Bible — Bible Society of Uzbekistan

4–BOB

Muso Isroil xalqini Xudoga itoat qilishga undaydi

1 Endi, ey Isroil, men sizlarga farmonlar va qonun–qoidalarni oʻrgataman. Ularga rioya qilinglar. Shunda yashaysizlar, ota–bobolaringizning Xudosi — Egangiz sizlarga berayotgan yerni mulk qilib olasizlar. 2 Men sizlarga aytayotgan amrlarga hech narsa qoʻshmanglar, hech narsa olib ham tashlamanglar. Men sizlarga berayotgan Egangiz Xudoning amrlariga rioya qilinglar. 3 Egamiz Piyor togʻida nimalar qilganini oʻz koʻzlaringiz bilan koʻrdingizlar. Piyordagi Baalga sajda qilgan hammani Egangiz Xudo yoʻq qilgan edi. 4 Egangiz Xudoga sodiq boʻlganlar esa bugun ham tirikdir.

5 Egam Xudo amr qilganday, sizlarga farmonlarni va qonun–qoidalarni oʻrgatdim. Mulk qilib olayotgan oʻsha yurtda bularga rioya qilinglar. 6 Mana shu farmonlar va qonun–qoidalarni bitta qoldirmay bajaringlar, toki sizlarning aql–idrokingizni boshqa xalqlar koʻrsin. Ular bu qonunlar haqida eshitib: “Ha, haqiqatan bu buyuk xalq dono, aql–idroklidir”, deb aytsin.

7 Egamiz Xudoga har safar iltijo qilganimizda U bizga yaqindir. Qaysi buyuk xalqning shunday xudosi bor?! 8 Bugun men sizlarga farmonlar va qonun–qoidalar beryapman. Qaysi buyuk xalqning shunday adolatli qonun–qoidalari bor?! 9 Faqat hushyor boʻlinglar. Koʻzlaringiz bilan koʻrganlaringizni unutmay, bir umr yuragingizda saqlanglar. Bularni oʻgʻillaringizga, nevara–chevaralaringizga ham aytib beringlar. 10 Sizlar Sinay togʻida , Egangiz Xudo oldida turgan kuningizni eslanglar. Oʻsha kuni Egamiz menga aytgandi: “Mening huzurimga xalqni yigʻ. Ular soʻzlarimni eshitib, yer yuzida butun umrlari davomida Mendan qoʻrqishni oʻrgansinlar, bolalariga ham oʻrgatsinlar.”

11 Sizlar yaqin kelib, togʻning etagida turdingizlar. Togʻ esa osmongacha koʻtarilgan olovga burkanib, qop–qora bulutlar bilan qoplangan edi. 12 Egamiz olov ichidan sizlarga gapirdi. Sizlar Uning soʻzlarini eshitdingizlar, qiyofasini esa koʻrmadingizlar. Faqat Egamizning ovozi eshitilar edi, xolos. 13 U Oʻz ahdini sizlarga ayon qilib, bu ahdni — oʻnta amrni bajaringlar, deb farmon berdi. Egamiz ularni ikki tosh lavhaga yozdi. 14 Iordanni kechib, mulk qilib oladigan yurtda bajarishingiz kerak boʻlgan farmonlar va qonun–qoidalarni men sizlarga oʻrgatishimni Egamiz buyurdi.

Butparastlik haqida ogohlantirish

15 Sinay togʻida Egamiz olov ichidan sizlarga gapirganda, sizlar biron qiyofa koʻrmadingizlar. Shuning uchun ehtiyot boʻlinglar. 16 Yana yoʻldan ozib, oʻzingizga erkak yo ayol qiyofasidagi butni, 17 yerda yashaydigan jonivor yo osmonda uchib yuruvchi qush qiyofasidagi butni, 18 yerda sudralib yuruvchi jonivor yoki suvdagi baliq qiyofasidagi hech qanday butni yasamanglar. 19 Shuningdek, osmonga qarab, quyosh, oy va yulduzlarni, jamiki samoviy jismlarni koʻrib vasvasaga tushmanglar, ularga sigʻinmanglar, xizmat qilmanglar. Axir, Egamiz Xudo bularni dunyoda yashovchi barcha xalqlar uchun berdi. 20 Sizlarni esa Egamiz Oʻzi uchun tanlab oldi. Bugungiday Uning xalqi boʻlishingiz uchun sizlarni Misrdan — temir oʻchoq ichidan olib chiqdi. 21 Egamiz sizlarning dastingizdan mendan gʻazablandi : “Men Isroil xalqiga mulk qilib beradigan Iordanning narigi tomonidagi oʻsha hosildor yurtga sen kirmaysan”, — deb qasam ichdi. 22 Men Iordanning narigi tomoniga oʻtolmayman, mana shu yerda vafot etaman. Sizlar esa Iordandan oʻtib, oʻsha hosildor yurtni mulk qilib olasizlar. 23 Shunday ekan, ehtiyot boʻlinglar, Egangiz Xudo sizlar bilan qilgan ahdni esdan chiqarmanglar. U taqiqlagan qiyofadagi birorta butni oʻzlaringizga yasamanglar. 24 Axir, Egangiz Xudo yamlamay yutadigan olovdir, U rashkchi Xudodir .

