6–BOB
Ahd sandigʻi Isroilga qaytib keladi
1 Egamizning Sandigʻi Filistlar hududida yetti oy qolib ketdi. 2 Filistlar oʻzlarining ruhoniylari va folbinlarini chaqirib:
— Isroil Xudosining Sandigʻini nima qilamiz, uni oʻz yeriga qanday qaytaramiz? Bizga oʻrgating, — deyishdi. 3 Ruhoniylar bilan folbinlar shunday javob berdilar:
— Sandiqni orqaga qaytaradigan boʻlsangizlar, boʻsh qaytarmanglar. Isroil xalqining Xudosiga albatta aybingizni yuvadigan nazr atanglar. Oʻshanda shifo topib, Xudo nima uchun sizlarni jazolayotganini bilib olasizlar.
4 — Aybimizni yuvish uchun Unga nimani nazr qilamiz? — deb soʻrashdi Filistlar. Ruhoniylar va folbinlar shunday javob berishdi:
— Aybingizni yuvadigan nazr, Filist beklarining miqdoricha — oltindan qilingan beshta chipqon va beshta sichqon boʻlsin. Chunki balo–qazo sizlarning hammangiz uchun ham, beklaringiz uchun ham baravardir. 5 Shuning uchun chipqonlarning va mamlakatga qirgʻin keltirgan sichqonlarning haykalchalarini yasang, shu tariqa Isroil xalqining Xudosini sharaflang. Balki ana shunda oʻzlaringizga, xudolaringizga va yurtingizga kelgan balo–qazoni U yengillatar. 6 Nimaga Misrliklarga va firʼavnga oʻxshab oʻjarlik qilasizlar? Esingizda yoʻqmi, Isroil xalqining Xudosi Misrliklarni rosa ezgandan keyingina, ular Isroil xalqini oʻz yoʻliga qoʻyib yubordilar–ku! 7 Endi bitta yangi arava bilan hali hech boʻyinturuq solinmagan ikkita sogʻin sigir hozirlanglar. Sigirlarni aravaga qoʻshinglar, buzoqlarini esa sigirlardan ayirib, ogʻilxonaga olib boringlar. 8 Sandiqni aravaga yuklanglar, ayblaringizni yuvadigan nazrlarni — Isroil xalqining Xudosiga atab yasalgan oltin haykalchalarni bir qutiga joylashtiringlar. Oʻsha qutini Sandiqning yoniga qoʻyinglar. Keyin aravani qoʻyib yuboringlar, oʻz yoʻliga ketsin. 9 Aravaning orqasidan kuzatib boringlar. Agar sigirlar bizning yurtimiz chegarasidan oʻtib, Bayt–Shamash shahriga boradigan yoʻldan ketsa, demak, boshimizga bunday katta kulfatni solgan Isroil xalqining Xudosidir. Agarda shunday boʻlmasa, bu kulfat bizga Undan kelmaganini, balki bir tasodif boʻlganini bilib olamiz.
10 Odamlar aytilganday qilishdi. Ikki sogʻin sigir keltirib, aravaga qoʻshishdi, buzoqlarni esa ogʻilxonaga qamab qoʻyishdi. 11 Egamizning Sandigʻini, shuningdek, ichiga oltin sichqonlar va chipqonlarning haykalchalari solingan qutini aravaga yuklashdi. 12 Sigirlar toʻppa–toʻgʻri Bayt–Shamash yoʻlidan ketdi. Oʻngga ham, chapga ham burilmay, boʻkirganicha, katta yoʻl boʻylab ilgarilab ketaverdi. Filist beklari aravani Bayt–Shamash chegarasigacha kuzatib borishdi.
