8–BOB
Shoul imonlilar jamoatini quvgʻin qiladi
1 Stefanning oʻlimini Shoul maʼqullagan edi. Oʻsha kundanoq Quddusdagi imonlilar jamoati shafqatsiz quvgʻinlardan azob cheka boshladi. Havoriylardan boshqa hamma imonlilar Yahudiya va Samariya boʻylab tarqalib ketdilar. 2 Taqvodor odamlar Stefanni dafn qildilar, u uchun qattiq qaygʻurib, aza tutdilar. 3 Shoul esa jamoatni yoʻq qilish payiga tushgan edi. U uyma–uy yurib, erkagu ayol imonlilarni sudrab olib chiqar, ularni qamoqxonaga tashlar edi.
Filip Samariyada vaʼz qiladi
4 Imonlilar tarqalib ketib, Iso haqidagi xabarni har joylarda vaʼz qilib yurardilar. 5 Filip Samariyaning bosh shahriga borib, u yerdagi aholiga Masih toʻgʻrisida vaʼz qildi. 6 Filipni tinglab turgan va qilgan moʻjizalarini koʻrgan olomon uning gaplariga diqqat bilan quloq soldi. 7 Yovuz ruhlar koʻp odamlarning ichidan chinqirib chiqib ketardi, koʻplab shol va choʻloq odamlar shifo topar edilar. 8 Shunday qilib, oʻsha shaharda katta shodlik hukm surardi.
9 Shu yerda Shimoʻn degan bir odam yashardi. U anchadan beri sehr–jodular qilib, Samariya aholisini hayratda qoldirib kelardi. Shu tariqa u oʻzini buyuk odam qilib koʻrsatardi. 10 Shahardagi har bir odam — kattayu kichik uning gaplariga diqqat bilan quloq solar, “Bu odam Xudoning qudratidir, u Buyuk Qudrat deb nom olgan”, deb aytardi. 11 Shimoʻn uzoq vaqt odamlarni sehr–jodulari bilan ajablantirib kelgani uchun ham, odamlar unga diqqat bilan quloq solishardi. 12 Ammo Filip Xudoning Shohligi va Iso Masih toʻgʻrisidagi Xushxabarni vaʼz qilgandan keyin, odamlar Filipga ishondilar. Erkagu ayol suvga choʻmdirildi. 13 Hatto Shimoʻn ham imonga keldi. U suvga choʻmdirilgandan keyin, yuz berayotgan alomatlaru buyuk moʻjizalarni koʻrib, hayratda qoldi va Filipdan ajralmaydigan boʻldi.
14 Quddusdagi havoriylar, Samariya aholisi Xudoning kalomini qabul qilibdi, deb eshitganlari uchun, Butrus bilan Yuhannoni ularning oldiga yubordilar. 15 Butrus bilan Yuhanno borib, Muqaddas Ruhni qabul qilib olinglar, deb Samariyaliklar uchun ibodat qildilar. 16 Chunki hali Muqaddas Ruh ularning birontasini ham qamrab olmagan edi. Ular faqat Rabbimiz Iso nomi bilan suvga choʻmdirilgan edilar, xolos. 17 Shundan keyin Butrus bilan Yuhanno ularning ustiga qoʻllarini qoʻydilar. Shu tariqa Samariyaliklar Muqaddas Ruhni qabul qildilar.
18 Shimoʻn koʻrdiki, odamlarning boshlariga havoriylar qoʻllarini qoʻyganlarida, Muqaddas Ruh ularga berilardi. U Butrus bilan Yuhannoga pul taklif qilib, dedi:
19 — Shu qudratdan menga ham beringlar, toki birontasining boshiga qoʻllarimni qoʻyganimda, oʻsha odam Muqaddas Ruhni qabul qilsin.
