2–BOB
Moʻab
1 Egamiz shunday demoqda:
“Moʻab xalqi gunoh ustiga gunoh qildi!
Men ularni jazosiz qoldirmayman.
Axir, ular Edom shohining qabrini bulgʻadilar,
Suyaklarini kuydirib ohak qildilar.
2 Shunday ekan, Men Moʻab ustiga olov yogʻdiraman,
Olov Xariyoʻt qalʼalarini kuydirib tashlaydi.
Shovqin–suron ostida, bosqinchilarning hayqiriqlariyu
Burgʻu sadolari ostida Moʻab xalqi halok boʻladi.
3 Men Moʻab hukmdorini yoʻq qilaman,
U bilan birga mulozimlarini qirib tashlayman.”
Egamizning kalomi shudir.
Yahudo
4 Egamiz shunday demoqda:
“Yahudo xalqi gunoh ustiga gunoh qildi!
Men ularni jazosiz qoldirmayman,
Axir, ular qonunlarimdan yuz oʻgirdilar.
Qoidalarimni bajarmadilar.
Ota–bobolari singari, soxta xudolarga sigʻinib,
Haq yoʻldan ozdilar.
5 Shunday ekan, Men Yahudo yurtiga olov yogʻdiraman,
Olov Quddus qalʼalarini kuydirib tashlaydi.”
Isroil xalqi hukm qilinadi
6 Egamiz shunday demoqda:
“Isroil xalqi gunoh ustiga gunoh qildi!
Men ularni jazosiz qoldirmayman,
Axir, ular aybsizlarni pulga sotyaptilar.
Kambagʻallarni bir juft choriqqa almashtiryaptilar.
7 Yoʻqsilning boshini tuproqqa qorib, oyoq osti qilyaptilar,
Mazlumni yoʻldan chetga itarib chiqaryaptilar.
Ota va oʻgʻil bitta juvon bilan yotib ,
Meni badnom qilyaptilar.
8 Ular har bir qurbongoh oldida
Oʻzlari garovga olgan liboslar ustida yotibdilar .
Oʻz Xudosining uyida,
Jarima evaziga olgan sharobni ichyaptilar.
9 Ey Isroil xalqi, Men sizni deb,
Amor xalqlarini yoʻq qilgan edim.
Ularning boʻy–basti sadr daraxtiday baland,
Eman daraxtiday baquvvat boʻlgan boʻlsa–da,
Men ularning mevasini qovjiratgan edim,
Ildizini quritgan edim.
10 Amor xalqining yurtini sizlarga mulk qilib beraman deb,
Sizlarni Misr yurtidan olib chiqqandim.
Qirq yil sahroda sizlarga yoʻl koʻrsatib yurgandim.
11 Farzandlaringizdan paygʻambarlar tayinladim,
Baʼzi yigitlaringizni, Menga bagʻishlaninglar , deb chorladim.
Shunday emasmi, ey Isroil xalqi?!
— deb aytmoqda Egamiz. —
12 Sizlar esa Menga bagʻishlanganlarga sharob ichirdingiz ,
Paygʻambarlarimga: «Bashorat qilmanglar!» deb buyurdingiz.
13 Mana endi sizlarni shu qadar ezamanki,
Sizlar ogʻir yuk ostida gʻirchillagan aravaday boʻlasiz.
14 Oʻshanda chaqqonlar ham qochib qutulolmaydi,
Pahlavonlar ham kuchdan qoladi,
Hatto jangchilar ham jonini saqlay olmaydi.
15 Kamonkash dosh berolmaydi,
Choparlar qutqara olmaydi oʻzini,
Otliqlar saqlay olmaydi jonini.
16 Oʻsha kuni jasurlarning eng dovuragi ham
Qurol–aslahalarini tashlab qochadi.”
Egamizning kalomi shudir.
2–БОБ
Мўаб
1 Эгамиз шундай демоқда:
“Мўаб халқи гуноҳ устига гуноҳ қилди!
Мен уларни жазосиз қолдирмайман.
Ахир, улар Эдом шоҳининг қабрини булғадилар,
Суякларини куйдириб оҳак қилдилар.
2 Шундай экан, Мен Мўаб устига олов ёғдираман,
Олов Харийўт қалъаларини куйдириб ташлайди.
Шовқин–сурон остида, босқинчиларнинг ҳайқириқларию
Бурғу садолари остида Мўаб халқи ҳалок бўлади.
3 Мен Мўаб ҳукмдорини йўқ қиламан,
У билан бирга мулозимларини қириб ташлайман.”
Эгамизнинг каломи шудир.
Яҳудо
4 Эгамиз шундай демоқда:
“Яҳудо халқи гуноҳ устига гуноҳ қилди!
Мен уларни жазосиз қолдирмайман,
Ахир, улар қонунларимдан юз ўгирдилар.
Қоидаларимни бажармадилар.
Ота–боболари сингари, сохта худоларга сиғиниб,
Ҳақ йўлдан оздилар.
5 Шундай экан, Мен Яҳудо юртига олов ёғдираман,
Олов Қуддус қалъаларини куйдириб ташлайди.”
Исроил халқи ҳукм қилинади
6 Эгамиз шундай демоқда:
“Исроил халқи гуноҳ устига гуноҳ қилди!
Мен уларни жазосиз қолдирмайман,
Ахир, улар айбсизларни пулга сотяптилар.
Камбағалларни бир жуфт чориққа алмаштиряптилар.
7 Йўқсилнинг бошини тупроққа қориб, оёқ ости қиляптилар,
Мазлумни йўлдан четга итариб чиқаряптилар.
Ота ва ўғил битта жувон билан ётиб ,
Мени бадном қиляптилар.
8 Улар ҳар бир қурбонгоҳ олдида
Ўзлари гаровга олган либослар устида ётибдилар .
Ўз Худосининг уйида,
Жарима эвазига олган шаробни ичяптилар.
9 Эй Исроил халқи, Мен сизни деб,
Амор халқларини йўқ қилган эдим.
Уларнинг бўй–басти садр дарахтидай баланд,
Эман дарахтидай бақувват бўлган бўлса–да,
Мен уларнинг мевасини қовжиратган эдим,
Илдизини қуритган эдим.
10 Амор халқининг юртини сизларга мулк қилиб бераман деб,
Сизларни Миср юртидан олиб чиққандим.
Қирқ йил саҳрода сизларга йўл кўрсатиб юргандим.
11 Фарзандларингиздан пайғамбарлар тайинладим,
Баъзи йигитларингизни, Менга бағишланинглар , деб чорладим.
Шундай эмасми, эй Исроил халқи?!
— деб айтмоқда Эгамиз. —
12 Сизлар эса Менга бағишланганларга шароб ичирдингиз ,
Пайғамбарларимга: «Башорат қилманглар!» деб буюрдингиз.
13 Мана энди сизларни шу қадар эзаманки,
Сизлар оғир юк остида ғирчиллаган аравадай бўласиз.
14 Ўшанда чаққонлар ҳам қочиб қутулолмайди,
Паҳлавонлар ҳам кучдан қолади,
Ҳатто жангчилар ҳам жонини сақлай олмайди.
15 Камонкаш дош беролмайди,
Чопарлар қутқара олмайди ўзини,
Отлиқлар сақлай олмайди жонини.
16 Ўша куни жасурларнинг энг довюраги ҳам
Қурол–аслаҳаларини ташлаб қочади.”
Эгамизнинг каломи шудир.
