13–BOB
1 Agar orangizda biror paygʻambar yoki tush taʼbirlovchi paydo boʻlib: “Alomat yoki moʻjiza koʻrsataman”, deb aytsa, 2 uning aytganlari bajo boʻlsa, keyin u: “Yur, sen bilmagan boshqa xudolarga ergashaylik, ularga xizmat qilaylik”, desa, 3 oʻsha paygʻambar yoki tush taʼbirlovchining soʻzlariga quloq solmanglar. Egangiz Xudo: “Qani bilay–chi, ular butun qalbi bilan, jonu dili bilan Meni sevadimi yoki yoʻqmi”, deb sizlarni sinayotgan boʻladi. 4 Sizlar faqatgina Egangiz Xudoga ergashinglar. Undan qoʻrqinglar, Uning amrlariga itoat etinglar. Egangizga quloq solinglar, Unga xizmat qilinglar, Unga sodiq boʻlinglar. 5 Egangiz Xudo sizni Misr yurtidan olib chiqqan, Misrdagi qullikdan ozod qilgan. Oʻsha paygʻambar yoki tush taʼbirlovchi esa sizni Xudoyingizdan yuz oʻgirtirishga harakat qildi. Egangiz Xudo amr qilgan yoʻldan sizni ozdirmoqchi boʻldi. Shuning uchun uni oʻldiringlar. Orangizdan yomonlikni yoʻq qilinglar.
6 Hatto aka–ukangiz yoki oʻgʻlingiz, qizingiz, sevikli xotiningiz yo jonajon doʻstingiz sizni yashirincha oʻzingiz bilmagan, ota–bobolaringiz ham bilmagan begona xudolarga sajda qilishga undashi mumkin. 7 Atrofingizda yashayotgan uzoq–yaqindagi, yerning bu chetidan narigi chetigacha oʻrnashgan xalqlarning xudolariga sigʻinishga undashi mumkin. 8 Ammo sizlar rozi boʻlmanglar. Bunday odamga quloq solmanglar, unga rahm–shafqat qilmanglar, uning yonini olmanglar. 9 Uni oʻldiringlar. Birinchi boʻlib sen, keyin butun xalq unga tosh otinglar. 10 Uni toshboʻron qilib oʻldiringlar. Chunki u sizlarni Misrdagi qullikdan olib chiqqan Egangiz Xudodan yuz oʻgirishga undadi. 11 Bu voqeani Isroil xalqi eshitib qoʻrqadi, bundan keyin orangizda bunday qabihlik qilinmaydi.
12 Egangiz Xudo sizlarga yashash uchun berayotgan shaharlarning birortasida 13 manfur odamlar chiqib, ular shahar ahlini: “Yuringlar, oʻzlaringiz bilmagan boshqa xudolarga xizmat qilaylik”, deb yoʻldan urganini eshitsangiz, 14 soʻrab–surishtiringlar, yaxshilab tekshiringlar. Bu jirkanch voqea haqiqatan yuz bergan boʻlib, eshitganlaringiz rost boʻlib chiqsa, 15 oʻsha shaharning butun aholisini, hayvonlarigacha qilichdan oʻtkazinglar. Shaharni va undagi hamma narsani butunlay vayron qilinglar. 16 Oʻljalarni maydon oʻrtasiga yigʻinglar. Shaharni va u yerdagi hamma oʻljani Egangiz Xudoga bagʻishlab, yondirib tashlanglar. U joy abadiy vayronaga aylansin, hech qachon qayta tiklanmasin. 17 Yondiriladigan narsalardan hech birini oʻzingizga olmanglar. Shunda Egamiz gʻazabidan tushadi, sizlarga mehr–shafqat koʻrsatadi, rahm qiladi, ota–bobolaringizga qasam ichib vaʼda berganiday sizlarni koʻpaytiradi. 18 Shuning uchun sizlar Egangiz Xudoga quloq solishingiz kerak. Men bugun sizlarga berayotgan Uning amrlariga itoat etib, Uning oldida toʻgʻri ishlar qilishingiz kerak.
