4–BOB
1 Butun Isroilda Shomuilning soʻzi vojib edi.
Muqaddas Ahd sandigʻi qoʻldan ketadi
Shu orada Filistlar urush boshlagan edi, Isroil lashkari ularga qarshi otlandi. Isroil lashkari Evanzor degan joyda, Filistlar esa Ofoq shahrida qarorgoh qurdilar. 2 Filistlar Isroil lashkariga qarshi saf tortdilar. Jang boshlandi, Filistlar Isroil lashkarini magʻlub qildilar. Jang maydonida toʻrt mingga yaqin Isroil sipohlari nobud boʻldi. 3 Lashkar qarorgohga qaytgach, Isroil oqsoqollari shunday dedilar:
— Nima uchun bugun Egamiz bizni Filistlarga magʻlub qilib berdi? Egamizning Ahd sandigʻini Shiloʻdan bu yerga olib kelaylik. Ahd sandigʻi bizning oramizda borsin, toki bizni gʻanimlarimizning qoʻlidan qutqarsin.
4 Oqsoqollar ikki karub orasida taxt qurgan Sarvari Olamning Ahd sandigʻini Shiloʻdan olib kelish uchun odamlarni yubordilar. Elaxning ikkala oʻgʻli — Xoʻfnax bilan Finxaz ham Xudoning Ahd sandigʻini jang boʻlayotgan joyga olib kelish uchun yordamlashdilar. 5 Egamizning Ahd sandigʻini qarorgohga olib kelishganda, hamma Isroil xalqi shunday baland ovoz bilan baqirishdiki, hatto yer turgan joyidan qoʻzgʻalib ketdi. 6 Filistlar shovqin–suronni eshitib:
— Ibroniylar qarorgohida nega bunchalik qattiq baqir–chaqir boʻlyapti ekan? — deyishdi. Keyin Egamizning Sandigʻini qarorgohga olib kelganlarini bilib, 7 qoʻrqib ketishdi:
— Xudolari qarorgohga kelibdi, endi shoʻrimiz quriydi! Bunaqasini hech qachon eshitmagandik! 8 Oh, shoʻrimiz qursin! Bunday qudratli xudolarning qoʻlidan kim bizni xalos qiladi? Sahroda Misrliklarni har baloga giriftor qilgan xudolar oʻshalar–ku! 9 Dadil boʻling, ey Filistlar! Mard boʻlinglar! Aks holda, ibroniylar sizlarga qanday boʻysungan boʻlsalar, sizlar ham ularga shunday boʻysunib qolasizlar. Shuning uchun mardona kurashib, jang qilinglar!
10 Shundan soʻng Filistlar qattiq hujum qilib, Isroil lashkarini magʻlub etdilar. Isroil lashkarining bari uylariga qochib qoldi. Isroil lashkari shunchalik katta talafot koʻrdiki, ular oʻttiz ming piyoda sipohidan ayrildi. 11 Xudoning Sandigʻi ham qoʻldan ketdi, Elaxning ikkala oʻgʻli — Xoʻfnax bilan Finxaz esa halok boʻldi.
Elaxning oʻlimi
12 Benyaminlik bir odam jang maydonidan qochib, oʻsha kuniyoq Shiloʻga yetib keldi. U qaygʻudan kiyimlarini yirtgan, boshiga tuproq sochgan edi. 13 Oʻsha odam Shiloʻga yetib kelganda, Elax Xudoning Sandigʻiga biror narsa boʻlishidan xavotirlanib, yoʻl yoqasida kursida kutib oʻtirgan edi. Haligi odam shaharga kirib, boʻlib oʻtgan voqealarni aytib bergan edi, butun shahar ahli dod–faryod koʻtardi. 14 Elax shovqin–suronni eshitib:
— Nimaga bunchalik shovqin? — deb soʻradi. Oʻsha odam, boʻlgan voqeadan Elaxni xabardor qilib qoʻyay deb, darrov uning yoniga keldi. 15 Oʻsha paytda Elax toʻqson sakkiz yoshda boʻlib, koʻzlari xiralashgan, yaxshi koʻra olmasdi. 16 Haligi kishi Elaxga:
— Men jang maydonidan kelyapman, u yerdan bugun qochib keldim, — dedi.
