3–BOB
1 Qaranglar, Otamiz Xudo bizni farzandlarim deb, qanday buyuk bir sevgini koʻrsatdi! Haqiqatan ham, biz Uning farzandlarimiz. Dunyo Otamizni hech qachon tan olmagan, shuning uchun bizni ham Xudoning farzandlari deb tan olmayapti. 2 Ha, azizlarim, hozir biz Xudoning farzandlarimiz. Ammo kelajakda kim boʻlishimiz bizga hanuz ochilmagan. Faqat shuni bilamizki, oʻsha payt kelganda, biz Xudo singari boʻlamiz, chunki Xudoning Oʻzini koʻramiz. 3 Xudoga bunday umid bogʻlagan har bir odam Iso Masih singari pok boʻlishi uchun oʻzini poklaydi.
4 Gunoh qiluvchi har qanday odam Xudoga qarshi bosh koʻtargan boʻladi, chunki gunoh Xudoga qarshi bosh koʻtarmoq demakdir. 5 Masih esa gunohlarimizni yuvish uchun kelganini bilasizlar. Unda gunoh yoʻqligi oʻzingizga ayon. 6 Masih bilan yashagan har bir odam gunohdan yuz oʻgiradi. Gunoh qilib yurgan odam esa, Masihni koʻrmagan ham, tanimagan ham.
7 Aziz bolalarim , hech kim sizlarni aldamasin. Adolatli ish qiluvchi har qanday odam xuddi Masih singari odildir. 8 Gunoh qiluvchi esa iblis zotidandir. Chunki iblis azaldan gunoh qilib kelyapti. Ammo Xudoning Oʻgʻli iblisning ishlarini barbod qilish uchun keldi. 9 Xudoning bolalari gunoh qilmaydi, chunki Xudoning hayotbaxsh kuchi ularning ichidadir. Ular Xudoning bolalari boʻlganlari uchun gunohda yashamaydilar. 10 Adolatli ish qilmagan va oʻz birodarini sevmagan odam esa Xudodan emas. Demak, iblis bolalari bilan Xudo bolalarining farqi ana shundadir.
Bir–birimizni yaxshi koʻraylik!
11 Sizlar boshidan eshitgan kalom shu: bir–birimizni yaxshi koʻraylik! 12 Yovuz shayton zoti boʻlgan Qobilga oʻxshamaylik. U oʻz ukasini oʻldirgandi. Nima uchun ukasini oʻldirdi? Chunki uning ishlari qabih, ukasining ishlari esa toʻgʻri edi.
13 Ey birodarlarim, agar dunyo sizdan nafratlanayotgan boʻlsa, hayratlanmanglar. 14 Biz oʻlimdan hayotga oʻtganimizni bilamiz, chunki birodarlarimizni sevamiz. Birodarini sevmagan odam esa oʻlim iskanjasida qolgan. 15 Birodaridan nafratlangan har qanday kishi qotildir. Hech bir qotil abadiy hayotga ega boʻlmasligini bilasizlar. 16 Masih bizlar uchun jonini fido qildi, ana shundan biz haqiqiy sevgini bildik. Demak, biz ham birodarlarimiz uchun jonimizni fido qilishga burchlimiz. 17 Agar oʻzimizga toʻq boʻlib turib, muhtojlikda yashayotgan birodarimizni koʻrsak–u, unga yordam bermay yuragimizni tosh qilsak, qanday qilib bizda Xudoning sevgisi joy oladi?!
18 Aziz bolalarim, biz haqiqiy sevgimizni quruq gap bilan emas, amalda koʻrsataylik. 19-20 Shunda biz haqiqat ahli ekanimizga ishonch hosil qilamiz. Hattoki vijdonimiz qiynalganda ham “Xudo hamma narsani biladi, U vijdonimizdan ham ulugʻ” degan haqiqat bilan Xudoning huzurida oʻzimizni tinchlantira olamiz. 21 Agar vijdonimiz bizni qiynamasa, ey azizlarim, Xudo oldida dadil boʻlamiz 22 va Undan nima soʻrasak, U beradi. Chunki biz Uning amrlarini bajarib, Unga manzur boʻlgan ishlarni qilyapmiz. 23 Xudoning amri esa Uning Oʻgʻli Iso Masihga ishonishdan va Masih buyurganidek, bir–birimizni sevishdan iboratdir. 24 Xudoning amrlarini bajargan odam Xudo bilan birga va Xudo u bilan birga yashaydi. Xudo biz bilan yashayotganini U har birimizga bergan Ruhidan bilamiz.
