38–BOB
Hukmdor Goʻg Isroilga hujum qiladi
1 Egamiz menga Oʻz soʻzini ayon qildi: 2 “Ey inson, Magoʻg yurtidagi Meshex va Tuval xalqlarining bosh hukmdori Goʻgga yuzlan. Unga qarshi bashorat qilib 3 ayt: «Egamiz Rabbiy shunday demoqda: ey Meshex va Tuval xalqlarining bosh hukmdori Goʻg, Men senga qarshiman! 4 Men seni orqaga qaytaraman, jagʻlaringga ilmoqlar solaman. Seni va butun lashkaringni, otlaru otliqlaringni, tish–tirnogʻigacha qurollangan askarlaringni, ulkan bir olomonni, katta va kichik qalqon ushlab, qilich oʻynatgan jangchilaringni sudrab chiqaraman. 5 Sening safingga Forslar, Habashistonliklar va Liviyaliklarning qurollangan jangchilari qoʻshiladi. 6 Goʻmer xalqining va shimoldagi Toʻxarmo yurtining barcha lashkari senga ergashadi. Sening lashkarlaring nihoyatda koʻpdir.
7 Qani, tayyorlan! Atrofingdagi lashkarlarni jangga shay qil! Sen ularni boshlab borasan. 8 Yillar oʻtib, jangga otlanasan. Urushdan keyin oʻzini tiklab olgan bir yurtga sen bostirib borasan. Uzoq vaqt davomida tashlandiq boʻlib yotgan bu yurtga, turli xalqlardan Isroil togʻlariga kelib oʻrnashgan odamlarga hujum qilasan. Ularning hammasi osoyishta turmush kechirayotgan boʻladi. 9 Ammo sen dovuldek ularga yopirilasan. Sen, lashkaring va senga ergashib kelgan koʻp xalqlar yurtni bulut kabi qoplab olasizlar.
10 Egamiz Rabbiy shunday demoqda: ey Goʻg, oʻsha kuni sen yomon xayollarga berilasan, yovuz rejalar tuza boshlaysan. 11 Sen shunday aytasan: ‘Men devor bilan oʻralmagan qishloqlarga bostirib boraman. Xotirjam yashayotgan odamlarga hujum qilaman. Ularning na devorlari bor, na darvozasi, na tambasi bor.’ 12 Sen xarob shaharlarni tiklagan odamlarni talon–taroj qilasan. Bu odamlar turli xalqlardan yigʻilgan, chorva koʻpaytirib, dunyo orttirgan, jahon chorrahasida joylashib olishgan. 13 Shunda Shava va Dedon xalqlari hamda Tarshish savdogarlariyu zodagonlari sendan soʻraydilar: ‘Sen hali oʻlja olgani keldingmi? Talon–taroj qilgani, oltinu kumush olib ketgani, chorvayu boylikni tortib olgani, qoʻlga behad oʻlja kiritgani bir toʻda qoʻshin tortib keldingmi?’»
14 Ey inson, Goʻgga bashorat qilib ayt: «Egamiz Rabbiy shunday demoqda: sen xalqim Isroilning xotirjam yashaganini koʻrib, 15 shimoldagi olis yurtingdan koʻp xalqlarni ergashtirib kelasan. Ha, bu cheksiz otliq lashkarni, bir toʻda buyuk qoʻshinni tortib kelasan. 16 Yer yuzini qoplagan bulut kabi, xalqim Isroilni bosib olasan. Ey Goʻg, kelajakda Men seni yurtimga hujum qilgani yuboraman. Sen orqali xalqlarga muqaddasligimni ayon qilib, Oʻzimni tanitaman.
Xudo Goʻgni jazolaydi
17 Egamiz Rabbiy shunday demoqda: Oʻz qullarim — paygʻambarlarim orqali Men xalqimni ogohlantirib kelganman. Kelajakda ularga qarshi bir dushman yuborishimni oldindan aytganman. Ey Goʻg, oʻsha dushman sensan. 18 Isroil yurtiga hujum qilgan kuning, Men gʻazabga minib olaman! — deb aytmoqda Egamiz Rabbiy. 19 — Rashku gʻazabda eʼlon qilamanki, oʻsha kuni Isroil yurtida dahshatli zilzila boʻladi. 20 Yer yuzidagi barcha jonzot — dengizdagi baliqlaru koʻkdagi qushlar, yovvoyi hayvonlaru sudraluvchilar, hamma odamlar Mening huzurimda titraydi. Togʻlar agʻdarilib tushadi, qoyalar parchalanib ketadi, hamma devorlar oʻpirilib tushadi. 21 Men hamma Isroil togʻlarida senga qarshi qilich hozirlayman, — deb aytmoqda Egamiz Rabbiy. — Lashkarlaring bir–biriga hamla qiladi. 22 Men oʻlatu qotilliklar orqali seni jazolayman. Sening, lashkaringning, senga ergashib kelgan koʻp xalqlarning ustiga olovli oltingugurt, jala va doʻl yogʻdiraman. 23 Dunyodagi koʻplab xalqlarga Oʻzimning ulugʻvorligim va muqaddasligimni namoyon qilaman, ularga Oʻzimni tanitaman. Oʻshanda barcha xalqlarning Egasi Men ekanligimni ular bilib oladilar.»”
