1–BOB
Duoyi salom
1 Otamiz Xudo va Rabbimiz Iso Masihning Salonika shahridagi imonlilar jamoatiga Pavlus, Silas va Timoʻtiydan salom! 2 Otamiz Xudo va Rabbimiz Iso Masih sizlarga inoyat va tinchlik ato qilsin.
Iso Masih kelganda boʻladigan hukm
3 Birodarlar, sizlar uchun har doim Xudoga shukr qilishni burch deb bilamiz. Shunday qilishimiz juda oʻrinli, chunki sizlarning imoningiz kundan–kunga oʻsib boryapti, bir–biringizga va boshqa hammaga mehr–muhabbatingiz oshyapti. 4 Shuning uchun biz Xudoning jamoatlari oldida sizlar bilan faxrlanamiz. Axir, sizlar quvgʻinlaru azob–uqubatlarga sabr–toqat va imon bilan bardosh beryapsiz. 5 Xudoning Shohligi yoʻlida azob chekyapsiz, shunday ekan, Xudo sizlarni Oʻz Shohligiga loyiq topib, unga erishtiradi. Oqibatda esa Uning odil hukmi hammaga ayon boʻladi. 6 Ha, Xudo odildir, sizlarni azoblaganlarga U azob beradi. 7-8 Azob chekayotgan sizlarga esa Oʻz tinchligini ato qiladi, sizlar qatori bizga ham tinchligini beradi. Bularning hammasi Rabbimiz Iso Oʻzining qudratli farishtalari bilan, lovullab turgan alanga ichida, koʻkdan zohir boʻlganda roʻy beradi. Xudoni rad etganlarni va Oʻzi haqidagi Xushxabarga quloq solmaganlarni Iso Masih jazolaydi. 9 Oʻsha odamlar Rabbimiz Isoning huzuri va qudratli ulugʻvorligidan ayrilib, abadiy halokat jazosini oladilar. 10 Oʻsha kuni Rabbimizni Uning muqaddas xalqi ulugʻlaydi. Unga ishongan hamma odamlar Uni madh qiladi. Sizlar ham oʻsha insonlarning qatoriga kirasiz, chunki biz aytgan xabarga ishondingiz. 11 Shunday ekan, Xudoyimiz sizni Oʻz chaqirigʻiga loyiq deb topsin, Oʻz qudrati bilan sizlarning barcha yaxshi niyatlaringizni roʻyobga chiqarsin, imon bilan qilgan ishlaringizni amalga oshirsin, deb biz doim sizlar uchun ibodat qilamiz. 12 Rabbimiz Isoning nomi orangizda ulugʻlansin, sizlar esa Xudoyimiz va Rabbimiz Iso Masihning inoyati bilan U orqali ulugʻlaninglar, deb ibodat qilamiz.
1–БОБ
Дуойи салом
1 Отамиз Худо ва Раббимиз Исо Масиҳнинг Салоника шаҳридаги имонлилар жамоатига Павлус, Силас ва Тимўтийдан салом! 2 Отамиз Худо ва Раббимиз Исо Масиҳ сизларга иноят ва тинчлик ато қилсин.
Исо Масиҳ келганда бўладиган ҳукм
3 Биродарлар, сизлар учун ҳар доим Худога шукр қилишни бурч деб биламиз. Шундай қилишимиз жуда ўринли, чунки сизларнинг имонингиз кундан–кунга ўсиб боряпти, бир–бирингизга ва бошқа ҳаммага меҳр–муҳаббатингиз ошяпти. 4 Шунинг учун биз Худонинг жамоатлари олдида сизлар билан фахрланамиз. Ахир, сизлар қувғинлару азоб–уқубатларга сабр–тоқат ва имон билан бардош беряпсиз. 5 Худонинг Шоҳлиги йўлида азоб чекяпсиз, шундай экан, Худо сизларни Ўз Шоҳлигига лойиқ топиб, унга эриштиради. Оқибатда эса Унинг одил ҳукми ҳаммага аён бўлади. 6 Ҳа, Худо одилдир, сизларни азоблаганларга У азоб беради. 7-8 Азоб чекаётган сизларга эса Ўз тинчлигини ато қилади, сизлар қатори бизга ҳам тинчлигини беради. Буларнинг ҳаммаси Раббимиз Исо Ўзининг қудратли фаришталари билан, ловуллаб турган аланга ичида, кўкдан зоҳир бўлганда рўй беради. Худони рад этганларни ва Ўзи ҳақидаги Хушхабарга қулоқ солмаганларни Исо Масиҳ жазолайди. 9 Ўша одамлар Раббимиз Исонинг ҳузури ва қудратли улуғворлигидан айрилиб, абадий ҳалокат жазосини оладилар. 10 Ўша куни Раббимизни Унинг муқаддас халқи улуғлайди. Унга ишонган ҳамма одамлар Уни мадҳ қилади. Сизлар ҳам ўша инсонларнинг қаторига кирасиз, чунки биз айтган хабарга ишондингиз. 11 Шундай экан, Худойимиз сизни Ўз чақириғига лойиқ деб топсин, Ўз қудрати билан сизларнинг барча яхши ниятларингизни рўёбга чиқарсин, имон билан қилган ишларингизни амалга оширсин, деб биз доим сизлар учун ибодат қиламиз. 12 Раббимиз Исонинг номи орангизда улуғлансин, сизлар эса Худойимиз ва Раббимиз Исо Масиҳнинг инояти билан У орқали улуғланинглар, деб ибодат қиламиз.
