2–BOB
Soxta ustozlarning gunohi va jazosi
1 Isroil xalqi orasida soxta paygʻambarlar boʻlgani kabi, sizlarning orangizda ham soxta ustozlar boʻladi. Ular nayrang ishlatib, orangizda halokatli bidʼatlar tarqatadilar. Hatto ularning jonlarini sotib olgan Xoʻjayinini ham rad etib, bu bilan oʻzlarini muqarrar kulfatga yoʻliqtiradilar. 2 Koʻp odamlar ularga taqlid qilib, axloqsiz hayot kechiradilar. Ularning dastidan imonsizlar haqiqat yoʻlini yomonlaydilar. 3 Bu tamagir ustozlar toʻqib chiqargan gaplari bilan sizlarni yoʻldan ozdiradilar, soʻng pulingizni shilib oladilar. Ammo Xudo bunday odamlarni ancha oldin oʻlimga mahkum qilib qoʻygan. U mudramaydi, ularning halokatini kechiktirmaydi.
4 Xudo hatto gunoh qilgan farishtalarni ham ayamagan. Qiyomat kunigacha ularni tubsiz chuqurlikdagi zulmatga zanjirband qilib qoʻygan. 5 Xudo qadimgi dunyoni ham ayamay, betavfiqlar ustiga toʻfon keltirdi. U faqat solihlik jarchisi boʻlgan Nuhni va boshqa yetti kishini omon saqladi. 6 Xudo Sadoʻm va Gʻamoʻra shaharlarini halokatga mahkum etdi. Xudosizlarga saboq boʻlsin deb, bu shaharlarni kuydirib kul qildi. 7 Bebosh odamlarning oʻtaketgan axloqsizliklaridan azob chekkan solih Lutni esa qutqardi. 8 Oʻsha xalq orasida yashagan bu solih odam har kuni ularning qabih ishlarini koʻrib eshitgani uchun ichidan ezilib qiynalar edi. 9 Bu misollar quyidagilarni anglatadi: Egamiz taqvodorlarni kulfatlardan qutqara oladi, betavfiqlarni esa qiyomat kunidagi azoblar uchun saqlaydi. 10 Ayniqsa, shahvoniy hirsga berilib, oʻz tanasini bulgʻatuvchi, ilohiy hokimiyatni esa rad qiluvchi odamlarni U jazolaydi.
Darvoqe, orangizdagi soxta ustozlar ham ilohiy hokimiyatni rad qilyaptilar, ular surbet va takabburdirlar. Ular samoviy mavjudotlardan qoʻrqmaydilar, ularni nazarga ham ilmaydilar. 11 Farishtalar oʻsha yovuz mavjudotlardan kuchliroq va qudratliroq boʻlishlariga qaramay, Egamizning huzurida mavjudotlarni haqoratlamaydilar, hukm ham qilmaydilar. 12 Ammo bu soxta ustozlar yovvoyi hayvonlarga oʻxshaydilar, ular faqat tugʻma his–tuygʻulariga berilib yashaydilar. Oʻzlari anglab yetmaydigan yovuz mavjudotlarni mensimay yuribdilar. Biroq ular oʻsha mavjudotlar bilan birga halok boʻladilar, hayvonlar singari ovlanib, yoʻq qilinadilar.
13 Soxta ustozlarning qilgan nohaqliklari oʻzlarining boshiga yetadi. Axir, ular kuppa–kunduzi aysh–ishrat qilishni xush koʻradilar, jamoatingiz shaʼniga dogʻ tushiradilar. Sizlar taom yeyish uchun birga yigʻilganingizda, Rabbimiz Isoni xotirlash uchun non sindirganingizda, ular orangizda oʻtirib, kayfu safo qiladilar. Buzuqligi bilan boshqalarni yoʻldan uradilar. 14 Koʻzlari doimo shahvat bilan yonadi, gunoh qilib toʻymaydilar. Ular imonda sust kishilarni ovlab, yoʻldan ozdiradilar. Bu soxta ustozlar istagan narsasini undirib olishga ustasi farangdirlar. Eh, laʼnatga uchragurlar! 15 Ular toʻgʻri yoʻlni tark etdilar, Bavoʻr oʻgʻli Balom yoʻlidan borib, gumroh boʻldilar. Balom harom yoʻl bilan pul topishni xush koʻrgandi. 16 Lekin bu gunohi uchun taʼzirini yedi. Tilsiz eshak tilga kirib, inson ovozi bilan paygʻambarning ahmoqligiga chek qoʻydi.