— Nima boʻldi, oʻgʻlim? — deb soʻradi Elax. 17 Xabar keltirgan odam shunday dedi:
— Isroil lashkari Filistlarning oldiga tushib qochdi. Lashkar katta talafot koʻrdi. Ikkala oʻgʻlingiz — Xoʻfnax bilan Finxaz ham halok boʻldi. Xudoning Sandigʻi esa qoʻldan ketdi.
18 Elax hali ham darvoza yonidagi kursida oʻtirgan edi. Xabarchi, Xudoning Sandigʻini Filistlar tortib oldi, deb aytishi bilan Elax kursidan orqasi bilan yiqildi. Keksaligi va semizligidan boʻyni sinib, oʻsha zahoti jon berdi. U Isroilda qirq yil hakamlik qilgan edi.
Finxazning xotini vafot etadi
19 Elaxning kelini — Finxazning xotini homilador boʻlib, yaqin orada koʻzi yorishi kerak edi. “Xudoning Sandigʻi qoʻldan ketdi, qaynatang va ering oʻldi” degan xabarni eshitishi bilanoq uni toʻlgʻoq tutib qoldi. U yerga choʻnqayib oʻtirib, tugʻib qoʻydi. 20 Doya xotinlar unga oʻlimi oldidan:
— Qoʻrqma, oʻgʻil tugʻding, — dedilar. Lekin u eʼtibor bermadi, biror soʻz ham aytmadi. 21 Xudoning Sandigʻi qoʻldan ketgani uchun, qaynatasi bilan eri oʻlgani uchun u:
— Isroildan ulugʻvorlik ketdi, — deya chaqaloqqa Ixabod deb ism qoʻydi. 22 Keyin u yana:
— Xudoning Sandigʻi qoʻldan ketdi, Isroildan ulugʻvorlik ketdi, — dedi.
4–БОБ
1 Бутун Исроилда Шомуилнинг сўзи вожиб эди.
Муқаддас Аҳд сандиғи қўлдан кетади
Шу орада Филистлар уруш бошлаган эди, Исроил лашкари уларга қарши отланди. Исроил лашкари Эванзор деган жойда, Филистлар эса Офоқ шаҳрида қароргоҳ қурдилар. 2 Филистлар Исроил лашкарига қарши саф тортдилар. Жанг бошланди, Филистлар Исроил лашкарини мағлуб қилдилар. Жанг майдонида тўрт мингга яқин Исроил сипоҳлари нобуд бўлди. 3 Лашкар қароргоҳга қайтгач, Исроил оқсоқоллари шундай дедилар:
— Нима учун бугун Эгамиз бизни Филистларга мағлуб қилиб берди? Эгамизнинг Аҳд сандиғини Шилўдан бу ерга олиб келайлик. Аҳд сандиғи бизнинг орамизда борсин, токи бизни ғанимларимизнинг қўлидан қутқарсин.
4 Оқсоқоллар икки каруб орасида тахт қурган Сарвари Оламнинг Аҳд сандиғини Шилўдан олиб келиш учун одамларни юбордилар. Элахнинг иккала ўғли — Хўфнах билан Финхаз ҳам Худонинг Аҳд сандиғини жанг бўлаётган жойга олиб келиш учун ёрдамлашдилар. 5 Эгамизнинг Аҳд сандиғини қароргоҳга олиб келишганда, ҳамма Исроил халқи шундай баланд овоз билан бақиришдики, ҳатто ер турган жойидан қўзғалиб кетди. 6 Филистлар шовқин–суронни эшитиб:
— Ибронийлар қароргоҳида нега бунчалик қаттиқ бақир–чақир бўляпти экан? — дейишди. Кейин Эгамизнинг Сандиғини қароргоҳга олиб келганларини билиб, 7 қўрқиб кетишди:
— Худолари қароргоҳга келибди, энди шўримиз қурийди! Бунақасини ҳеч қачон эшитмагандик! 8 Оҳ, шўримиз қурсин! Бундай қудратли худоларнинг қўлидан ким бизни халос қилади? Саҳрода Мисрликларни ҳар балога гирифтор қилган худолар ўшалар–ку! 9 Дадил бўлинг, эй Филистлар! Мард бўлинглар! Акс ҳолда, ибронийлар сизларга қандай бўйсунган бўлсалар, сизлар ҳам уларга шундай бўйсуниб қоласизлар. Шунинг учун мардона курашиб, жанг қилинглар!
