39–BOB
Goʻgning magʻlubiyati
1 Egamiz menga dedi: “Ey inson, Goʻgga qarshi bashorat qilib ayt: «Egamiz Rabbiy shunday demoqda: ey Meshex va Tuvalning bosh hukmdori Goʻg, Men senga qarshiman! 2 Men seni orqaga qaytarib, sudrab kelaman. Seni uzoq shimoldan olib chiqib, Isroil togʻlariga olib kelaman. 3 Chap qoʻlingdagi yoying va oʻng qoʻlingdagi oʻqlaringni urib tushiraman. 4 Sen Isroil togʻlarida jon berasan! Sening hamma lashkarlaring va senga ergashib kelgan xalqlar u yerda halok boʻlishadi. Ularning jasadlari turli yirtqich qushlarga va yovvoyi hayvonlarga oʻlja boʻladi. 5 Sen ochiq maydonda oʻlasan. Buni Men aytdim. 6 Men Magoʻg ustiga va dengiz qirgʻogʻida osoyishta hayot kechirayotgan barcha xalqlar ustiga olov yogʻdiraman. Oʻshanda barcha xalqlarning Egasi Men ekanligimni ular bilib oladilar.»
7 Ey inson, Men Oʻz muqaddasligimni xalqim Isroilga ayon qilaman. Meni badnom qilishlariga endi yoʻl qoʻymayman. Shunda barcha xalqlar Men, Isroil xalqining Xudosini muqaddas deb biladilar, ularning Egasi Men ekanligimni bilib oladilar. 8 Men aytgan oʻsha kun albatta keladi, — deb aytmoqda Egamiz Rabbiy. 9 — Shunda Isroil xalqi shaharlardan chiqib, magʻlub boʻlgan yovning qurol–aslahalarini yigʻadi. Ular yigʻib olgan kattayu kichik qalqonlarni, yoy va oʻqlarni, tayoq va nayzalarni yoqishadi. Yetti yil davomida ularni oʻtin oʻrniga ishlatishadi. 10 Oʻtin yigʻish, oʻrmonda daraxt kesishga ehtiyoj qolmaydi, chunki bu qurol–aslahalar xalqim uchun yoqilgʻi boʻladi. Shu tariqa Isroil xalqi oʻz talonchilaridan oʻch oladi.” Egamiz Rabbiyning kalomi shudir.
Goʻg dafn qilinadi
11 Egamiz menga dedi: “Ey inson, bu hodisalar roʻy bergan kuni Goʻg va uning toʻdasi uchun Men bir qabriston hozirlayman. Bu qabriston Oʻlik dengizning sharq tomonidagi Sayyohlar vodiysida joylashgan boʻladi. U sayyohlarning yoʻlini toʻsib qoʻyadi. Shuning uchun sayyohlar oʻsha vodiyning nomini oʻzgartirib, uni «Goʻg toʻdasining vodiysi» deb ataydigan boʻlishadi. 12 Isroil xalqi yetti oy mobaynida jasadlarni koʻmib, oʻz yurtini poklaydi. 13 Butun yurt aholisi jasadlarni koʻmadi. Shu qilganlari uchun Men ulugʻvorligimni namoyon qilgan kunda ular yuksak obroʻga erishadi, — deb aytmoqda Egamiz Rabbiy. 14 — Yetti oy oʻtgach, yurtni poklaydigan maxsus odamlar tayinlanadi. Ular yurtni kezib, koʻmilmay qolib ketgan jasadlarni koʻmadilar. 15 Ular yurtni kezib yurganlarida topilgan har bir suyak oldiga belgi qoʻyadilar. Goʻrkovlar bu suyaklarni yigʻib olib, «Goʻg toʻdasining vodiysi»ga koʻmadilar. 16 Qabriston yonidagi shaharning nomi ham Toʻda boʻladi. Shunday qilib, ular yurtni poklaydilar.
17 Ey inson, turli xil qushlarni va hamma yovvoyi hayvonlarni yigʻib, ularga shunday deb ayt: «Egamiz Rabbiy demoqda: qani, kelinglar! Men sizlar uchun qurbonlik hozirlayman, Isroil togʻlarida katta ziyofat uyushtiraman. Sizlar toʻyguningizcha goʻshtdan yeb, qondan ichasizlar. 18 Bashan oʻlkasida semirtirilgan qoʻchqor, qoʻzichoq, echki va buqalar boʻgʻizlanganday, bahodir jangchilaru jahon hukmdorlari qurbon qilinadi. Sizlar ularning tanalarini yeb, qonini ichasizlar. 19 Men sizlar uchun uyushtiradigan bu ziyofatda sizlar toʻyguningizcha yogʻdan yeysizlar, mast boʻlguningizcha qondan ichasizlar. 20 Sizlar Mening dasturxonimdan xohlaganingizcha ot va otliqlarning goʻshtidan, sipoh va turli xil jangchilarning goʻshtidan tanovul qilasizlar. Egamiz Rabbiyning kalomi shudir.»