17 Bu soxta ustozlar bamisoli suvsiz quduqdirlar, shamolda tez gʻoyib boʻladigan tuman kabidirlar. Ular uchun tim qorongʻi zulmat tayyorlab qoʻyilgan. 18 Chunki ular notoʻgʻri yoʻldan zoʻrgʻa qochib qutulgan imonlilarni yana axloqsizlik domiga tortadilar. Dabdabali, ammo tentaksimon gaplari bilan ularni avrab, nafslarini qoʻzgʻatadilar. 19 Ularga: “Erkin boʻlasizlar”, deya vaʼda beradilar, holbuki, oʻzlari gunoh qulidirlar. Axir, odam nimadan yengilsa, oʻshaning quli boʻlar, deb bejiz aytilmagan.
20 Rabbimizu najotkorimiz boʻlgan Iso Masihni tanib, dunyoning qabohatlaridan qochib qutulgan odamlar yana eski qiliqlariga qaytib, qabihlikka magʻlub boʻlishsa, ularning soʻnggi ahvoli oldingidan ham battar boʻladi. 21 Solihlik yoʻlini bilgandan keyin, ularga topshirilgan muqaddas amrlardan yuz oʻgirgandan koʻra, bu yoʻlni hech bilmagani oʻzlari uchun yaxshiroq boʻlar edi. 22 Bunday odamlarga mana shu maqol aynan toʻgʻri keladi:
“It oʻz qusugʻiga qaytar ,
Yuvilgan choʻchqa esa balchiqqa.”
2–БОБ
Сохта устозларнинг гуноҳи ва жазоси
1 Исроил халқи орасида сохта пайғамбарлар бўлгани каби, сизларнинг орангизда ҳам сохта устозлар бўлади. Улар найранг ишлатиб, орангизда ҳалокатли бидъатлар тарқатадилар. Ҳатто уларнинг жонларини сотиб олган Хўжайинини ҳам рад этиб, бу билан ўзларини муқаррар кулфатга йўлиқтирадилар. 2 Кўп одамлар уларга тақлид қилиб, ахлоқсиз ҳаёт кечирадилар. Уларнинг дастидан имонсизлар ҳақиқат йўлини ёмонлайдилар. 3 Бу тамагир устозлар тўқиб чиқарган гаплари билан сизларни йўлдан оздирадилар, сўнг пулингизни шилиб оладилар. Аммо Худо бундай одамларни анча олдин ўлимга маҳкум қилиб қўйган. У мудрамайди, уларнинг ҳалокатини кечиктирмайди.
4 Худо ҳатто гуноҳ қилган фаришталарни ҳам аямаган. Қиёмат кунигача уларни тубсиз чуқурликдаги зулматга занжирбанд қилиб қўйган. 5 Худо қадимги дунёни ҳам аямай, бетавфиқлар устига тўфон келтирди. У фақат солиҳлик жарчиси бўлган Нуҳни ва бошқа етти кишини омон сақлади. 6 Худо Садўм ва Ғамўра шаҳарларини ҳалокатга маҳкум этди. Худосизларга сабоқ бўлсин деб, бу шаҳарларни куйдириб кул қилди. 7 Бебош одамларнинг ўтакетган ахлоқсизликларидан азоб чеккан солиҳ Лутни эса қутқарди. 8 Ўша халқ орасида яшаган бу солиҳ одам ҳар куни уларнинг қабиҳ ишларини кўриб эшитгани учун ичидан эзилиб қийналар эди. 9 Бу мисоллар қуйидагиларни англатади: Эгамиз тақводорларни кулфатлардан қутқара олади, бетавфиқларни эса қиёмат кунидаги азоблар учун сақлайди. 10 Айниқса, шаҳвоний ҳирсга берилиб, ўз танасини булғатувчи, илоҳий ҳокимиятни эса рад қилувчи одамларни У жазолайди.