13 Oʻsha paytda Bayt–Shamash aholisi vodiyda bugʻdoy oʻrayotgan edi . Ular Sandiqni koʻrib, sevinib ketishdi. 14-15 Arava Bayt–Shamashlik Yoshuaning dalasiga yetib kelib, toʻxtab qoldi. Oʻsha yerda katta bir tosh bor edi. Levilar Egamizning Sandigʻini va yonidagi oltin haykalchalar joylangan qutini aravadan tushirib, oʻsha katta toshning ustiga qoʻyishdi. Bayt–Shamash aholisi aravaning yogʻochlarini oʻtin qilib yordi. Sigirlarni esa Egamizga kuydiriladigan qurbonlik qilishdi. Oʻsha kuni Bayt–Shamash aholisi Egamizga kuydiriladigan qurbonliklar va boshqa qurbonliklar keltirdi.
16 Beshala Filist beklari boʻlib oʻtgan voqealarni oʻz koʻzlari bilan koʻrib, shu kuni Exronga qaytib ketdilar. 17 Filistlar ayblari uchun Egamizga nazr qilib beshta oltin chipqon haykalchasini joʻnatgan edilar. Hadyalar Ashdod, Gʻazo, Ashqalon, Gat va Exron shaharlarining hokimlaridan edi. 18 Beshta oltin sichqon beshta hukmdor boshqargan Filistlar shaharlarining va ularning atrofidagi qishloqlarning ramzi edi. Bayt–Shamashlik Yoshuaning dalasidagi Egamizning Sandigʻi qoʻyilgan katta tosh shu kungacha bunga guvoh boʻlib turibdi.
19 Bayt–Shamashlik yetmish kishi Egamizning Sandigʻi ichiga qaragan edi, Xudo ularni yoʻq qildi. Egamiz xalqning boshiga ogʻir kulfat keltirgani uchun, Bayt–Shamashliklar motam tutdilar.
Ahd sandigʻi Xirat–Yoʻrimda
20 Bayt–Shamash aholisi shunday dedi:
— Egamiz oldida — bu Muqaddas Xudo oldida kim bardosh berishga qodir ekan?! Uning Sandigʻini oʻzimizning oldimizdan qayoqqa joʻnatsak ekan?
21 Nihoyat, ular Xirat–Yoʻrim aholisiga xabarchi joʻnatib: “Filistlar Egamizning Sandigʻini qaytarishdi, kelinglar, uni oʻz shahringizga olib ketinglar” degan gapni yetkazishdi.
6–БОБ
Аҳд сандиғи Исроилга қайтиб келади
1 Эгамизнинг Сандиғи Филистлар ҳудудида етти ой қолиб кетди. 2 Филистлар ўзларининг руҳонийлари ва фолбинларини чақириб:
— Исроил Худосининг Сандиғини нима қиламиз, уни ўз ерига қандай қайтарамиз? Бизга ўргатинг, — дейишди. 3 Руҳонийлар билан фолбинлар шундай жавоб бердилар:
— Сандиқни орқага қайтарадиган бўлсангизлар, бўш қайтарманглар. Исроил халқининг Худосига албатта айбингизни ювадиган назр атанглар. Ўшанда шифо топиб, Худо нима учун сизларни жазолаётганини билиб оласизлар.
4 — Айбимизни ювиш учун Унга нимани назр қиламиз? — деб сўрашди Филистлар. Руҳонийлар ва фолбинлар шундай жавоб беришди:
— Айбингизни ювадиган назр, Филист бекларининг миқдорича — олтиндан қилинган бешта чипқон ва бешта сичқон бўлсин. Чунки бало–қазо сизларнинг ҳаммангиз учун ҳам, бекларингиз учун ҳам баравардир. 5 Шунинг учун чипқонларнинг ва мамлакатга қирғин келтирган сичқонларнинг ҳайкалчаларини ясанг, шу тариқа Исроил халқининг Худосини шарафланг. Балки ана шунда ўзларингизга, худоларингизга ва юртингизга келган бало–қазони У енгиллатар. 6 Нимага Мисрликларга ва фиръавнга ўхшаб ўжарлик қиласизлар? Эсингизда йўқми, Исроил халқининг Худоси Мисрликларни роса эзгандан кейингина, улар Исроил халқини ўз йўлига қўйиб юбордилар–ку! 7 Энди битта янги арава билан ҳали ҳеч бўйинтуруқ солинмаган иккита соғин сигир ҳозирланглар. Сигирларни аравага қўшинглар, бузоқларини эса сигирлардан айириб, оғилхонага олиб боринглар. 8 Сандиқни аравага юкланглар, айбларингизни ювадиган назрларни — Исроил халқининг Худосига атаб ясалган олтин ҳайкалчаларни бир қутига жойлаштиринглар. Ўша қутини Сандиқнинг ёнига қўйинглар. Кейин аравани қўйиб юборинглар, ўз йўлига кетсин. 9 Араванинг орқасидан кузатиб боринглар. Агар сигирлар бизнинг юртимиз чегарасидан ўтиб, Байт–Шамаш шаҳрига борадиган йўлдан кетса, демак, бошимизга бундай катта кулфатни солган Исроил халқининг Худосидир. Агарда шундай бўлмаса, бу кулфат бизга Ундан келмаганини, балки бир тасодиф бўлганини билиб оламиз.