38–БОБ
Ҳукмдор Гўг Исроилга ҳужум қилади
1 Эгамиз менга Ўз сўзини аён қилди: 2 “Эй инсон, Магўг юртидаги Мешех ва Тувал халқларининг бош ҳукмдори Гўгга юзлан. Унга қарши башорат қилиб 3 айт: «Эгамиз Раббий шундай демоқда: эй Мешех ва Тувал халқларининг бош ҳукмдори Гўг, Мен сенга қаршиман! 4 Мен сени орқага қайтараман, жағларингга илмоқлар соламан. Сени ва бутун лашкарингни, отлару отлиқларингни, тиш–тирноғигача қуролланган аскарларингни, улкан бир оломонни, катта ва кичик қалқон ушлаб, қилич ўйнатган жангчиларингни судраб чиқараман. 5 Сенинг сафингга Форслар, Ҳабашистонликлар ва Ливияликларнинг қуролланган жангчилари қўшилади. 6 Гўмер халқининг ва шимолдаги Тўхармо юртининг барча лашкари сенга эргашади. Сенинг лашкарларинг ниҳоятда кўпдир.
7 Қани, тайёрлан! Атрофингдаги лашкарларни жангга шай қил! Сен уларни бошлаб борасан. 8 Йиллар ўтиб, жангга отланасан. Урушдан кейин ўзини тиклаб олган бир юртга сен бостириб борасан. Узоқ вақт давомида ташландиқ бўлиб ётган бу юртга, турли халқлардан Исроил тоғларига келиб ўрнашган одамларга ҳужум қиласан. Уларнинг ҳаммаси осойишта турмуш кечираётган бўлади. 9 Аммо сен довулдек уларга ёпириласан. Сен, лашкаринг ва сенга эргашиб келган кўп халқлар юртни булут каби қоплаб оласизлар.
10 Эгамиз Раббий шундай демоқда: эй Гўг, ўша куни сен ёмон хаёлларга бериласан, ёвуз режалар туза бошлайсан. 11 Сен шундай айтасан: ‘Мен девор билан ўралмаган қишлоқларга бостириб бораман. Хотиржам яшаётган одамларга ҳужум қиламан. Уларнинг на деворлари бор, на дарвозаси, на тамбаси бор.’ 12 Сен хароб шаҳарларни тиклаган одамларни талон–тарож қиласан. Бу одамлар турли халқлардан йиғилган, чорва кўпайтириб, дунё орттирган, жаҳон чорраҳасида жойлашиб олишган. 13 Шунда Шава ва Дедон халқлари ҳамда Таршиш савдогарларию зодагонлари сендан сўрайдилар: ‘Сен ҳали ўлжа олгани келдингми? Талон–тарож қилгани, олтину кумуш олиб кетгани, чорваю бойликни тортиб олгани, қўлга беҳад ўлжа киритгани бир тўда қўшин тортиб келдингми?’»
14 Эй инсон, Гўгга башорат қилиб айт: «Эгамиз Раббий шундай демоқда: сен халқим Исроилнинг хотиржам яшаганини кўриб, 15 шимолдаги олис юртингдан кўп халқларни эргаштириб келасан. Ҳа, бу чексиз отлиқ лашкарни, бир тўда буюк қўшинни тортиб келасан. 16 Ер юзини қоплаган булут каби, халқим Исроилни босиб оласан. Эй Гўг, келажакда Мен сени юртимга ҳужум қилгани юбораман. Сен орқали халқларга муқаддаслигимни аён қилиб, Ўзимни танитаман.
Худо Гўгни жазолайди
17 Эгамиз Раббий шундай демоқда: Ўз қулларим — пайғамбарларим орқали Мен халқимни огоҳлантириб келганман. Келажакда уларга қарши бир душман юборишимни олдиндан айтганман. Эй Гўг, ўша душман сенсан. 18 Исроил юртига ҳужум қилган кунинг, Мен ғазабга миниб оламан! — деб айтмоқда Эгамиз Раббий. 19 — Рашку ғазабда эълон қиламанки, ўша куни Исроил юртида даҳшатли зилзила бўлади. 20 Ер юзидаги барча жонзот — денгиздаги балиқлару кўкдаги қушлар, ёввойи ҳайвонлару судралувчилар, ҳамма одамлар Менинг ҳузуримда титрайди. Тоғлар ағдарилиб тушади, қоялар парчаланиб кетади, ҳамма деворлар ўпирилиб тушади. 21 Мен ҳамма Исроил тоғларида сенга қарши қилич ҳозирлайман, — деб айтмоқда Эгамиз Раббий. — Лашкарларинг бир–бирига ҳамла қилади. 22 Мен ўлату қотилликлар орқали сени жазолайман. Сенинг, лашкарингнинг, сенга эргашиб келган кўп халқларнинг устига оловли олтингугурт, жала ва дўл ёғдираман. 23 Дунёдаги кўплаб халқларга Ўзимнинг улуғворлигим ва муқаддаслигимни намоён қиламан, уларга Ўзимни танитаман. Ўшанда барча халқларнинг Эгаси Мен эканлигимни улар билиб оладилар.»”