20 Ammo Butrus shunday javob berdi:
— Puling oʻzing bilan birga doʻzaxga ravona boʻlsin, chunki sen, Xudoning inʼomini pulga sotib olsam boʻladi, deb oʻylaysan. 21 Bu ishda sening na ulushing, na haqing bor! Sening yuraging Xudo nazarida toʻgʻri emas. 22 Endi tavba qilib, bu fosiq niyatingdan qayt, “Meni kechirgin”, deb Egamizga ibodat qil, balki yuragingdagi niyatingni U kechirar. 23 Koʻrib turibman: yuraging achchiq zardaga toʻla, oʻzing fosiqlik zanjiriga bogʻlangansan.
24 Shimoʻn shunday javob berdi:
— Men uchun Egamizga ibodat qilinglar, tagʻin aytganlaringizdan biri boshimga tushmasin.
25 Butrus bilan Yuhanno u yerda guvohlik berib, Rabbimiz Iso haqidagi xabarni vaʼz qildilar. Shundan keyin Samariyaning koʻp qishloqlarida Xushxabarni eʼlon qilib, Quddusga qaytib ketdilar.
Filip va Habashistonlik amaldor
26 Shu orada Egamizning bir farishtasi Filipga dedi: “Qani, boʻl, janubga bor, Quddusdan Gʻazoga olib boradigan sahro yoʻlidan ket.” 27 Filip yoʻlga chiqdi, ketayotib Habashistonlik bir amaldorni uchratib qoldi. U Habashiston malikasining bosh xazinaboni lavozimidagi katta amaldor edi. U sajda qilgani Quddusga kelib, 28 endi uyiga qaytayotgan edi. Amaldor aravada oʻtirganicha, Ishayo paygʻambar kitobini oʻqib ketayotgan edi. 29 Muqaddas Ruh Filipga: “Aravaga yaqinroq bor, uning yonida yur”, dedi. 30 Filip yugurib, aravaga yetib oldi, amaldorning Ishayo paygʻambar kitobini oʻqiyotganini eshitdi. Filip:
— Oʻqiyotganingizni tushunyapsizmi? — deb soʻradi.
31 — Birontasi yordam bermasa, tushunarmidim?! — deb javob berdi amaldor. U Filipga: “Chiq, yonimga oʻtir”, deb taklif qildi. 32 Amaldor oʻqiyotgan Muqaddas bitiklar parchasi quyidagilar edi:
“Boʻgʻizlanishga olib borilgan qoʻyday,
Jun qirquvchi oldida jim turgan qoʻziday
U miq etmadi, ogʻzini ochmadi.
33 U xoʻrlandi. Adolatdan mahrum qilindi.
Uning nasli haqida kim oʻylaydi?
Yer yuzida uning hayotiga chek qoʻyildi.”
34 Amaldor Filipdan soʻradi:
— Ayt–chi, paygʻambar bu gaplarni kim toʻgʻrisida aytdi — oʻzi toʻgʻrisidami yoki boshqa birontasi toʻgʻrisidami?
35 Shundan keyin Filip tushuntira boshladi, Muqaddas bitiklarning shu qismidan boshlab, Iso haqidagi Xushxabarni amaldorga soʻzlab berdi. 36-37 Ular yoʻlda ketayotganlarida, suv bor joyga kelib qoldilar. Shunda amaldor dedi:
— Mana bu yerda suv bor ekan. Suvga choʻmdirilishimga nima xalaqit beradi?!
38 Amaldor aravani toʻxtatishga buyurdi. Ular ikkalasi — Filip bilan amaldor suvga tushdilar, Filip uni suvga choʻmdirdi.
39 Ular suvdan chiqqanlaridan keyin, Egamizning Ruhi toʻsatdan Filipni olib ketdi . Amaldor uni qaytib koʻrmadi, ammo xursand boʻlganicha, yoʻlida davom etdi. 40 Filip esa Azotus shahrida paydo boʻlib qoldi. U Qaysariyaga kelguncha, butun oʻlka boʻylab oʻtar ekan, hamma shaharlarda Xushxabarni eʼlon qilib boraverdi.
