13–BOB
Toʻngʻich erkaklarni bagʻishlash toʻgʻrisidagi amr
1 Egamiz Musoga yana gapirdi:
2 — Hamma toʻngʻichlarni Menga bagʻishlanglar. Isroil xalqining hamma toʻngʻich oʻgʻillari va hayvonlarining birinchi erkak bolasi Menikidir.
Xamirturushsiz non bayrami toʻgʻrisida koʻrsatmalar
3-4 Shundan soʻng Muso xalqqa dedi: “Bugun Abib oyida sizlar Misr yurtidan chiqib ketyapsizlar. Xamirturush qoʻshilgan nonni yemanglar. Bu kunni aslo eslaringizdan chiqarmanglar. Zero, Egamiz Oʻz qudrati bilan sizlarni Misrdagi qullikdan olib chiqdi. 5 U sizlarni Kanʼon, Xet, Amor, Xiv va Yobus xalqlarining yerlariga olib boradi. Egamiz bu yerlarni ota–bobolaringizga, beraman, deb ont ichgan. U sizlarni sut va asal oqib yotgan oʻsha yurtga olib borgandan keyin, Abib oyida quyidagicha udumni oʻtkazinglar: 6 yetti kun xamirturushsiz non yenglar. Yettinchi kuni Egamizga atab bayram qilinglar. 7 Shu paytlarda uyingizda yoki yurtingizning biron joyida xamirturushli non yoki xamirturush boʻlmasin. 8 Har yili bayram kunlari davomida nima uchun bayramni nishonlayotganingizni bolalaringizga tushuntirishingiz lozim. Ularga:
— Misrdan chiqayotganimizda, Egamiz bizga koʻrsatgan cheksiz muruvvati uchun bayramni nishonlayapmiz, — deb ayting. 9 Bu bayram goʻyo qoʻlingizdagi yoki peshanangizdagi bir belgiday boʻladi. Egamiz sizlarni Misrdan Oʻz qudrati bilan olib chiqqanini bu bayram eslatib turadi. Egamizning taʼlimotini bolalaringizga oʻrgatishingiz uchun bayramni nishonlanglar. 10 Sizlar belgilangan vaqtda yillar osha ushbu qonun–qoidaga rioya qilib boringlar.
Toʻngʻich erkaklarni Egamizga bagʻishlash toʻgʻrisida koʻrsatmalar
11 Egamiz oʻzlaringizga va ota–bobolaringizga ont ichib vaʼda bergan Kanʼon xalqlarining yurtiga sizlarni olib keladi. Oʻsha yurtni sizlarga beradi. Shundan keyin 12 toʻngʻich oʻgʻillaringizni, hamma chorvangizning birinchi erkak bolasini Unga beringlar. Bularning hammasi Egamiznikidir. 13 Eshakning tugʻilgan birinchi erkak bolasini ham Egamizdan bir qoʻzi yoki uloqchani atash evaziga sotib olinglar. Agar eshakni qaytarib sotib olmaslikka qaror qilsangiz, eshakning boʻynini sindirib oʻldirishingiz kerak. Sizlar Egamizdan hamma toʻngʻich oʻgʻillarni ham qaytarib sotib olishingiz lozim . 14 Kelajakda farzandlaringiz sizdan:
— Bu udumning maʼnosi nima? — deb soʻrashganda shunday javob beringlar:
— Egamiz bizni Misrdagi qullikdan qudratli qoʻli bilan olib chiqqan. 15 Firʼavn oʻjarlik qilib, ketishimiz uchun bizga ijozat bermaganda, Egamiz Misr yurtidagi hamma toʻngʻichlarni — odamlarning toʻngʻichidan tortib, hayvonlarning birinchi erkak bolasigacha oʻldirgan. Mana shuning uchun ham hayvonlarning birinchi erkak bolasini Egamizga qurbonlik qilamiz. Toʻngʻich oʻgʻillarimizni esa qaytarib sotib olamiz.
16 Bu bayram qoʻlingizdagi yoki peshanangizdagi bir belgiday boʻlib qoladi. Egamiz bizni qudratli qoʻli bilan Misrdan olib chiqqanini shu bayram sizlarga eslatib turadi.”
Ustun shaklidagi bulut va alanga
17 Xalq urushga duch kelib qolsa, Misrga qaytib ketmasin, deb oʻyladi Xudo. Shuning uchun firʼavn Isroil xalqiga ijozat bergandan keyin, Filist xalqining yurti orqali oʻtadigan yoʻl toʻgʻri Kanʼonga olib borsa ham, Xudo xalqni bu yoʻldan boshlab ketmadi. 18 Xudo xalqni Qizil dengizga sahro boʻylab aylanma yoʻl orqali olib ketdi.
Isroil xalqi Misrdan chiqqanda, guruhlarga boʻlingan holda yoʻlga tushdi. 19 Muso Yusufning suyaklarini oʻzi bilan oldi. Yusuf Isroil urugʻlariga qasam ichdirib: “Xudo sizlarni qutqargani albatta keladi, oʻshanda mening suyaklarimni bu yerdan olib ketinglar”, degan edi .
20 Isroil xalqi Suxotdan chiqqandan keyin, sahro etagidagi Etxamda qarorgoh qurdi. 21 Egamiz kunduzi ustun shaklidagi bulut ichida, kechasi ustun shaklidagi alanga ichida ularning oldida yurib, yoʻllarini yoritib yoʻl koʻrsatib bordi. Shu tariqa Isroil xalqi hamma vaqt — kunduzi ham, kechasi ham yoʻl yura oldi. 22 Kunduzi bulut ustuni, kechasi alanga ustuni xalqning oldidan bir dam nari ketmadi.