10 Шундан сўнг Филистлар қаттиқ ҳужум қилиб, Исроил лашкарини мағлуб этдилар. Исроил лашкарининг бари уйларига қочиб қолди. Исроил лашкари шунчалик катта талафот кўрдики, улар ўттиз минг пиёда сипоҳидан айрилди. 11 Худонинг Сандиғи ҳам қўлдан кетди, Элахнинг иккала ўғли — Хўфнах билан Финхаз эса ҳалок бўлди.
Элахнинг ўлими
12 Беняминлик бир одам жанг майдонидан қочиб, ўша куниёқ Шилўга етиб келди. У қайғудан кийимларини йиртган, бошига тупроқ сочган эди. 13 Ўша одам Шилўга етиб келганда, Элах Худонинг Сандиғига бирор нарса бўлишидан хавотирланиб, йўл ёқасида курсида кутиб ўтирган эди. Ҳалиги одам шаҳарга кириб, бўлиб ўтган воқеаларни айтиб берган эди, бутун шаҳар аҳли дод–фарёд кўтарди. 14 Элах шовқин–суронни эшитиб:
— Нимага бунчалик шовқин? — деб сўради. Ўша одам, бўлган воқеадан Элахни хабардор қилиб қўяй деб, дарров унинг ёнига келди. 15 Ўша пайтда Элах тўқсон саккиз ёшда бўлиб, кўзлари хиралашган, яхши кўра олмасди. 16 Ҳалиги киши Элахга:
— Мен жанг майдонидан келяпман, у ердан бугун қочиб келдим, — деди.
— Нима бўлди, ўғлим? — деб сўради Элах. 17 Хабар келтирган одам шундай деди:
— Исроил лашкари Филистларнинг олдига тушиб қочди. Лашкар катта талафот кўрди. Иккала ўғлингиз — Хўфнах билан Финхаз ҳам ҳалок бўлди. Худонинг Сандиғи эса қўлдан кетди.
18 Элах ҳали ҳам дарвоза ёнидаги курсида ўтирган эди. Хабарчи, Худонинг Сандиғини Филистлар тортиб олди, деб айтиши билан Элах курсидан орқаси билан йиқилди. Кексалиги ва семизлигидан бўйни синиб, ўша заҳоти жон берди. У Исроилда қирқ йил ҳакамлик қилган эди.
Финхазнинг хотини вафот этади
19 Элахнинг келини — Финхазнинг хотини ҳомиладор бўлиб, яқин орада кўзи ёриши керак эди. “Худонинг Сандиғи қўлдан кетди, қайнатанг ва эринг ўлди” деган хабарни эшитиши биланоқ уни тўлғоқ тутиб қолди. У ерга чўнқайиб ўтириб, туғиб қўйди. 20 Доя хотинлар унга ўлими олдидан:
— Қўрқма, ўғил туғдинг, — дедилар. Лекин у эътибор бермади, бирор сўз ҳам айтмади. 21 Худонинг Сандиғи қўлдан кетгани учун, қайнатаси билан эри ўлгани учун у:
— Исроилдан улуғворлик кетди, — дея чақалоққа Ихабод деб исм қўйди. 22 Кейин у яна:
— Худонинг Сандиғи қўлдан кетди, Исроилдан улуғворлик кетди, — деди.