8–БОБ
Шоул имонлилар жамоатини қувғин қилади
1 Стефаннинг ўлимини Шоул маъқуллаган эди. Ўша кунданоқ Қуддусдаги имонлилар жамоати шафқатсиз қувғинлардан азоб чека бошлади. Ҳаворийлардан бошқа ҳамма имонлилар Яҳудия ва Самария бўйлаб тарқалиб кетдилар. 2 Тақводор одамлар Стефанни дафн қилдилар, у учун қаттиқ қайғуриб, аза тутдилар. 3 Шоул эса жамоатни йўқ қилиш пайига тушган эди. У уйма–уй юриб, эркагу аёл имонлиларни судраб олиб чиқар, уларни қамоқхонага ташлар эди.
Филип Самарияда ваъз қилади
4 Имонлилар тарқалиб кетиб, Исо ҳақидаги хабарни ҳар жойларда ваъз қилиб юрардилар. 5 Филип Самариянинг бош шаҳрига бориб, у ердаги аҳолига Масиҳ тўғрисида ваъз қилди. 6 Филипни тинглаб турган ва қилган мўъжизаларини кўрган оломон унинг гапларига диққат билан қулоқ солди. 7 Ёвуз руҳлар кўп одамларнинг ичидан чинқириб чиқиб кетарди, кўплаб шол ва чўлоқ одамлар шифо топар эдилар. 8 Шундай қилиб, ўша шаҳарда катта шодлик ҳукм сурарди.
9 Шу ерда Шимўн деган бир одам яшарди. У анчадан бери сеҳр–жодулар қилиб, Самария аҳолисини ҳайратда қолдириб келарди. Шу тариқа у ўзини буюк одам қилиб кўрсатарди. 10 Шаҳардаги ҳар бир одам — каттаю кичик унинг гапларига диққат билан қулоқ солар, “Бу одам Худонинг қудратидир, у Буюк Қудрат деб ном олган”, деб айтарди. 11 Шимўн узоқ вақт одамларни сеҳр–жодулари билан ажаблантириб келгани учун ҳам, одамлар унга диққат билан қулоқ солишарди. 12 Аммо Филип Худонинг Шоҳлиги ва Исо Масиҳ тўғрисидаги Хушхабарни ваъз қилгандан кейин, одамлар Филипга ишондилар. Эркагу аёл сувга чўмдирилди. 13 Ҳатто Шимўн ҳам имонга келди. У сувга чўмдирилгандан кейин, юз бераётган аломатлару буюк мўъжизаларни кўриб, ҳайратда қолди ва Филипдан ажралмайдиган бўлди.
14 Қуддусдаги ҳаворийлар, Самария аҳолиси Худонинг каломини қабул қилибди, деб эшитганлари учун, Бутрус билан Юҳаннони уларнинг олдига юбордилар. 15 Бутрус билан Юҳанно бориб, Муқаддас Руҳни қабул қилиб олинглар, деб Самарияликлар учун ибодат қилдилар. 16 Чунки ҳали Муқаддас Руҳ уларнинг биронтасини ҳам қамраб олмаган эди. Улар фақат Раббимиз Исо номи билан сувга чўмдирилган эдилар, холос. 17 Шундан кейин Бутрус билан Юҳанно уларнинг устига қўлларини қўйдилар. Шу тариқа Самарияликлар Муқаддас Руҳни қабул қилдилар.
18 Шимўн кўрдики, одамларнинг бошларига ҳаворийлар қўлларини қўйганларида, Муқаддас Руҳ уларга бериларди. У Бутрус билан Юҳаннога пул таклиф қилиб, деди:
19 — Шу қудратдан менга ҳам беринглар, токи биронтасининг бошига қўлларимни қўйганимда, ўша одам Муқаддас Руҳни қабул қилсин.
