1–BOB
Xudoning taxti
1-3 Hayotimning oʻttizinchi yilida , toʻrtinchi oyning beshinchi kunida men, Buzi oʻgʻli ruhoniy Hizqiyol , surgunda yashayotgan odamlar bilan birga Bobildagi Kavor daryosining boʻyida edim. Shunda osmon qopqasi ochildi–da, Xudodan menga vahiylar keldi. Oʻsha kuni Egamiz menga Oʻz soʻzini ayon qildi. Men Egamizning qudratini yaqqol sezib turar edim. Bu voqea shoh Yohayixin surgundaligining beshinchi yilida sodir boʻlgan edi.
4 Qarasam, shimoldan boʻron turdi. Ulkan bir bulutdan chaqmoq chaqar edi, bulut atrofi yarqirab turardi. Bulutning olovli markazi sayqallangan misday tovlanardi. 5 Oʻshaning oʻrtasida men toʻrtta jonli mavjudotni koʻrdim. Ular inson qiyofasida edi. 6 Ammo har birining toʻrtta yuzi va toʻrtta qanoti bor edi. 7 Ularning oyoqlari tekis boʻlib, buzoqning tuyoqlariga oʻxshash tuyoqlari bor edi. Tuyoqlar yaltiroq bronza kabi tovlanib turardi. 8 Qanotlari ostida odam qoʻliga oʻxshagan qoʻllari bor edi. 9 Mavjudotlar bir–biriga orqa oʻgirib turar edilar, qanotlarining uchlari bir–biriga tegib turardi. Ular har tomonga birgalikda yurardilar, yurganlarida burilmas edilar. 10 Mavjudotlarning yuzlariga kelsak, ular toʻrt xil edi: old tomonida inson yuzi, oʻng tomonida sher yuzi, chap tomonida buqa yuzi va orqa tomonida burgut yuzi bor edi. 11 Mavjudotlarning bir juft qanoti tepaga yoyilgan boʻlib, yonidagi mavjudotlarning qanotlariga tegib turardi. Qolgan bir juft qanoti esa tanasini yopib turardi. 12 Mavjudotlar toʻgʻriga qarab yurishar edi. Ruh ularni qayerga yoʻnaltirsa, ular oʻsha yoqqa borishardi, yurganda burilmas edilar. 13 Jonli mavjudotlarning koʻrinishi yonayotgan koʻmirga yoki mashʼalaga oʻxshar edi. Mavjudotlarning orasida olov aylanib yurardi. Bu olov chaqnardi, undan chaqmoq chaqib turar edi. 14 Mavjudotlarning oʻzlari ham chaqmoq tezligi bilan u yerdan–bu yerga borib kelishardi.
15 Men toʻrtta mavjudotni tomosha qilib turganimda, mavjudotlar yonidagi gʻildiraklarni koʻrdim. Har bir mavjudotning yonida bittadan gʻildirak bor edi. Gʻildiraklar yerga tegib turardi. 16 Toʻrtala gʻildirakning koʻrinishi va tuzilishi bir xil edi. Ular qimmatbaho toshday tovlanardi. Har bir gʻildirakning ichida koʻndalangiga solingan yana bittadan gʻildirak bor edi. 17 Shu sababdan gʻildiraklar harakatga kelganda, toʻrt tomonga yura olar edi, yurganda burilmasdi. 18 Gʻildiraklarning gardishlari baland va bahaybat edi. Ularning gir aylanasi koʻzlar bilan qoplangan edi. 19 Jonli mavjudotlar yurganda, yonlaridagi gʻildiraklar ham harakatga kelardi. Yerdan koʻtarilganda, gʻildiraklar ham ular bilan birga koʻtarilardi. 20-21 Mavjudotlardagi ruh gʻildiraklarda ham bor edi. Shu sababdan ruh mavjudotlarni qayerga yoʻnaltirsa, mavjudotlar oʻsha yoqqa borishardi, gʻildiraklar ham ular bilan birga harakatga kelardi. Mavjudotlar yurganda, ular ham yurar edi, toʻxtaganda toʻxtar edi, yerdan koʻtarilganda koʻtarilar edi.
22 Mavjudotlarning boshlari uzra gumbazga oʻxshash bir narsa bor edi, oʻsha narsa billurdek tovlanardi. 23 Qanotlarini yoygan mavjudotlar gumbaz ostida turar edi. Ularning qanotlari bir–biriga tegib turardi. Ikkinchi juft qanotlari esa badanlarini yopib turardi. 24 Ular qanot qoqib uchardilar. Qanot qoqqanlarida chiqqan tovushi shovullagan dengiz shovqiniday, Qodir Xudoning gumburlagan ovoziday, ulkan lashkarning shovqin–suroniday edi. Mavjudotlar toʻxtaganlarida qanotlarini yigʻib olishardi.
25 Ular toʻxtab, qanotlarini yigʻib oldilar. Shunda boshlari tepasidagi gumbaz uzra bir ovoz yangradi. 26 Gumbaz ustida zangori yoqutdan yasalgan taxtga oʻxshash bir narsa bor edi. Taxt ustida inson qiyofasidagi bir Zot oʻtirardi. 27 Oʻsha kimsaning belidan yuqori qismi sayqallangan misday yarqirardi, atrofini olov oʻragandi. Belidan pastki qismi esa otash kabi porlardi. Uning butun borligʻi nur taratib turardi. 28 Oʻsha nur yomgʻirdan keyin bulutlar orasida paydo boʻladigan kamalakdek jilvalanardi. Bu yogʻdu Egamizning ulugʻvorligini aks ettirardi.
Xudo Hizqiyolni xizmatga chaqiradi
Men buni koʻrishim bilanoq yerga muk tushdim, soʻng bir ovoz eshitdim.