10 Одамлар айтилгандай қилишди. Икки соғин сигир келтириб, аравага қўшишди, бузоқларни эса оғилхонага қамаб қўйишди. 11 Эгамизнинг Сандиғини, шунингдек, ичига олтин сичқонлар ва чипқонларнинг ҳайкалчалари солинган қутини аравага юклашди. 12 Сигирлар тўппа–тўғри Байт–Шамаш йўлидан кетди. Ўнгга ҳам, чапга ҳам бурилмай, бўкирганича, катта йўл бўйлаб илгарилаб кетаверди. Филист беклари аравани Байт–Шамаш чегарасигача кузатиб боришди.
13 Ўша пайтда Байт–Шамаш аҳолиси водийда буғдой ўраётган эди . Улар Сандиқни кўриб, севиниб кетишди. 14-15 Арава Байт–Шамашлик Ёшуанинг даласига етиб келиб, тўхтаб қолди. Ўша ерда катта бир тош бор эди. Левилар Эгамизнинг Сандиғини ва ёнидаги олтин ҳайкалчалар жойланган қутини аравадан тушириб, ўша катта тошнинг устига қўйишди. Байт–Шамаш аҳолиси араванинг ёғочларини ўтин қилиб ёрди. Сигирларни эса Эгамизга куйдириладиган қурбонлик қилишди. Ўша куни Байт–Шамаш аҳолиси Эгамизга куйдириладиган қурбонликлар ва бошқа қурбонликлар келтирди.
16 Бешала Филист беклари бўлиб ўтган воқеаларни ўз кўзлари билан кўриб, шу куни Эхронга қайтиб кетдилар. 17 Филистлар айблари учун Эгамизга назр қилиб бешта олтин чипқон ҳайкалчасини жўнатган эдилар. Ҳадялар Ашдод, Ғазо, Ашқалон, Гат ва Эхрон шаҳарларининг ҳокимларидан эди. 18 Бешта олтин сичқон бешта ҳукмдор бошқарган Филистлар шаҳарларининг ва уларнинг атрофидаги қишлоқларнинг рамзи эди. Байт–Шамашлик Ёшуанинг даласидаги Эгамизнинг Сандиғи қўйилган катта тош шу кунгача бунга гувоҳ бўлиб турибди.
19 Байт–Шамашлик етмиш киши Эгамизнинг Сандиғи ичига қараган эди, Худо уларни йўқ қилди. Эгамиз халқнинг бошига оғир кулфат келтиргани учун, Байт–Шамашликлар мотам тутдилар.
Аҳд сандиғи Хират–Йўримда
20 Байт–Шамаш аҳолиси шундай деди:
— Эгамиз олдида — бу Муқаддас Худо олдида ким бардош беришга қодир экан?! Унинг Сандиғини ўзимизнинг олдимиздан қаёққа жўнатсак экан?
21 Ниҳоят, улар Хират–Йўрим аҳолисига хабарчи жўнатиб: “Филистлар Эгамизнинг Сандиғини қайтаришди, келинглар, уни ўз шаҳрингизга олиб кетинглар” деган гапни етказишди.