20 Аммо Бутрус шундай жавоб берди:
— Пулинг ўзинг билан бирга дўзахга равона бўлсин, чунки сен, Худонинг инъомини пулга сотиб олсам бўлади, деб ўйлайсан. 21 Бу ишда сенинг на улушинг, на ҳақинг бор! Сенинг юрагинг Худо назарида тўғри эмас. 22 Энди тавба қилиб, бу фосиқ ниятингдан қайт, “Мени кечиргин”, деб Эгамизга ибодат қил, балки юрагингдаги ниятингни У кечирар. 23 Кўриб турибман: юрагинг аччиқ зардага тўла, ўзинг фосиқлик занжирига боғлангансан.
24 Шимўн шундай жавоб берди:
— Мен учун Эгамизга ибодат қилинглар, тағин айтганларингиздан бири бошимга тушмасин.
25 Бутрус билан Юҳанно у ерда гувоҳлик бериб, Раббимиз Исо ҳақидаги хабарни ваъз қилдилар. Шундан кейин Самариянинг кўп қишлоқларида Хушхабарни эълон қилиб, Қуддусга қайтиб кетдилар.
Филип ва Ҳабашистонлик амалдор
26 Шу орада Эгамизнинг бир фариштаси Филипга деди: “Қани, бўл, жанубга бор, Қуддусдан Ғазога олиб борадиган саҳро йўлидан кет.” 27 Филип йўлга чиқди, кетаётиб Ҳабашистонлик бир амалдорни учратиб қолди. У Ҳабашистон маликасининг бош хазинабони лавозимидаги катта амалдор эди. У сажда қилгани Қуддусга келиб, 28 энди уйига қайтаётган эди. Амалдор аравада ўтирганича, Ишаё пайғамбар китобини ўқиб кетаётган эди. 29 Муқаддас Руҳ Филипга: “Аравага яқинроқ бор, унинг ёнида юр”, деди. 30 Филип югуриб, аравага етиб олди, амалдорнинг Ишаё пайғамбар китобини ўқиётганини эшитди. Филип:
— Ўқиётганингизни тушуняпсизми? — деб сўради.
31 — Биронтаси ёрдам бермаса, тушунармидим?! — деб жавоб берди амалдор. У Филипга: “Чиқ, ёнимга ўтир”, деб таклиф қилди. 32 Амалдор ўқиётган Муқаддас битиклар парчаси қуйидагилар эди:
“Бўғизланишга олиб борилган қўйдай,
Жун қирқувчи олдида жим турган қўзидай
У миқ этмади, оғзини очмади.
33 У хўрланди. Адолатдан маҳрум қилинди.
Унинг насли ҳақида ким ўйлайди?
Ер юзида унинг ҳаётига чек қўйилди.”
34 Амалдор Филипдан сўради:
— Айт–чи, пайғамбар бу гапларни ким тўғрисида айтди — ўзи тўғрисидами ёки бошқа биронтаси тўғрисидами?
35 Шундан кейин Филип тушунтира бошлади, Муқаддас битикларнинг шу қисмидан бошлаб, Исо ҳақидаги Хушхабарни амалдорга сўзлаб берди. 36-37 Улар йўлда кетаётганларида, сув бор жойга келиб қолдилар. Шунда амалдор деди:
— Мана бу ерда сув бор экан. Сувга чўмдирилишимга нима халақит беради?!
38 Амалдор аравани тўхтатишга буюрди. Улар иккаласи — Филип билан амалдор сувга тушдилар, Филип уни сувга чўмдирди.
39 Улар сувдан чиққанларидан кейин, Эгамизнинг Руҳи тўсатдан Филипни олиб кетди . Амалдор уни қайтиб кўрмади, аммо хурсанд бўлганича, йўлида давом этди. 40 Филип эса Азотус шаҳрида пайдо бўлиб қолди. У Қайсарияга келгунча, бутун ўлка бўйлаб ўтар экан, ҳамма шаҳарларда Хушхабарни эълон қилиб бораверди.
