1–BOB
Muqaddima: Hayot kalomi
1 Boshidan ayon boʻlgan Hayot kalomi haqida biz sizlarga xabar bermoqchimiz. Koʻrib eshitganlarimizni, ha, oʻz koʻzimiz bilan koʻrib, oʻz qoʻllarimiz bilan paypaslab koʻrganlarimizni sizlarga maʼlum qilmoqchimiz. 2 Otamiz Xudoning huzurida boʻlgan Hayot bizga oshkor boʻldi! Biz bu abadiy Hayotni koʻrib, endi U haqda sizlarga shohidlik qilyapmiz. 3 Koʻrgan–eshitganlarimizni maʼlum qilish orqali sizlar bilan birodar boʻlib yashamoqchimiz. Zero, oʻzimiz ham Otamiz Xudo va Uning Oʻgʻli Iso Masih bilan yashayapmiz. 4 Bularni sizlarga qalbimiz shodlikka toʻlsin deb, yozyapmiz.
Nurda yashash toʻgʻrisida
5 Biz Iso Masihdan eshitib, sizlarga yetkazayotgan Xushxabarimiz shundan iborat: Xudo — nur, Unda hech qanday zulmat yoʻq. 6 Agar biz Xudo bilan yashayapmiz deb turib, oldingiday zulmatda yashasak, yolgʻon gapirib, haqiqatga xilof ish qilgan boʻlamiz. 7 Bordi–yu, Xudo singari nurda yashasak, biz birodarlarimiz bilan uygʻunlikda yashaymiz va Xudo Oʻz Oʻgʻli Isoning qoni orqali bizni har qanday gunohdan poklaydi.
8 Agar gunohimiz yoʻq desak, oʻzimizni oʻzimiz aldagan boʻlamiz va bizda haqiqat boʻlmaydi. 9 Bordi–yu, gunohlarimizni eʼtirof etsak, sodiq va adolatli boʻlgan Xudo gunohlarimizni kechirib, bizni har qanday yomonlikdan forigʻ qiladi.
10 Agar gunoh qilganimiz yoʻq desak, Xudoni yolgʻonchiga chiqargan boʻlamiz. Demak, Uning kalomi qalbimizdan joy olmagan boʻladi.
1–БОБ
Муқаддима: Ҳаёт каломи
1 Бошидан аён бўлган Ҳаёт каломи ҳақида биз сизларга хабар бермоқчимиз. Кўриб эшитганларимизни, ҳа, ўз кўзимиз билан кўриб, ўз қўлларимиз билан пайпаслаб кўрганларимизни сизларга маълум қилмоқчимиз. 2 Отамиз Худонинг ҳузурида бўлган Ҳаёт бизга ошкор бўлди! Биз бу абадий Ҳаётни кўриб, энди У ҳақда сизларга шоҳидлик қиляпмиз. 3 Кўрган–эшитганларимизни маълум қилиш орқали сизлар билан биродар бўлиб яшамоқчимиз. Зеро, ўзимиз ҳам Отамиз Худо ва Унинг Ўғли Исо Масиҳ билан яшаяпмиз. 4 Буларни сизларга қалбимиз шодликка тўлсин деб, ёзяпмиз.
Нурда яшаш тўғрисида
5 Биз Исо Масиҳдан эшитиб, сизларга етказаётган Хушхабаримиз шундан иборат: Худо — нур, Унда ҳеч қандай зулмат йўқ. 6 Агар биз Худо билан яшаяпмиз деб туриб, олдингидай зулматда яшасак, ёлғон гапириб, ҳақиқатга хилоф иш қилган бўламиз. 7 Борди–ю, Худо сингари нурда яшасак, биз биродарларимиз билан уйғунликда яшаймиз ва Худо Ўз Ўғли Исонинг қони орқали бизни ҳар қандай гуноҳдан поклайди.
8 Агар гуноҳимиз йўқ десак, ўзимизни ўзимиз алдаган бўламиз ва бизда ҳақиқат бўлмайди. 9 Борди–ю, гуноҳларимизни эътироф этсак, содиқ ва адолатли бўлган Худо гуноҳларимизни кечириб, бизни ҳар қандай ёмонликдан фориғ қилади.
10 Агар гуноҳ қилганимиз йўқ десак, Худони ёлғончига чиқарган бўламиз. Демак, Унинг каломи қалбимиздан жой олмаган бўлади.
