2–BOB
1 Oʻsha ovoz menga dedi:
— Ey inson , oʻrningdan tur, Men sen bilan gaplashmoqchiman.
2 Ovoz menga gapirayotganda, Ruh ichimga kirib, meni turgʻizib qoʻydi. Men gapning davomini tingladim. 3 U menga shunday dedi:
— Ey inson, Men seni itoatsiz Isroil xalqining oldiga yuboraman. Ular Menga qarshi bosh koʻtarishdi. Ularning oʻzlari ham, ota–bobolari ham shu kungacha Menga qarshi gunoh qilib kelishgan. 4 Bu xalq qaysar va oʻjardir. Men seni ularning oldiga yuboraman. Sen ularga: “Egamiz Rabbiy shunday demoqda”, deb gapirasan. 5 Bu isyonkor xalq gapingga quloq soladimi, yoʻqmi, Men ularning oldiga paygʻambarni yuborganimni bilib qoʻyishsin. 6 Sen esa, ey inson, ulardan hayiqma, ularning gaplaridan qoʻrqma. Atrofingni yantogʻu tikanaklar oʻrab olsa ham, chayonlar orasida yashasang ham qoʻrqma. Ularning gaplaridan choʻchima, ularning vajohatidan dahshatga tushma. 7 Bu isyonkor xalq senga quloq soladimi, yoʻqmi, ularga Mening gaplarimni yetkaz. 8 Sen esa, ey inson, bu isyonkor xalqqa oʻxshama. Ogʻzingni och. Men senga beradigan narsani yegin.
9 Qarasam, men tomon bir qoʻl choʻzildi. Qoʻlda bir oʻrama qogʻoz bor edi. 10 Qoʻl oʻramni ochib, menga koʻrsatdi. Oʻramning oldi va orqa tomonlariga marsiya, motam va qaygʻu soʻzlari yozilgan edi.
2–БОБ
1 Ўша овоз менга деди:
— Эй инсон , ўрнингдан тур, Мен сен билан гаплашмоқчиман.
2 Овоз менга гапираётганда, Руҳ ичимга кириб, мени турғизиб қўйди. Мен гапнинг давомини тингладим. 3 У менга шундай деди:
— Эй инсон, Мен сени итоатсиз Исроил халқининг олдига юбораман. Улар Менга қарши бош кўтаришди. Уларнинг ўзлари ҳам, ота–боболари ҳам шу кунгача Менга қарши гуноҳ қилиб келишган. 4 Бу халқ қайсар ва ўжардир. Мен сени уларнинг олдига юбораман. Сен уларга: “Эгамиз Раббий шундай демоқда”, деб гапирасан. 5 Бу исёнкор халқ гапингга қулоқ соладими, йўқми, Мен уларнинг олдига пайғамбарни юборганимни билиб қўйишсин. 6 Сен эса, эй инсон, улардан ҳайиқма, уларнинг гапларидан қўрқма. Атрофингни янтоғу тиканаклар ўраб олса ҳам, чаёнлар орасида яшасанг ҳам қўрқма. Уларнинг гапларидан чўчима, уларнинг важоҳатидан даҳшатга тушма. 7 Бу исёнкор халқ сенга қулоқ соладими, йўқми, уларга Менинг гапларимни етказ. 8 Сен эса, эй инсон, бу исёнкор халққа ўхшама. Оғзингни оч. Мен сенга берадиган нарсани егин.
9 Қарасам, мен томон бир қўл чўзилди. Қўлда бир ўрама қоғоз бор эди. 10 Қўл ўрамни очиб, менга кўрсатди. Ўрамнинг олди ва орқа томонларига марсия, мотам ва қайғу сўзлари ёзилган эди.