13–БОБ
Тўнғич эркакларни бағишлаш тўғрисидаги амр
1 Эгамиз Мусога яна гапирди:
2 — Ҳамма тўнғичларни Менга бағишланглар. Исроил халқининг ҳамма тўнғич ўғиллари ва ҳайвонларининг биринчи эркак боласи Меникидир.
Хамиртурушсиз нон байрами тўғрисида кўрсатмалар
3-4 Шундан сўнг Мусо халққа деди: “Бугун Абиб ойида сизлар Миср юртидан чиқиб кетяпсизлар. Хамиртуруш қўшилган нонни еманглар. Бу кунни асло эсларингиздан чиқарманглар. Зеро, Эгамиз Ўз қудрати билан сизларни Мисрдаги қулликдан олиб чиқди. 5 У сизларни Канъон, Хет, Амор, Хив ва Ёбус халқларининг ерларига олиб боради. Эгамиз бу ерларни ота–боболарингизга, бераман, деб онт ичган. У сизларни сут ва асал оқиб ётган ўша юртга олиб боргандан кейин, Абиб ойида қуйидагича удумни ўтказинглар: 6 етти кун хамиртурушсиз нон енглар. Еттинчи куни Эгамизга атаб байрам қилинглар. 7 Шу пайтларда уйингизда ёки юртингизнинг бирон жойида хамиртурушли нон ёки хамиртуруш бўлмасин. 8 Ҳар йили байрам кунлари давомида нима учун байрамни нишонлаётганингизни болаларингизга тушунтиришингиз лозим. Уларга:
— Мисрдан чиқаётганимизда, Эгамиз бизга кўрсатган чексиз муруввати учун байрамни нишонлаяпмиз, — деб айтинг. 9 Бу байрам гўё қўлингиздаги ёки пешанангиздаги бир белгидай бўлади. Эгамиз сизларни Мисрдан Ўз қудрати билан олиб чиққанини бу байрам эслатиб туради. Эгамизнинг таълимотини болаларингизга ўргатишингиз учун байрамни нишонланглар. 10 Сизлар белгиланган вақтда йиллар оша ушбу қонун–қоидага риоя қилиб боринглар.
Тўнғич эркакларни Эгамизга бағишлаш тўғрисида кўрсатмалар
11 Эгамиз ўзларингизга ва ота–боболарингизга онт ичиб ваъда берган Канъон халқларининг юртига сизларни олиб келади. Ўша юртни сизларга беради. Шундан кейин 12 тўнғич ўғилларингизни, ҳамма чорвангизнинг биринчи эркак боласини Унга беринглар. Буларнинг ҳаммаси Эгамизникидир. 13 Эшакнинг туғилган биринчи эркак боласини ҳам Эгамиздан бир қўзи ёки улоқчани аташ эвазига сотиб олинглар. Агар эшакни қайтариб сотиб олмасликка қарор қилсангиз, эшакнинг бўйнини синдириб ўлдиришингиз керак. Сизлар Эгамиздан ҳамма тўнғич ўғилларни ҳам қайтариб сотиб олишингиз лозим . 14 Келажакда фарзандларингиз сиздан:
— Бу удумнинг маъноси нима? — деб сўрашганда шундай жавоб беринглар:
— Эгамиз бизни Мисрдаги қулликдан қудратли қўли билан олиб чиққан. 15 Фиръавн ўжарлик қилиб, кетишимиз учун бизга ижозат бермаганда, Эгамиз Миср юртидаги ҳамма тўнғичларни — одамларнинг тўнғичидан тортиб, ҳайвонларнинг биринчи эркак боласигача ўлдирган. Мана шунинг учун ҳам ҳайвонларнинг биринчи эркак боласини Эгамизга қурбонлик қиламиз. Тўнғич ўғилларимизни эса қайтариб сотиб оламиз.
16 Бу байрам қўлингиздаги ёки пешанангиздаги бир белгидай бўлиб қолади. Эгамиз бизни қудратли қўли билан Мисрдан олиб чиққанини шу байрам сизларга эслатиб туради.”
Устун шаклидаги булут ва аланга
17 Халқ урушга дуч келиб қолса, Мисрга қайтиб кетмасин, деб ўйлади Худо. Шунинг учун фиръавн Исроил халқига ижозат бергандан кейин, Филист халқининг юрти орқали ўтадиган йўл тўғри Канъонга олиб борса ҳам, Худо халқни бу йўлдан бошлаб кетмади. 18 Худо халқни Қизил денгизга саҳро бўйлаб айланма йўл орқали олиб кетди.
Исроил халқи Мисрдан чиққанда, гуруҳларга бўлинган ҳолда йўлга тушди. 19 Мусо Юсуфнинг суякларини ўзи билан олди. Юсуф Исроил уруғларига қасам ичдириб: “Худо сизларни қутқаргани албатта келади, ўшанда менинг суякларимни бу ердан олиб кетинглар”, деган эди .
20 Исроил халқи Сухотдан чиққандан кейин, саҳро этагидаги Этхамда қароргоҳ қурди. 21 Эгамиз кундузи устун шаклидаги булут ичида, кечаси устун шаклидаги аланга ичида уларнинг олдида юриб, йўлларини ёритиб йўл кўрсатиб борди. Шу тариқа Исроил халқи ҳамма вақт — кундузи ҳам, кечаси ҳам йўл юра олди. 22 Кундузи булут устуни, кечаси аланга устуни халқнинг олдидан бир дам нари кетмади.