Isroil tiklanadi
21 Men Oʻz ulugʻvorligimni xalqlar orasida namoyon qilaman. Xalqlarni jazolab, ularga Oʻz qudratimni koʻrsataman. 22 Oʻsha kundan boshlab, Isroil xalqi Egasi Xudo Men ekanligimni biladi. 23 Isroil xalqi gunoh qilib, Menga xiyonat qilgani uchun, Men ularni begona yurtlarga surgun qilganimni boshqa xalqlar tushunib olishadi. Xalqimning bu qilmishi uchun Men ulardan yuz oʻgirib, dushmanlarning qoʻliga topshirgan edim, qirilib ketishlariga toʻsqinlik qilmadim. 24 Men ulardan yuz oʻgirdim, buzuqligi va qilgan gunohlariga yarasha jazosini berdim.”
25 Egamiz Rabbiy shunday demoqda: “Mana endi Men Yoqub naslini yana farovonlikka erishtiraman . Butun Isroil xalqiga shafqat koʻrsataman. Obroʻyim toʻkilishiga yoʻl qoʻymayman! 26 Ular oʻz yurtiga qaytib kelganlaridan keyin oʻtmishdagi sharmandagarchiligi va Menga qilgan xiyonatiga iqror boʻladilar. Ular tinch yashaydilar, hech kim ularga tahdid qilmaydi. 27 Men ularni gʻanimlarning yurtlaridan olib chiqqanimda, xalqlar muqaddasligimni koʻrishadi. 28 Egasi Xudo Men ekanligimni xalqim bilib oladi. Garchi Men ularni oʻzga yurtlarga tarqatib yuborgan boʻlsam–da, ularni ona yurtiga qaytarib olib kelaman. Xalqimdan birontasi ham begona yurtda qolib ketmaydi. 29 Men xalqim Isroil ustiga Oʻz Ruhimdan yogʻdiraman, endi ulardan yuz oʻgirmayman.” Egamiz Rabbiyning kalomi shudir.
39–БОБ
Гўгнинг мағлубияти
1 Эгамиз менга деди: “Эй инсон, Гўгга қарши башорат қилиб айт: «Эгамиз Раббий шундай демоқда: эй Мешех ва Тувалнинг бош ҳукмдори Гўг, Мен сенга қаршиман! 2 Мен сени орқага қайтариб, судраб келаман. Сени узоқ шимолдан олиб чиқиб, Исроил тоғларига олиб келаман. 3 Чап қўлингдаги ёйинг ва ўнг қўлингдаги ўқларингни уриб тушираман. 4 Сен Исроил тоғларида жон берасан! Сенинг ҳамма лашкарларинг ва сенга эргашиб келган халқлар у ерда ҳалок бўлишади. Уларнинг жасадлари турли йиртқич қушларга ва ёввойи ҳайвонларга ўлжа бўлади. 5 Сен очиқ майдонда ўласан. Буни Мен айтдим. 6 Мен Магўг устига ва денгиз қирғоғида осойишта ҳаёт кечираётган барча халқлар устига олов ёғдираман. Ўшанда барча халқларнинг Эгаси Мен эканлигимни улар билиб оладилар.»
7 Эй инсон, Мен Ўз муқаддаслигимни халқим Исроилга аён қиламан. Мени бадном қилишларига энди йўл қўймайман. Шунда барча халқлар Мен, Исроил халқининг Худосини муқаддас деб биладилар, уларнинг Эгаси Мен эканлигимни билиб оладилар. 8 Мен айтган ўша кун албатта келади, — деб айтмоқда Эгамиз Раббий. 9 — Шунда Исроил халқи шаҳарлардан чиқиб, мағлуб бўлган ёвнинг қурол–аслаҳаларини йиғади. Улар йиғиб олган каттаю кичик қалқонларни, ёй ва ўқларни, таёқ ва найзаларни ёқишади. Етти йил давомида уларни ўтин ўрнига ишлатишади. 10 Ўтин йиғиш, ўрмонда дарахт кесишга эҳтиёж қолмайди, чунки бу қурол–аслаҳалар халқим учун ёқилғи бўлади. Шу тариқа Исроил халқи ўз талончиларидан ўч олади.” Эгамиз Раббийнинг каломи шудир.
