15–BOB
Uzum toki haqida matal
1 Egamiz menga Oʻz soʻzini ayon qildi: 2 “Ey inson, tok novdasining yogʻochdan farqi bormi?! Oʻrmon daraxtlaridan uning biron afzalligi bormi?! 3 Undan biron–bir narsa yasab boʻladimi? Hech boʻlmasa, buyum osish uchun qoziq qilsa boʻladimi? 4 Yoʻq, u faqat oʻtin uchun yaraydi, xolos. Novdaning ikki chekkasi kuyib, oʻrtasi yonib boʻlgandan keyin, uni biron narsaga ishlatib boʻlarmidi, axir?! 5 Kuymagan tok novdasi yaroqsiz boʻlgandan keyin, kuyib boʻlgani hech qanday foyda keltirmasligi aniq!
6 Shuning uchun Men, Egangiz Rabbiy, shuni aytib qoʻyay: Quddus aholisi oʻrmon daraxtlari orasidagi uzum tokiga oʻxshaydi. Ular yaroqsiz boʻlganlari uchun, Men ularni olovda kuydirib yuboraman. 7 Men Oʻzim ularga qarshi chiqaman. Ular olovdan qochib qutulsalar ham, baribir, olovdan nobud boʻladilar. Men ularga qarshi chiqqanimdan keyin, Egangiz Men ekanligimni sizlar bilib olasizlar. 8 Xalqim Menga xiyonat qilgani uchun, Men butun yurtni sahroga aylantiraman.” Egamiz Rabbiyning kalomi shudir.
15–БОБ
Узум токи ҳақида матал
1 Эгамиз менга Ўз сўзини аён қилди: 2 “Эй инсон, ток новдасининг ёғочдан фарқи борми?! Ўрмон дарахтларидан унинг бирон афзаллиги борми?! 3 Ундан бирон–бир нарса ясаб бўладими? Ҳеч бўлмаса, буюм осиш учун қозиқ қилса бўладими? 4 Йўқ, у фақат ўтин учун ярайди, холос. Новданинг икки чеккаси куйиб, ўртаси ёниб бўлгандан кейин, уни бирон нарсага ишлатиб бўлармиди, ахир?! 5 Куймаган ток новдаси яроқсиз бўлгандан кейин, куйиб бўлгани ҳеч қандай фойда келтирмаслиги аниқ!
6 Шунинг учун Мен, Эгангиз Раббий, шуни айтиб қўяй: Қуддус аҳолиси ўрмон дарахтлари орасидаги узум токига ўхшайди. Улар яроқсиз бўлганлари учун, Мен уларни оловда куйдириб юбораман. 7 Мен Ўзим уларга қарши чиқаман. Улар оловдан қочиб қутулсалар ҳам, барибир, оловдан нобуд бўладилар. Мен уларга қарши чиққанимдан кейин, Эгангиз Мен эканлигимни сизлар билиб оласизлар. 8 Халқим Менга хиёнат қилгани учун, Мен бутун юртни саҳрога айлантираман.” Эгамиз Раббийнинг каломи шудир.
