshi isyon qilgan otalaringizday tosh yurak boʻlmanglar!”
16 Oʻshanda Xudoning ovozini eshitib turib, isyon qilgan kim edi? Muso Misrdan olib chiqqanlarning hammasi! 17 Qirq yil davomida Xudo kimdan gʻazablangandi? Gunoh qilgan odamlardan! Ular hammasi oʻldi, sahro ularga qabr boʻldi. 18 Xudo ont ichib: “Ular farogʻat diyorimga kirmaydi”, deya kim haqida aytgan edi? Albatta itoatsiz odamlar haqida! 19 Demak, ular Xudoga ishonmaganlari uchun farogʻat diyoriga kira olmadilar.
3–БОБ
Исо Масиҳ — Мусо пайғамбардан юқори
1 Эй биродарларим, сизлар Худонинг азиз халқисизлар. Худо сизларни Ўз ҳузурига киришга даъват этган. Келинглар, Худонинг Элчиси ва биз эътироф этган эътиқодимизнинг Олий руҳонийси Исо ҳақида мулоҳаза қилайлик. 2 Худо Исони Олий руҳоний қилиб тайинлади. Мусо Худонинг хонадонида содиқ хизматкор бўлгани каби, Исо ҳам Худога содиқ бўлди. 3 Бироқ Исо Мусодан кўра, кўпроқ улуғворликка лойиқ бўлди. Ахир, уйнинг ўзи эмас, уни қурган одам кўпроқ эътиборга сазовор–ку! 4 Албатта, ҳар бир уйнинг қурувчиси бор, аммо аслида бутун борлиқнинг бинокори — Худо. 5 Мусо содиқ қул эди . У Худонинг бутун халқи орасида энг ишончлиси бўлиб, унинг хизмати келажакда ошкор бўладиган илоҳий ҳақиқатнинг шарпаси эди, холос. 6 Масиҳ эса содиқ Ўғил эди. Унга Худонинг хонадонини бошқариш топширилди. Худонинг хонадони эса бизмиз. Биз фақат жасур бўлиб, умидимизни маҳкам тутишимиз керак . Ахир, биз бу умидимиз билан фахрланамиз.
Имондан қайтманглар!
7 Шундай экан, Муқаддас Руҳнинг айтган ушбу гапларини ёдингизда тутинг:
“Қанийди, бугун Менинг овозимга қулоқ солсангиз!
8 Менга қарши исён қилган оталарингиздай тош юрак бўлманглар,
Мени саҳрода синаган ўша аждодларингиздай бўлманглар.
9 Оталарингиз қирқ йил қилган ишларимни кўрса ҳам,
У ерда Мени синаб кўрдилар.
10 Шу боис Мен бу наслдан ғазабланиб, дедим:
«Улар доим Мендан юз ўгиришади,
Амрларимга бўйсунишдан бош тортишади.»
11 Шунинг учун ғазабланиб, онт ичдим:
«Улар фароғат диёримга кирмайди», дедим.”
12 Эй биродарларим, эҳтиёт бўлинглар! Ёмон ниятга қалбингиздан ўрин берманглар, Худога бўлган ишончингизни йўқотманглар. Акс ҳолда, бу иллатлар сизларни барҳаёт Худодан қайтаради. 13 Ҳар кунни Муқаддас битиклардаги “бугун” деб билиб, бир–бирингизга насиҳат қилинглар. Тағин бирортангиз гуноҳга алданиб, юрагингизни тош қилманглар. 14 Ахир, биз Масиҳга шерик бўлдик. Фақат бошида эга бўлган имонимизни охиригача маҳкам тутишимиз лозим. 15 Бир–бирингизга Забурдаги шу сўзларни эслатиб туринглар:
“Қанийди, бугун Менинг овозимга қулоқ солсангиз!
Менга қарши исён қилган оталарингиздай тош юрак бўлманглар!”
16 Ўшанда Худонинг овозини эшитиб туриб, исён қилган ким эди? Мусо Мисрдан олиб чиққанларнинг ҳаммаси! 17 Қирқ йил давомида Худо кимдан ғазабланганди? Гуноҳ қилган одамлардан! Улар ҳаммаси ўлди, саҳро уларга қабр бўлди. 18 Худо онт ичиб: “Улар фароғат диёримга кирмайди”, дея ким ҳақида айтган эди? Албатта итоатсиз одамлар ҳақида! 19 Демак, улар Худога ишонмаганлари учун фароғат диёрига кира олмадилар.
