2–BOB
Qabih odam
1 Rabbimiz Iso Masihning kelishi va bizning U bilan birga boʻladigan kunimiz haqida quyidagilarni aytsak: birodarlar, sizlardan oʻtinib soʻraymiz, 2 Rabbimiz kelibdi degan gaplar boshingizni aylantirmasin, sizlarni xavotirga solmasin. Ehtimol, bunday gaplar bashorat orqali, biror xabar yoki xuddi biz yozgan xatga oʻxshash bir xat orqali kelib chiqqandir. 3 Hech kim sizlarni hech qanday usul bilan aldamasin. Koʻpchilik Xudoga qarshi bosh koʻtarmaguncha va qabih odam kelmaguncha, oʻsha kun kelmaydi. Oʻsha odam halokatga mahkum qilingan. 4 U har qanday “xudo” deb atalgan va sajda qilingan narsaga qarshi chiqib, oʻzini ulardan ustun qoʻyadi. Hattoki, Xudoning Maʼbadida oʻtirib olib, oʻzini xudo deb ataydi.
5 Sizlar bilan boʻlganimda shularni aytganim esingizda yoʻqmi? 6 Oʻsha qabih odamni hozir nima tutib turganini oʻzingiz bilasiz. Bu odam belgilangan vaqtda zohir boʻladi. 7 Ha, qabihlikning yashirin kuchi allaqachon ishga tushgan. Biroq bir zot bu kuchni tiyib turibdi. Oʻsha zot olib tashlangandan keyin, 8 qabih odam oshkor qilinadi. Uni Rabbimiz Iso bir nafas bilan halok qiladi. Rabbimiz kelganda, Oʻz ulugʻvorligining yorqinligi bilan uni yoʻq qilib tashlaydi. 9 Oʻsha qabih odam shaytonning kuchi bilan keladi. Qudratini koʻrsatib, har xil moʻjizayu ajoyibotlar qiladi. 10 Halok boʻlayotganlarni turli makr–hiylalar bilan aldaydi. Ular najot beradigan haqiqatni rad qilganlari uchun, uni sevmaganlari uchun halok boʻlyaptilar. 11 Mana shuning uchun Xudo ularni adashtiradigan bir kuchga topshirib qoʻyadi. Shunda ular yolgʻonlarga ishonib yuraveradilar. 12 Natijada, haqiqatga ishonmay, yovuzlikdan zavq topganlarning hammasi hukm qilinadi.
Imoningiz qatʼiy boʻlsin
13 Ey Egamiz sevgan birodarlar! Sizlar uchun har doim Xudoga shukr qilishni burch deb bilamiz. Axir, Muqaddas Ruh kuchi bilan poklansin va haqiqatga ishonsin deb, Xudo sizlarni boshidanoq najot uchun tanlagan edi. 14 Rabbimiz Iso Masihning ulugʻvorligidan bahramand boʻlishingiz uchun biz aytgan Xushxabar orqali Xudo sizlarni chaqirdi. 15 Shuning uchun, ey birodarlar, imoningiz qatʼiy boʻlsin. Biz gaplarimiz va xatlarimiz orqali sizlarga oʻrgatgan haqiqatni mahkam tutinglar.
16 Bizni sevadigan, Oʻz inoyati bilan bizga tengsiz jasorat va barqaror umid bergan Otamiz Xudo va Rabbimiz Iso Masihning Oʻzi 17 sizlarga dalda bersin, har bir qilgan yaxshi ishingiz va soʻzingizda sizlarga kuch ato qilsin.
2–БОБ
Қабиҳ одам
1 Раббимиз Исо Масиҳнинг келиши ва бизнинг У билан бирга бўладиган кунимиз ҳақида қуйидагиларни айтсак: биродарлар, сизлардан ўтиниб сўраймиз, 2 Раббимиз келибди деган гаплар бошингизни айлантирмасин, сизларни хавотирга солмасин. Эҳтимол, бундай гаплар башорат орқали, бирор хабар ёки худди биз ёзган хатга ўхшаш бир хат орқали келиб чиққандир. 3 Ҳеч ким сизларни ҳеч қандай усул билан алдамасин. Кўпчилик Худога қарши бош кўтармагунча ва қабиҳ одам келмагунча, ўша кун келмайди. Ўша одам ҳалокатга маҳкум қилинган. 4 У ҳар қандай “худо” деб аталган ва сажда қилинган нарсага қарши чиқиб, ўзини улардан устун қўяди. Ҳаттоки, Худонинг Маъбадида ўтириб олиб, ўзини худо деб атайди.
5 Сизлар билан бўлганимда шуларни айтганим эсингизда йўқми? 6 Ўша қабиҳ одамни ҳозир нима тутиб турганини ўзингиз биласиз. Бу одам белгиланган вақтда зоҳир бўлади. 7 Ҳа, қабиҳликнинг яширин кучи аллақачон ишга тушган. Бироқ бир зот бу кучни тийиб турибди. Ўша зот олиб ташлангандан кейин, 8 қабиҳ одам ошкор қилинади. Уни Раббимиз Исо бир нафас билан ҳалок қилади. Раббимиз келганда, Ўз улуғворлигининг ёрқинлиги билан уни йўқ қилиб ташлайди. 9 Ўша қабиҳ одам шайтоннинг кучи билан келади. Қудратини кўрсатиб, ҳар хил мўъжизаю ажойиботлар қилади. 10 Ҳалок бўлаётганларни турли макр–ҳийлалар билан алдайди. Улар нажот берадиган ҳақиқатни рад қилганлари учун, уни севмаганлари учун ҳалок бўляптилар. 11 Мана шунинг учун Худо уларни адаштирадиган бир кучга топшириб қўяди. Шунда улар ёлғонларга ишониб юраверадилар. 12 Натижада, ҳақиқатга ишонмай, ёвузликдан завқ топганларнинг ҳаммаси ҳукм қилинади.
Имонингиз қатъий бўлсин
13 Эй Эгамиз севган биродарлар! Сизлар учун ҳар доим Худога шукр қилишни бурч деб биламиз. Ахир, Муқаддас Руҳ кучи билан поклансин ва ҳақиқатга ишонсин деб, Худо сизларни бошиданоқ нажот учун танлаган эди. 14 Раббимиз Исо Масиҳнинг улуғворлигидан баҳраманд бўлишингиз учун биз айтган Хушхабар орқали Худо сизларни чақирди. 15 Шунинг учун, эй биродарлар, имонингиз қатъий бўлсин. Биз гапларимиз ва хатларимиз орқали сизларга ўргатган ҳақиқатни маҳкам тутинглар.
16 Бизни севадиган, Ўз инояти билан бизга тенгсиз жасорат ва барқарор умид берган Отамиз Худо ва Раббимиз Исо Масиҳнинг Ўзи 17 сизларга далда берсин, ҳар бир қилган яхши ишингиз ва сўзингизда сизларга куч ато қилсин.