13–БОБ
1 Агар орангизда бирор пайғамбар ёки туш таъбирловчи пайдо бўлиб: “Аломат ёки мўъжиза кўрсатаман”, деб айтса, 2 унинг айтганлари бажо бўлса, кейин у: “Юр, сен билмаган бошқа худоларга эргашайлик, уларга хизмат қилайлик”, деса, 3 ўша пайғамбар ёки туш таъбирловчининг сўзларига қулоқ солманглар. Эгангиз Худо: “Қани билай–чи, улар бутун қалби билан, жону дили билан Мени севадими ёки йўқми”, деб сизларни синаётган бўлади. 4 Сизлар фақатгина Эгангиз Худога эргашинглар. Ундан қўрқинглар, Унинг амрларига итоат этинглар. Эгангизга қулоқ солинглар, Унга хизмат қилинглар, Унга содиқ бўлинглар. 5 Эгангиз Худо сизни Миср юртидан олиб чиққан, Мисрдаги қулликдан озод қилган. Ўша пайғамбар ёки туш таъбирловчи эса сизни Худойингиздан юз ўгиртиришга ҳаракат қилди. Эгангиз Худо амр қилган йўлдан сизни оздирмоқчи бўлди. Шунинг учун уни ўлдиринглар. Орангиздан ёмонликни йўқ қилинглар.
6 Ҳатто ака–укангиз ёки ўғлингиз, қизингиз, севикли хотинингиз ё жонажон дўстингиз сизни яширинча ўзингиз билмаган, ота–боболарингиз ҳам билмаган бегона худоларга сажда қилишга ундаши мумкин. 7 Атрофингизда яшаётган узоқ–яқиндаги, ернинг бу четидан нариги четигача ўрнашган халқларнинг худоларига сиғинишга ундаши мумкин. 8 Аммо сизлар рози бўлманглар. Бундай одамга қулоқ солманглар, унга раҳм–шафқат қилманглар, унинг ёнини олманглар. 9 Уни ўлдиринглар. Биринчи бўлиб сен, кейин бутун халқ унга тош отинглар. 10 Уни тошбўрон қилиб ўлдиринглар. Чунки у сизларни Мисрдаги қулликдан олиб чиққан Эгангиз Худодан юз ўгиришга ундади. 11 Бу воқеани Исроил халқи эшитиб қўрқади, бундан кейин орангизда бундай қабиҳлик қилинмайди.
12 Эгангиз Худо сизларга яшаш учун бераётган шаҳарларнинг бирортасида 13 манфур одамлар чиқиб, улар шаҳар аҳлини: “Юринглар, ўзларингиз билмаган бошқа худоларга хизмат қилайлик”, деб йўлдан урганини эшитсангиз, 14 сўраб–суриштиринглар, яхшилаб текширинглар. Бу жирканч воқеа ҳақиқатан юз берган бўлиб, эшитганларингиз рост бўлиб чиқса, 15 ўша шаҳарнинг бутун аҳолисини, ҳайвонларигача қиличдан ўтказинглар. Шаҳарни ва ундаги ҳамма нарсани бутунлай вайрон қилинглар. 16 Ўлжаларни майдон ўртасига йиғинглар. Шаҳарни ва у ердаги ҳамма ўлжани Эгангиз Худога бағишлаб, ёндириб ташланглар. У жой абадий вайронага айлансин, ҳеч қачон қайта тикланмасин. 17 Ёндириладиган нарсалардан ҳеч бирини ўзингизга олманглар. Шунда Эгамиз ғазабидан тушади, сизларга меҳр–шафқат кўрсатади, раҳм қилади, ота–боболарингизга қасам ичиб ваъда берганидай сизларни кўпайтиради. 18 Шунинг учун сизлар Эгангиз Худога қулоқ солишингиз керак. Мен бугун сизларга бераётган Унинг амрларига итоат этиб, Унинг олдида тўғри ишлар қилишингиз керак.
