2–BOB
1 Men sizlar uchun, shuningdek, Laodikiya shahridagilar hamda meni shaxsan koʻrmagan imonlilarning hammasi uchun naqadar zoʻr gʻayrat bilan mehnat qilayotganimni bilishingizni istayman. 2 Maqsadim shuki, sizlar dadil boʻling, muhabbat rishtalari sizlarni birlashtirsin, Xudoning siri — Masih haqida chuqur va boy tushunchaga ega boʻling. 3 Chunki donolik va ilmu maʼrifatning hamma xazinalari Masihda pinhondir. 4 Hech kim sizlarni tilyogʻlamalik bilan yoʻldan ozdirmasin deb, men sizlarga shularni aytyapman. 5 Garchi men jisman sizlarning orangizda boʻlmasam ham, xayolan siz bilan birgaman. Sizlarning tartib–intizomingiz va Masihga boʻlgan sogʻlom imoningizni koʻrib sevinyapman.
Masih ato qiladigan yangi hayot
6 Sizlar Iso Masihni Rabbimiz deb qabul qilgan ekansizlar, doimo U koʻrsatgan yoʻldan yuravering. 7 Olgan taʼlimotingizga muvofiq, Masihda tomir yoyib, qaror toping. Imoningizda qattiq turing, Xudoga shukronalar tilingizdan tushmasin. 8 Ehtiyot boʻlinglar, hech kim falsafa va quruq safsatalar bilan sizlarni avramasin. Bunday gaplar Masihga emas, balki insonlarning anʼanasiga, dunyoning xurofiy kuchlariga asoslanadi. 9 Xudo Oʻzining butun borligʻi bilan toʻla–toʻkis Masihning vujudida mavjuddir. 10 Masihga tegishli boʻlganingiz uchun hayotingiz toʻla–toʻkis, chunki U har qanday kuch va hokimiyatdan ustundir. 11 Masih orqali sizlar sunnat qilindingiz, bu jismoniy sunnat emas, balki Masih orqali qilinadigan sunnat, yaʼni gunohkor tabiatning kesib tashlanishidir. 12 Suvga choʻmdirilish orqali Masih bilan birga koʻmildingiz. Masihni oʻlikdan tiriltirgan Xudoning qudratiga boʻlgan imoningiz tufayli Masih bilan birga tirildingiz. 13 Ilgari sizlar sunnatsiz , gunohga botgan boʻlib, ruhan oʻlik edingizlar. Endi esa Xudo barcha gunohlaringizni kechirib, sizlarni Masih bilan birga tiriltirdi. 14 Bizga qarshi yozilgan ayblov hukmini Xudo bekor qildi, yaʼni oʻsha hukmni xochga mixlab, kuchdan qoldirdi. 15 Oʻsha xoch orqali koinotdagi kuchlaru hukmronliklar ustidan gʻalaba qozonib, ularni qurolsizlantirdi. Oʻzining gʻolibona yurishida ularning tutqun ekanligini namoyish etib, sharmanda qildi.
16 Shuning uchun yegulik–ichgulik, diniy bayramlar, yangi oy shodiyonalari yoki Shabbat kuni xususida hech kim sizlarga qonun–qoida chiqarmasin. 17 Oʻsha urf–odatlar kelajakning sharpasigina, xolos, ammo haqiqiy hayot Masihdadir. 18 Shunday ekan, dindorlikka berilib, oʻzini moʻminlikka soladiganlar, farishtalarga sigʻinadiganlar sizlarni kamsitsa, eʼtibor bermanglar. Ular koʻrgan vahiylari bilan maqtanadigan, aql–zakovati bilan magʻrurlanadigan odamlardir. 19 Bunday kishilar Masihdan ajralgan. Masih — Oʻz tanasi, yaʼni jamoatning Boshidir. Mana shu Boshdan butun badan hayotbaxsh kuch olib, payu boʻgʻinlar orqali oʻzaro ulanib, Xudoning xohishi boʻyicha oʻsadi.
20 Agar sizlar Masih bilan birga oʻlgan boʻlsangizlar, dunyoning xurofiy kuchlari uchun ham oʻlgan boʻlasizlar. Unday boʻlsa yana nimaga bu dunyoga qul boʻlib, 21 “tegma”, “yema”, “ushlama” degan qonun–qoidalarga boʻysunasizlar?! 22 Bu insoniy taʼlimotlar va qoidalar ishlatilgan sari yoʻq boʻlib ketadigan narsalar haqida–ku! 23 Garchi bu qoidalar keltirib chiqargan dindorlik, oʻzini moʻmin qilib koʻrsatish, badanni qiynash odamlarga hikmatday tuyulsa–da, aslida ular shahvatu nafsga boʻlgan ishtiyoqni koʻpaytiradi.