1–БОБ
Худонинг тахти
1-3 Ҳаётимнинг ўттизинчи йилида , тўртинчи ойнинг бешинчи кунида мен, Бузи ўғли руҳоний Ҳизқиёл , сургунда яшаётган одамлар билан бирга Бобилдаги Кавор дарёсининг бўйида эдим. Шунда осмон қопқаси очилди–да, Худодан менга ваҳийлар келди. Ўша куни Эгамиз менга Ўз сўзини аён қилди. Мен Эгамизнинг қудратини яққол сезиб турар эдим. Бу воқеа шоҳ Ёҳайихин сургундалигининг бешинчи йилида содир бўлган эди.
4 Қарасам, шимолдан бўрон турди. Улкан бир булутдан чақмоқ чақар эди, булут атрофи ярқираб турарди. Булутнинг оловли маркази сайқалланган мисдай товланарди. 5 Ўшанинг ўртасида мен тўртта жонли мавжудотни кўрдим. Улар инсон қиёфасида эди. 6 Аммо ҳар бирининг тўртта юзи ва тўртта қаноти бор эди. 7 Уларнинг оёқлари текис бўлиб, бузоқнинг туёқларига ўхшаш туёқлари бор эди. Туёқлар ялтироқ бронза каби товланиб турарди. 8 Қанотлари остида одам қўлига ўхшаган қўллари бор эди. 9 Мавжудотлар бир–бирига орқа ўгириб турар эдилар, қанотларининг учлари бир–бирига тегиб турарди. Улар ҳар томонга биргаликда юрардилар, юрганларида бурилмас эдилар. 10 Мавжудотларнинг юзларига келсак, улар тўрт хил эди: олд томонида инсон юзи, ўнг томонида шер юзи, чап томонида буқа юзи ва орқа томонида бургут юзи бор эди. 11 Мавжудотларнинг бир жуфт қаноти тепага ёйилган бўлиб, ёнидаги мавжудотларнинг қанотларига тегиб турарди. Қолган бир жуфт қаноти эса танасини ёпиб турарди. 12 Мавжудотлар тўғрига қараб юришар эди. Руҳ уларни қаерга йўналтирса, улар ўша ёққа боришарди, юрганда бурилмас эдилар. 13 Жонли мавжудотларнинг кўриниши ёнаётган кўмирга ёки машъалага ўхшар эди. Мавжудотларнинг орасида олов айланиб юрарди. Бу олов чақнарди, ундан чақмоқ чақиб турар эди. 14 Мавжудотларнинг ўзлари ҳам чақмоқ тезлиги билан у ердан–бу ерга бориб келишарди.
15 Мен тўртта мавжудотни томоша қилиб турганимда, мавжудотлар ёнидаги ғилдиракларни кўрдим. Ҳар бир мавжудотнинг ёнида биттадан ғилдирак бор эди. Ғилдираклар ерга тегиб турарди. 16 Тўртала ғилдиракнинг кўриниши ва тузилиши бир хил эди. Улар қимматбаҳо тошдай товланарди. Ҳар бир ғилдиракнинг ичида кўндалангига солинган яна биттадан ғилдирак бор эди. 17 Шу сабабдан ғилдираклар ҳаракатга келганда, тўрт томонга юра олар эди, юрганда бурилмасди. 18 Ғилдиракларнинг гардишлари баланд ва баҳайбат эди. Уларнинг гир айланаси кўзлар билан қопланган эди. 19 Жонли мавжудотлар юрганда, ёнларидаги ғилдираклар ҳам ҳаракатга келарди. Ердан кўтарилганда, ғилдираклар ҳам улар билан бирга кўтариларди. 20-21 Мавжудотлардаги руҳ ғилдиракларда ҳам бор эди. Шу сабабдан руҳ мавжудотларни қаерга йўналтирса, мавжудотлар ўша ёққа боришарди, ғилдираклар ҳам улар билан бирга ҳаракатга келарди. Мавжудотлар юрганда, улар ҳам юрар эди, тўхтаганда тўхтар эди, ердан кўтарилганда кўтарилар эди.
22 Мавжудотларнинг бошлари узра гумбазга ўхшаш бир нарса бор эди, ўша нарса биллурдек товланарди. 23 Қанотларини ёйган мавжудотлар гумбаз остида турар эди. Уларнинг қанотлари бир–бирига тегиб турарди. Иккинчи жуфт қанотлари эса баданларини ёпиб турарди. 24 Улар қанот қоқиб учардилар. Қанот қоққанларида чиққан товуши шовуллаган денгиз шовқинидай, Қодир Худонинг гумбурлаган овозидай, улкан лашкарнинг шовқин–суронидай эди. Мавжудотлар тўхтаганларида қанотларини йиғиб олишарди.
25 Улар тўхтаб, қанотларини йиғиб олдилар. Шунда бошлари тепасидаги гумбаз узра бир овоз янгради. 26 Гумбаз устида зангори ёқутдан ясалган тахтга ўхшаш бир нарса бор эди. Тахт устида инсон қиёфасидаги бир Зот ўтирарди. 27 Ўша кимсанинг белидан юқори қисми сайқалланган мисдай ярқирарди, атрофини олов ўраганди. Белидан пастки қисми эса оташ каби порларди. Унинг бутун борлиғи нур таратиб турарди. 28 Ўша нур ёмғирдан кейин булутлар орасида пайдо бўладиган камалакдек жилваланарди. Бу ёғду Эгамизнинг улуғворлигини акс эттирарди.
Худо Ҳизқиёлни хизматга чақиради
Мен буни кўришим биланоқ ерга мук тушдим, сўнг бир овоз эшитдим.
