34–BOB
Musoning oʻlimi
1 Muso Moʻab tekisligidan Navo togʻining choʻqqisiga chiqdi . Navo togʻi Yerixo shahrining sharqida joylashgan Fisgax togʻ tizmasining eng baland joyi edi. U yerdan Musoga Egamiz butun oʻlkani koʻrsatdi: shimoldagi Dan shahrigacha choʻzilgan butun Gilad oʻlkasini , 2 hamma Naftali yerlarini, Efrayim va Manashe yerlarini, Oʻrta yer dengizigacha choʻzilgan butun Yahudo yerlarini, 3 Nagav choʻli va tekislikni. Bu tekislik Zoʻvar shahridan to palmalar shahri boʻlmish Yerixogacha choʻzilgan edi. 4 Egamiz Musoga dedi:
— Men Ibrohim, Isʼhoq, Yoqubga, sening avlodingga beraman, deb qasam ichib aytgan yurt mana shudir. Mana, bu yurtni oʻz koʻzing bilan koʻrding, lekin u yurtga kirmaysan.
5 Egamiz aytganiday, Uning quli Muso oʻsha yerda, Moʻab yurtida vafot etdi. 6 Egamiz uni Moʻabda, Bayt–Piyor shahrining yaqinidagi bir vodiyda dafn qildi. Muso dafn qilingan joyni hozirgacha hech kim bilmaydi. 7 Muso vafot etganda 120 yoshda edi. Lekin koʻzlarining nuri hali soʻnmagan edi, gʻayrati yoʻqolmagan edi. 8 Isroil xalqi Moʻab tekisligida Muso uchun oʻttiz kun aza tutdi. Muso uchun aza kunlari tamom boʻldi.
9 Muso oʻlimidan oldin Yoshuaga qoʻl qoʻyib, uni yoʻlboshchi qilib tayinlagan edi. Nun oʻgʻli Yoshuani Xudo donolik ruhi bilan toʻldirdi. Isroil xalqi Yoshuaga boʻysundi, Egamiz Musoga buyurganlarning hammasini ular qildi.
10 Isroilda Musoga oʻxshagan paygʻambar boshqa chiqmadi. Egamiz Muso bilan yuzma–yuz gaplashar edi. 11 Egamiz uni Misr yurtida firʼavnga, uning aʼyonlari va butun xalqiga alomatu moʻjizalar koʻrsatish uchun yuborgan edi. 12 Muso butun Isroil xalqi oldida buyuk qudratu haybatli ishlarni namoyon qilgandi.
34–БОБ
Мусонинг ўлими
1 Мусо Мўаб текислигидан Наво тоғининг чўққисига чиқди . Наво тоғи Ерихо шаҳрининг шарқида жойлашган Фисгах тоғ тизмасининг энг баланд жойи эди. У ердан Мусога Эгамиз бутун ўлкани кўрсатди: шимолдаги Дан шаҳригача чўзилган бутун Гилад ўлкасини , 2 ҳамма Нафтали ерларини, Эфрайим ва Манаше ерларини, Ўрта ер денгизигача чўзилган бутун Яҳудо ерларини, 3 Нагав чўли ва текисликни. Бу текислик Зўвар шаҳридан то пальмалар шаҳри бўлмиш Ерихогача чўзилган эди. 4 Эгамиз Мусога деди:
— Мен Иброҳим, Исҳоқ, Ёқубга, сенинг авлодингга бераман, деб қасам ичиб айтган юрт мана шудир. Мана, бу юртни ўз кўзинг билан кўрдинг, лекин у юртга кирмайсан.
5 Эгамиз айтганидай, Унинг қули Мусо ўша ерда, Мўаб юртида вафот этди. 6 Эгамиз уни Мўабда, Байт–Пиёр шаҳрининг яқинидаги бир водийда дафн қилди. Мусо дафн қилинган жойни ҳозиргача ҳеч ким билмайди. 7 Мусо вафот этганда 120 ёшда эди. Лекин кўзларининг нури ҳали сўнмаган эди, ғайрати йўқолмаган эди. 8 Исроил халқи Мўаб текислигида Мусо учун ўттиз кун аза тутди. Мусо учун аза кунлари тамом бўлди.
9 Мусо ўлимидан олдин Ёшуага қўл қўйиб, уни йўлбошчи қилиб тайинлаган эди. Нун ўғли Ёшуани Худо донолик руҳи билан тўлдирди. Исроил халқи Ёшуага бўйсунди, Эгамиз Мусога буюрганларнинг ҳаммасини улар қилди.
10 Исроилда Мусога ўхшаган пайғамбар бошқа чиқмади. Эгамиз Мусо билан юзма–юз гаплашар эди. 11 Эгамиз уни Миср юртида фиръавнга, унинг аъёнлари ва бутун халқига аломату мўъжизалар кўрсатиш учун юборган эди. 12 Мусо бутун Исроил халқи олдида буюк қудрату ҳайбатли ишларни намоён қилганди.