25 Oʻsha yurtda koʻp yashaysizlar, bolalaringiz, nabiralaringiz tugʻiladi. Agar oʻshanda yoʻldan ozsangiz, Egangiz Xudoning oldida qabihlik qilib, oʻzingizga turli qiyofadagi butlarni yasasangiz, U gʻazablanadi. 26 Bugun sizlarga qarshi yeru osmonni guvoh qilaman: agar menga itoatsizlik qilsangiz, yurtdan tez orada butunlay qirilib ketasizlar. Iordanni kechib, mulk qilib oladigan yurtda uzoq yashamaysizlar. Bittangiz qolmay halok boʻlasizlar. 27 Egamiz sizlarni boshqa xalqlarning orasiga tarqatib yuboradi. Oʻsha xalqlar orasida ayrimlaringiz omon qolasizlar. 28 U yerda inson qoʻli bilan yasalgan yogʻoch va tosh xudolarga xizmat qilasizlar. U xudolar koʻrolmaydi, eshitolmaydi, ovqat yeya olmaydi, hid bilmaydi. 29 Ammo u yerda Egangiz Xudoga yuz bursangiz, butun qalbingiz bilan, jonu dilingiz bilan Uni izlasangiz, topasizlar. 30 Kulfatda qolganingizda, boshingizga koʻrgiliklar tushganda, oxiri Egangiz Xudoga qaytasizlar, Uning soʻziga quloq solasizlar. 31 Oʻshanda U sizlarni tark etmaydi, yoʻq qilmaydi, ota–bobolaringiz bilan qasam ichib qilgan ahdini unutmaydi. Egangiz Xudo rahmdil Xudodir.

32 Endi sizlar dunyoga kelmasdan oldingi uzoq oʻtmishni, Xudo yer yuzida odamni yaratgan davrdan shu kungacha boʻlgan davrni surishtirib koʻringlar. Dunyoning bu chetidan u chetigacha soʻranglar–chi, shu qadar muhim voqea boʻlganmi yoki shunga oʻxshash narsa haqida birortasi eshitganmi?! 33 Sizlarga oʻxshab olov ichidan gapirgan Xudoning ovozini eshitib, tirik qolgan birorta xalq bormi?! 34 Egangiz Xudo sizlar uchun Misrda nimalar qilganini oʻz koʻzingiz bilan koʻrdingiz. Qaysi xudo sinovlar, alomatu moʻjizalar orqali, urush, qudratiyu ajoyibotlari va dahshatli voqealar orqali bir xalqni Oʻzi uchun boshqa xalq orasidan olib chiqqan?! 35 “Egamiz Xudodir, Undan boshqa Xudo yoʻq”, deb anglashingiz uchun bu voqealar sizlarga ayon qilingan. 36 U sizlarga yoʻl–yoʻriq koʻrsatish uchun samodan ovoz berdi. Yer yuzida olov ustuni orqali sizlarga zohir boʻldi. Sizlar oʻsha buyuk olov ichidan Uning ovozini eshitdingizlar. 37 Egamiz Xudo ota–bobolaringizni sevar edi. Shuning uchun oʻzlaridan keyin ularning avlodlarini tanladi. Egamiz zohir boʻlib, Oʻzining buyuk qudrati bilan sizlarni Misrdan olib chiqdi. 38 Egamiz sizlardan kattaroq va kuchliroq xalqlarni oldingizdan haydab, ularning yurtiga sizlarni kiritmoqchi edi, xuddi bugungiday, mulk qilib oladigan yerlaringizni sizlarga bermoqchi edi.

39 Egamiz yeru samodagi Xudodir, Undan boshqa Xudo yoʻqdir. Shuni bugun tan olib, doimo yuragingizda saqlang.

40 Bugun men sizlarga Egamizning farmonlari va amrlarini aytyapman, shularga rioya qilinglar. Shunda oʻzlaringiz ham, naslingiz ham farovon hayot kechirasizlar. Egangiz Xudo abadiy qilib berayotgan oʻsha yurtda uzoq yashaysizlar.

Iordanning sharqidagi panoh shaharlar

41 Shundan keyin Muso Iordan daryosining sharq tomonida uchta shaharni ajratdi. 42 Agar kimdir bironta odamni bexosdan, adovat qilmay oʻldirgan boʻlsa, oʻsha shaharlardan biriga qochib borib, jonini qutqarishi mumkin . 43 Bu shaharlar quyidagilar edi: Ruben qabilasi uchun yassi tepalikdagi Bazer shahri, Gad qabilasi uchun Giladdagi Ramoʻt shahri, Manashe qabilasi uchun Bashandagi Goʻlon shahri.

Muso Isroil xalqiga qonunlarni bayon qila boshlaydi

44 Muso Isroil xalqiga quyidagi qonunlarni berdi. 45 Isroil xalqi Misrdan chiqqandan keyin, Muso shu shartlar, farmonlar va qonun–qoidalarni aytdi. 46 Muso bularni Iordan daryosining sharqiy qirgʻogʻida, Bayt–Piyor roʻparasidagi vodiyda bayon qildi. Bu yer ilgari Xashbonda hukmronlik qilgan Amor xalqining shohi Sixoʻnga qarashli edi. Muso bilan Isroil xalqi Misrdan chiqqanlarida, Sixoʻnni magʻlub qilgan edilar. 47 Isroil xalqi Iordan daryosining sharqida yashagan ikkala Amor shohining yurtlarini, yaʼni shoh Sixoʻnning va Bashan shohi Oʻgning yurtini bosib olgan edi. 48 Bu joylar Arnon soyligi etagidagi Aror shahridan Siriyon togʻigacha, yaʼni Xermon togʻigacha choʻzilgan edi. 49 Shuningdek, Fisgax togʻ tizmasining etagidagi Oʻlik dengizgacha choʻzilib, Iordan daryosining sharq tomonidagi butun Iordan vodiysini ham oʻz ichiga olgan edi.