3–BOB
Isroil xalqi shoh Oʻgni magʻlub qiladi
1 Keyin biz Bashan oʻlkasiga yoʻl oldik. Bashan shohi Oʻg oʻzining jamiki lashkarini boshlab, Edrey shahri yaqinida biz bilan jang qilgani chiqdi. 2 Shunda Egamiz menga dedi: “Oʻgdan qoʻrqma. Men uning oʻzini, lashkarini va butun yurtini sening qoʻlingga berganman. Sen Oʻgning boshiga Xashbonda hukmronlik qilgan Amor xalqining shohi Sixoʻnning kunini solasan.”
3 Egamiz Xudo Bashan shohi Oʻgni va uning butun lashkarini bizning qoʻlimizga berdi. Biz ularning hammasini bitta qoldirmay qirib tashladik. 4 Uning hamma shaharlarini — oltmishta shahrini oldik. Bashandagi Oʻgning shohligiga kirgan butun Argob hududini qoʻlga kiritdik, biz olmagan birorta ham shahar qolmadi. 5 Bu mustahkam shaharlarning hammasi baland devorlar bilan oʻralgan, darvozalari tambalangan edi. Bulardan tashqari, devor bilan oʻralmagan koʻp qishloqlar ham bor edi. 6 Biz Xashbon shohi Sixoʻnning shaharlarini qanday vayron qilgan boʻlsak, Oʻgning shaharlarini ham shunday vayron qildik. Bu shaharlarni erkagu ayollari va bolalari bilan birga yoʻq qildik. 7 Hamma chorva va shaharlardagi oʻljani oʻzimizga oldik.
8 Shunday qilib, oʻshanda biz Iordan daryosining sharq tomonida hukmronlik qilgan ikkala Amor shohini magʻlub qildik. Janubdagi Arnon soyligidan to shimoldagi Xermon togʻigacha choʻzilgan yerlarini qoʻlga kiritdik. 9 (Xermon togʻini Sidonliklar — “Siriyon”, Amor xalqi — “Sanir” deb atashadi.) 10 Biz Bashanda hukmronlik qilgan shoh Oʻgning butun shohligini, yassi tepalikdagi hamma shaharlarini, sharqdagi Salko va Edreygacha boʻlgan butun Gilad va Bashan oʻlkalarini qoʻlga kiritdik.
11 (Rafa xalqidan birgina Bashan shohi Oʻg tirik qolgan edi. Uning yotadigan oʻrni temirdan yasalgan boʻlib, odatdagi oʻlcham boʻyicha uzunligi toʻqqiz tirsak, kengligi esa toʻrt tirsak edi. Uning oʻrni hozir ham Ommon yurtining Rabba shahridadir.)
Iordan daryosidan sharqqa oʻrnashgan qabilalar
12 Biz oʻsha yerlarni qoʻlga kiritdik. Shunda men Ruben va Gad qabilalariga Arnon soyligi boʻyidagi Aror shahrining shimolidagi hududni, Gilad qirlarining yarmisini va atrofdagi qishloqlarni berdim. 13 Manashe qabilasining yarmiga esa Giladning qolgan qismini va Oʻgning shohligi boʻlgan butun Bashanni berdim. (Bashan oʻlkasidagi Argob hududi Rafa xalqining yurti hisoblanardi. 14 Manashe qabilasidan boʻlgan Yovir butun Argob hududini qoʻlga kiritdi. Bu hudud Gashur va Maxo yurtlarigacha choʻzilgan edi. Yovir bu joyga oʻzining nomini berdi. Oʻsha joylar bugungacha Yovir qishloqlari deb ataladi.)
15 Manashe qabilasining Moxir urugʻiga Giladni berdim. 16 Ruben va Gad qabilalariga Giladdan to Arnon soyligigacha choʻzilgan yerlarni berdim. Arnon soyligining oʻrtasi ikkala qabilaning chegarasi edi. Ularning yeri Ommon yurtining chegarasini tashkil qilgan Yavoq daryosigacha choʻzilgan edi. 17 Ularning gʻarbdagi yerlari esa Iordan daryosi boʻylab, shimoldagi Jalila koʻlidan to janubdagi Oʻlik dengizgacha va sharqdagi Fisgax togʻ tizmasining yon bagʻirlarigacha choʻzilgan edi.