Гўг дафн қилинади
11 Эгамиз менга деди: “Эй инсон, бу ҳодисалар рўй берган куни Гўг ва унинг тўдаси учун Мен бир қабристон ҳозирлайман. Бу қабристон Ўлик денгизнинг шарқ томонидаги Сайёҳлар водийсида жойлашган бўлади. У сайёҳларнинг йўлини тўсиб қўяди. Шунинг учун сайёҳлар ўша водийнинг номини ўзгартириб, уни «Гўг тўдасининг водийси» деб атайдиган бўлишади. 12 Исроил халқи етти ой мобайнида жасадларни кўмиб, ўз юртини поклайди. 13 Бутун юрт аҳолиси жасадларни кўмади. Шу қилганлари учун Мен улуғворлигимни намоён қилган кунда улар юксак обрўга эришади, — деб айтмоқда Эгамиз Раббий. 14 — Етти ой ўтгач, юртни поклайдиган махсус одамлар тайинланади. Улар юртни кезиб, кўмилмай қолиб кетган жасадларни кўмадилар. 15 Улар юртни кезиб юрганларида топилган ҳар бир суяк олдига белги қўядилар. Гўрковлар бу суякларни йиғиб олиб, «Гўг тўдасининг водийси»га кўмадилар. 16 Қабристон ёнидаги шаҳарнинг номи ҳам Тўда бўлади. Шундай қилиб, улар юртни поклайдилар.
17 Эй инсон, турли хил қушларни ва ҳамма ёввойи ҳайвонларни йиғиб, уларга шундай деб айт: «Эгамиз Раббий демоқда: қани, келинглар! Мен сизлар учун қурбонлик ҳозирлайман, Исроил тоғларида катта зиёфат уюштираман. Сизлар тўйгунингизча гўштдан еб, қондан ичасизлар. 18 Башан ўлкасида семиртирилган қўчқор, қўзичоқ, эчки ва буқалар бўғизлангандай, баҳодир жангчилару жаҳон ҳукмдорлари қурбон қилинади. Сизлар уларнинг таналарини еб, қонини ичасизлар. 19 Мен сизлар учун уюштирадиган бу зиёфатда сизлар тўйгунингизча ёғдан ейсизлар, маст бўлгунингизча қондан ичасизлар. 20 Сизлар Менинг дастурхонимдан хоҳлаганингизча от ва отлиқларнинг гўштидан, сипоҳ ва турли хил жангчиларнинг гўштидан тановул қиласизлар. Эгамиз Раббийнинг каломи шудир.»
Исроил тикланади
21 Мен Ўз улуғворлигимни халқлар орасида намоён қиламан. Халқларни жазолаб, уларга Ўз қудратимни кўрсатаман. 22 Ўша кундан бошлаб, Исроил халқи Эгаси Худо Мен эканлигимни билади. 23 Исроил халқи гуноҳ қилиб, Менга хиёнат қилгани учун, Мен уларни бегона юртларга сургун қилганимни бошқа халқлар тушуниб олишади. Халқимнинг бу қилмиши учун Мен улардан юз ўгириб, душманларнинг қўлига топширган эдим, қирилиб кетишларига тўсқинлик қилмадим. 24 Мен улардан юз ўгирдим, бузуқлиги ва қилган гуноҳларига яраша жазосини бердим.”
25 Эгамиз Раббий шундай демоқда: “Мана энди Мен Ёқуб наслини яна фаровонликка эриштираман . Бутун Исроил халқига шафқат кўрсатаман. Обрўйим тўкилишига йўл қўймайман! 26 Улар ўз юртига қайтиб келганларидан кейин ўтмишдаги шармандагарчилиги ва Менга қилган хиёнатига иқрор бўладилар. Улар тинч яшайдилар, ҳеч ким уларга таҳдид қилмайди. 27 Мен уларни ғанимларнинг юртларидан олиб чиққанимда, халқлар муқаддаслигимни кўришади. 28 Эгаси Худо Мен эканлигимни халқим билиб олади. Гарчи Мен уларни ўзга юртларга тарқатиб юборган бўлсам–да, уларни она юртига қайтариб олиб келаман. Халқимдан биронтаси ҳам бегона юртда қолиб кетмайди. 29 Мен халқим Исроил устига Ўз Руҳимдан ёғдираман, энди улардан юз ўгирмайман.” Эгамиз Раббийнинг каломи шудир.