2–БОБ
1 Мен сизлар учун, шунингдек, Лаодикия шаҳридагилар ҳамда мени шахсан кўрмаган имонлиларнинг ҳаммаси учун нақадар зўр ғайрат билан меҳнат қилаётганимни билишингизни истайман. 2 Мақсадим шуки, сизлар дадил бўлинг, муҳаббат ришталари сизларни бирлаштирсин, Худонинг сири — Масиҳ ҳақида чуқур ва бой тушунчага эга бўлинг. 3 Чунки донолик ва илму маърифатнинг ҳамма хазиналари Масиҳда пинҳондир. 4 Ҳеч ким сизларни тилёғламалик билан йўлдан оздирмасин деб, мен сизларга шуларни айтяпман. 5 Гарчи мен жисман сизларнинг орангизда бўлмасам ҳам, хаёлан сиз билан биргаман. Сизларнинг тартиб–интизомингиз ва Масиҳга бўлган соғлом имонингизни кўриб севиняпман.
Масиҳ ато қиладиган янги ҳаёт
6 Сизлар Исо Масиҳни Раббимиз деб қабул қилган экансизлар, доимо У кўрсатган йўлдан юраверинг. 7 Олган таълимотингизга мувофиқ, Масиҳда томир ёйиб, қарор топинг. Имонингизда қаттиқ туринг, Худога шукроналар тилингиздан тушмасин. 8 Эҳтиёт бўлинглар, ҳеч ким фалсафа ва қуруқ сафсаталар билан сизларни аврамасин. Бундай гаплар Масиҳга эмас, балки инсонларнинг анъанасига, дунёнинг хурофий кучларига асосланади. 9 Худо Ўзининг бутун борлиғи билан тўла–тўкис Масиҳнинг вужудида мавжуддир. 10 Масиҳга тегишли бўлганингиз учун ҳаётингиз тўла–тўкис, чунки У ҳар қандай куч ва ҳокимиятдан устундир. 11 Масиҳ орқали сизлар суннат қилиндингиз, бу жисмоний суннат эмас, балки Масиҳ орқали қилинадиган суннат, яъни гуноҳкор табиатнинг кесиб ташланишидир. 12 Сувга чўмдирилиш орқали Масиҳ билан бирга кўмилдингиз. Масиҳни ўликдан тирилтирган Худонинг қудратига бўлган имонингиз туфайли Масиҳ билан бирга тирилдингиз. 13 Илгари сизлар суннатсиз , гуноҳга ботган бўлиб, руҳан ўлик эдингизлар. Энди эса Худо барча гуноҳларингизни кечириб, сизларни Масиҳ билан бирга тирилтирди. 14 Бизга қарши ёзилган айблов ҳукмини Худо бекор қилди, яъни ўша ҳукмни хочга михлаб, кучдан қолдирди. 15 Ўша хоч орқали коинотдаги кучлару ҳукмронликлар устидан ғалаба қозониб, уларни қуролсизлантирди. Ўзининг ғолибона юришида уларнинг тутқун эканлигини намойиш этиб, шарманда қилди.
16 Шунинг учун егулик–ичгулик, диний байрамлар, янги ой шодиёналари ёки Шаббат куни хусусида ҳеч ким сизларга қонун–қоида чиқармасин. 17 Ўша урф–одатлар келажакнинг шарпасигина, холос, аммо ҳақиқий ҳаёт Масиҳдадир. 18 Шундай экан, диндорликка берилиб, ўзини мўминликка соладиганлар, фаришталарга сиғинадиганлар сизларни камситса, эътибор берманглар. Улар кўрган ваҳийлари билан мақтанадиган, ақл–заковати билан мағрурланадиган одамлардир. 19 Бундай кишилар Масиҳдан ажралган. Масиҳ — Ўз танаси, яъни жамоатнинг Бошидир. Мана шу Бошдан бутун бадан ҳаётбахш куч олиб, паю бўғинлар орқали ўзаро уланиб, Худонинг хоҳиши бўйича ўсади.
20 Агар сизлар Масиҳ билан бирга ўлган бўлсангизлар, дунёнинг хурофий кучлари учун ҳам ўлган бўласизлар. Ундай бўлса яна нимага бу дунёга қул бўлиб, 21 “тегма”, “ема”, “ушлама” деган қонун–қоидаларга бўйсунасизлар?! 22 Бу инсоний таълимотлар ва қоидалар ишлатилган сари йўқ бўлиб кетадиган нарсалар ҳақида–ку! 23 Гарчи бу қоидалар келтириб чиқарган диндорлик, ўзини мўмин қилиб кўрсатиш, баданни қийнаш одамларга ҳикматдай туюлса–да, аслида улар шаҳвату нафсга бўлган иштиёқни кўпайтиради.