18 Oʻshanda sizlarga shunday buyurdim: “Egangiz Xudo bu yerni sizlarga mulk qilib berdi. Hamma sipohlaringiz qurollanib, daryodan kechib oʻtsin. Ular birodarlaringiz boʻlgan Isroil xalqini boshlab borsin. 19 Faqat xotinlaringiz va farzandlaringiz men sizlarga bergan shaharlarda qolsin. Bilaman, mollaringiz juda koʻp, ular ham shaharlaringizda qolaversin. 20 Egamiz sizlarga tinchlik ato qilganday, birodarlaringizga ham tinchlik ato qilgandan keyin, ular Iordanning narigi tomonidagi, Egangiz Xudo berayotgan yerni egallab olgandan keyin, hammangiz men sizlarga bergan mana shu yerga qaytib kelsangiz boʻladi.”
21 Oʻshanda Yoshuaga aytdim: “Egang Xudo oʻsha ikkala shohni nima qilganini oʻz koʻzing bilan koʻrding. Sen bosib oʻtadigan barcha shohliklarni ham Egamiz xuddi shunday ahvolga soladi. 22 Ulardan qoʻrqma. Sizlar uchun jang qiladigan Egang Xudodir.”
Musoga Xudo Kanʼon yurtiga kirish uchun ijozat bermaydi
23 Shundan keyin men Egamga yolvordim: 24 “Yo Egam Rabbiy! Men, qulingga Oʻz buyukliging va qudratingni endigina koʻrsata boshlading. Samoda ham, yerda ham Sening ajoyibotlaringni, buyuk ishlaringni qila oladigan boshqa xudo yoʻq! 25 Ijozat ber, men Iordan daryosidan oʻtay. Daryoning narigi tomonidagi hosildor yurtni, oʻsha chiroyli qirlarni va Lubnonni koʻray.”
26 Lekin Egamiz sizlar tufayli mendan gʻazablangani uchun iltijolarimga quloq solmadi. U menga shunday dedi: “Boʻldi qil! Menga bu haqda boshqa gapirma. 27 Fisgax togʻ tizmasining choʻqqisiga chiq, gʻarbga, shimolga, janubga va sharqqa qara. Yaxshilab qarab ol, chunki sen mana shu Iordan daryosidan kechib oʻtmaysan. 28 Yoshuani xizmatga tayinla. Unga dalda berib, ruhlantir. Bu xalqni daryoning narigi tomoniga Yoshua boshlab boradi. Uning boshchiligida bu xalq sen koʻradigan oʻsha yerni egallaydi.”
29 Shunday qilib, biz Bayt–Piyor qarshisidagi vodiyda toʻxtadik.
3–БОБ
Исроил халқи шоҳ Ўгни мағлуб қилади
1 Кейин биз Башан ўлкасига йўл олдик. Башан шоҳи Ўг ўзининг жамики лашкарини бошлаб, Эдрей шаҳри яқинида биз билан жанг қилгани чиқди. 2 Шунда Эгамиз менга деди: “Ўгдан қўрқма. Мен унинг ўзини, лашкарини ва бутун юртини сенинг қўлингга берганман. Сен Ўгнинг бошига Хашбонда ҳукмронлик қилган Амор халқининг шоҳи Сихўннинг кунини соласан.”
3 Эгамиз Худо Башан шоҳи Ўгни ва унинг бутун лашкарини бизнинг қўлимизга берди. Биз уларнинг ҳаммасини битта қолдирмай қириб ташладик. 4 Унинг ҳамма шаҳарларини — олтмишта шаҳрини олдик. Башандаги Ўгнинг шоҳлигига кирган бутун Аргоб ҳудудини қўлга киритдик, биз олмаган бирорта ҳам шаҳар қолмади. 5 Бу мустаҳкам шаҳарларнинг ҳаммаси баланд деворлар билан ўралган, дарвозалари тамбаланган эди. Булардан ташқари, девор билан ўралмаган кўп қишлоқлар ҳам бор эди. 6 Биз Хашбон шоҳи Сихўннинг шаҳарларини қандай вайрон қилган бўлсак, Ўгнинг шаҳарларини ҳам шундай вайрон қилдик. Бу шаҳарларни эркагу аёллари ва болалари билан бирга йўқ қилдик. 7 Ҳамма чорва ва шаҳарлардаги ўлжани ўзимизга олдик.
8 Шундай қилиб, ўшанда биз Иордан дарёсининг шарқ томонида ҳукмронлик қилган иккала Амор шоҳини мағлуб қилдик. Жанубдаги Арнон сойлигидан то шимолдаги Хермон тоғигача чўзилган ерларини қўлга киритдик. 9 (Хермон тоғини Сидонликлар — “Сириён”, Амор халқи — “Санир” деб аташади.) 10 Биз Башанда ҳукмронлик қилган шоҳ Ўгнинг бутун шоҳлигини, ясси тепаликдаги ҳамма шаҳарларини, шарқдаги Салко ва Эдрейгача бўлган бутун Гилад ва Башан ўлкаларини қўлга киритдик.