Дарвоқе, орангиздаги сохта устозлар ҳам илоҳий ҳокимиятни рад қиляптилар, улар сурбет ва такаббурдирлар. Улар самовий мавжудотлардан қўрқмайдилар, уларни назарга ҳам илмайдилар. 11 Фаришталар ўша ёвуз мавжудотлардан кучлироқ ва қудратлироқ бўлишларига қарамай, Эгамизнинг ҳузурида мавжудотларни ҳақоратламайдилар, ҳукм ҳам қилмайдилар. 12 Аммо бу сохта устозлар ёввойи ҳайвонларга ўхшайдилар, улар фақат туғма ҳис–туйғуларига берилиб яшайдилар. Ўзлари англаб етмайдиган ёвуз мавжудотларни менсимай юрибдилар. Бироқ улар ўша мавжудотлар билан бирга ҳалок бўладилар, ҳайвонлар сингари овланиб, йўқ қилинадилар.
13 Сохта устозларнинг қилган ноҳақликлари ўзларининг бошига етади. Ахир, улар куппа–кундузи айш–ишрат қилишни хуш кўрадилар, жамоатингиз шаънига доғ туширадилар. Сизлар таом ейиш учун бирга йиғилганингизда, Раббимиз Исони хотирлаш учун нон синдирганингизда, улар орангизда ўтириб, кайфу сафо қиладилар. Бузуқлиги билан бошқаларни йўлдан урадилар. 14 Кўзлари доимо шаҳват билан ёнади, гуноҳ қилиб тўймайдилар. Улар имонда суст кишиларни овлаб, йўлдан оздирадилар. Бу сохта устозлар истаган нарсасини ундириб олишга устаси фарангдирлар. Эҳ, лаънатга учрагурлар! 15 Улар тўғри йўлни тарк этдилар, Бавўр ўғли Балом йўлидан бориб, гумроҳ бўлдилар. Балом ҳаром йўл билан пул топишни хуш кўрганди. 16 Лекин бу гуноҳи учун таъзирини еди. Тилсиз эшак тилга кириб, инсон овози билан пайғамбарнинг аҳмоқлигига чек қўйди.
17 Бу сохта устозлар бамисоли сувсиз қудуқдирлар, шамолда тез ғойиб бўладиган туман кабидирлар. Улар учун тим қоронғи зулмат тайёрлаб қўйилган. 18 Чунки улар нотўғри йўлдан зўрға қочиб қутулган имонлиларни яна ахлоқсизлик домига тортадилар. Дабдабали, аммо тентаксимон гаплари билан уларни авраб, нафсларини қўзғатадилар. 19 Уларга: “Эркин бўласизлар”, дея ваъда берадилар, ҳолбуки, ўзлари гуноҳ қулидирлар. Ахир, одам нимадан енгилса, ўшанинг қули бўлар, деб бежиз айтилмаган.
20 Раббимизу нажоткоримиз бўлган Исо Масиҳни таниб, дунёнинг қабоҳатларидан қочиб қутулган одамлар яна эски қилиқларига қайтиб, қабиҳликка мағлуб бўлишса, уларнинг сўнгги аҳволи олдингидан ҳам баттар бўлади. 21 Солиҳлик йўлини билгандан кейин, уларга топширилган муқаддас амрлардан юз ўгиргандан кўра, бу йўлни ҳеч билмагани ўзлари учун яхшироқ бўлар эди. 22 Бундай одамларга мана шу мақол айнан тўғри келади:
“Ит ўз қусуғига қайтар ,
Ювилган чўчқа эса балчиққа.”