3–БОБ
1 Қаранглар, Отамиз Худо бизни фарзандларим деб, қандай буюк бир севгини кўрсатди! Ҳақиқатан ҳам, биз Унинг фарзандларимиз. Дунё Отамизни ҳеч қачон тан олмаган, шунинг учун бизни ҳам Худонинг фарзандлари деб тан олмаяпти. 2 Ҳа, азизларим, ҳозир биз Худонинг фарзандларимиз. Аммо келажакда ким бўлишимиз бизга ҳануз очилмаган. Фақат шуни биламизки, ўша пайт келганда, биз Худо сингари бўламиз, чунки Худонинг Ўзини кўрамиз. 3 Худога бундай умид боғлаган ҳар бир одам Исо Масиҳ сингари пок бўлиши учун ўзини поклайди.
4 Гуноҳ қилувчи ҳар қандай одам Худога қарши бош кўтарган бўлади, чунки гуноҳ Худога қарши бош кўтармоқ демакдир. 5 Масиҳ эса гуноҳларимизни ювиш учун келганини биласизлар. Унда гуноҳ йўқлиги ўзингизга аён. 6 Масиҳ билан яшаган ҳар бир одам гуноҳдан юз ўгиради. Гуноҳ қилиб юрган одам эса, Масиҳни кўрмаган ҳам, танимаган ҳам.
7 Азиз болаларим , ҳеч ким сизларни алдамасин. Адолатли иш қилувчи ҳар қандай одам худди Масиҳ сингари одилдир. 8 Гуноҳ қилувчи эса иблис зотидандир. Чунки иблис азалдан гуноҳ қилиб келяпти. Аммо Худонинг Ўғли иблиснинг ишларини барбод қилиш учун келди. 9 Худонинг болалари гуноҳ қилмайди, чунки Худонинг ҳаётбахш кучи уларнинг ичидадир. Улар Худонинг болалари бўлганлари учун гуноҳда яшамайдилар. 10 Адолатли иш қилмаган ва ўз биродарини севмаган одам эса Худодан эмас. Демак, иблис болалари билан Худо болаларининг фарқи ана шундадир.
Бир–биримизни яхши кўрайлик!
11 Сизлар бошидан эшитган калом шу: бир–биримизни яхши кўрайлик! 12 Ёвуз шайтон зоти бўлган Қобилга ўхшамайлик. У ўз укасини ўлдирганди. Нима учун укасини ўлдирди? Чунки унинг ишлари қабиҳ, укасининг ишлари эса тўғри эди.
13 Эй биродарларим, агар дунё сиздан нафратланаётган бўлса, ҳайратланманглар. 14 Биз ўлимдан ҳаётга ўтганимизни биламиз, чунки биродарларимизни севамиз. Биродарини севмаган одам эса ўлим исканжасида қолган. 15 Биродаридан нафратланган ҳар қандай киши қотилдир. Ҳеч бир қотил абадий ҳаётга эга бўлмаслигини биласизлар. 16 Масиҳ бизлар учун жонини фидо қилди, ана шундан биз ҳақиқий севгини билдик. Демак, биз ҳам биродарларимиз учун жонимизни фидо қилишга бурчлимиз. 17 Агар ўзимизга тўқ бўлиб туриб, муҳтожликда яшаётган биродаримизни кўрсак–у, унга ёрдам бермай юрагимизни тош қилсак, қандай қилиб бизда Худонинг севгиси жой олади?!
18 Азиз болаларим, биз ҳақиқий севгимизни қуруқ гап билан эмас, амалда кўрсатайлик. 19-20 Шунда биз ҳақиқат аҳли эканимизга ишонч ҳосил қиламиз. Ҳаттоки виждонимиз қийналганда ҳам “Худо ҳамма нарсани билади, У виждонимиздан ҳам улуғ” деган ҳақиқат билан Худонинг ҳузурида ўзимизни тинчлантира оламиз. 21 Агар виждонимиз бизни қийнамаса, эй азизларим, Худо олдида дадил бўламиз 22 ва Ундан нима сўрасак, У беради. Чунки биз Унинг амрларини бажариб, Унга манзур бўлган ишларни қиляпмиз. 23 Худонинг амри эса Унинг Ўғли Исо Масиҳга ишонишдан ва Масиҳ буюрганидек, бир–биримизни севишдан иборатдир. 24 Худонинг амрларини бажарган одам Худо билан бирга ва Худо у билан бирга яшайди. Худо биз билан яшаётганини У ҳар биримизга берган Руҳидан биламиз.