11 (Рафа халқидан биргина Башан шоҳи Ўг тирик қолган эди. Унинг ётадиган ўрни темирдан ясалган бўлиб, одатдаги ўлчам бўйича узунлиги тўққиз тирсак, кенглиги эса тўрт тирсак эди. Унинг ўрни ҳозир ҳам Оммон юртининг Рабба шаҳридадир.)
Иордан дарёсидан шарққа ўрнашган қабилалар
12 Биз ўша ерларни қўлга киритдик. Шунда мен Рубен ва Гад қабилаларига Арнон сойлиги бўйидаги Арор шаҳрининг шимолидаги ҳудудни, Гилад қирларининг ярмисини ва атрофдаги қишлоқларни бердим. 13 Манаше қабиласининг ярмига эса Гиладнинг қолган қисмини ва Ўгнинг шоҳлиги бўлган бутун Башанни бердим. (Башан ўлкасидаги Аргоб ҳудуди Рафа халқининг юрти ҳисобланарди. 14 Манаше қабиласидан бўлган Ёвир бутун Аргоб ҳудудини қўлга киритди. Бу ҳудуд Гашур ва Махо юртларигача чўзилган эди. Ёвир бу жойга ўзининг номини берди. Ўша жойлар бугунгача Ёвир қишлоқлари деб аталади.)
15 Манаше қабиласининг Мохир уруғига Гиладни бердим. 16 Рубен ва Гад қабилаларига Гиладдан то Арнон сойлигигача чўзилган ерларни бердим. Арнон сойлигининг ўртаси иккала қабиланинг чегараси эди. Уларнинг ери Оммон юртининг чегарасини ташкил қилган Явоқ дарёсигача чўзилган эди. 17 Уларнинг ғарбдаги ерлари эса Иордан дарёси бўйлаб, шимолдаги Жалила кўлидан то жанубдаги Ўлик денгизгача ва шарқдаги Фисгах тоғ тизмасининг ён бағирларигача чўзилган эди.
18 Ўшанда сизларга шундай буюрдим: “Эгангиз Худо бу ерни сизларга мулк қилиб берди. Ҳамма сипоҳларингиз қуролланиб, дарёдан кечиб ўтсин. Улар биродарларингиз бўлган Исроил халқини бошлаб борсин. 19 Фақат хотинларингиз ва фарзандларингиз мен сизларга берган шаҳарларда қолсин. Биламан, молларингиз жуда кўп, улар ҳам шаҳарларингизда қолаверсин. 20 Эгамиз сизларга тинчлик ато қилгандай, биродарларингизга ҳам тинчлик ато қилгандан кейин, улар Иорданнинг нариги томонидаги, Эгангиз Худо бераётган ерни эгаллаб олгандан кейин, ҳаммангиз мен сизларга берган мана шу ерга қайтиб келсангиз бўлади.”
21 Ўшанда Ёшуага айтдим: “Эганг Худо ўша иккала шоҳни нима қилганини ўз кўзинг билан кўрдинг. Сен босиб ўтадиган барча шоҳликларни ҳам Эгамиз худди шундай аҳволга солади. 22 Улардан қўрқма. Сизлар учун жанг қиладиган Эганг Худодир.”
Мусога Худо Канъон юртига кириш учун ижозат бермайди
23 Шундан кейин мен Эгамга ёлвордим: 24 “Ё Эгам Раббий! Мен, қулингга Ўз буюклигинг ва қудратингни эндигина кўрсата бошладинг. Самода ҳам, ерда ҳам Сенинг ажойиботларингни, буюк ишларингни қила оладиган бошқа худо йўқ! 25 Ижозат бер, мен Иордан дарёсидан ўтай. Дарёнинг нариги томонидаги ҳосилдор юртни, ўша чиройли қирларни ва Лубнонни кўрай.”
26 Лекин Эгамиз сизлар туфайли мендан ғазаблангани учун илтижоларимга қулоқ солмади. У менга шундай деди: “Бўлди қил! Менга бу ҳақда бошқа гапирма. 27 Фисгах тоғ тизмасининг чўққисига чиқ, ғарбга, шимолга, жанубга ва шарққа қара. Яхшилаб қараб ол, чунки сен мана шу Иордан дарёсидан кечиб ўтмайсан. 28 Ёшуани хизматга тайинла. Унга далда бериб, руҳлантир. Бу халқни дарёнинг нариги томонига Ёшуа бошлаб боради. Унинг бошчилигида бу халқ сен кўрадиган ўша ерни эгаллайди.”
29 Шундай қилиб, биз Байт–Пиёр қаршисидаги водийда тўхтадик.
