Bible — Bible Society of Uzbekistan

17–BOB

Isroilning oxirgi shohi Xoʻsheya

1 Yahudo shohi Oxoz hukmronlik qilayotganiga oʻn ikki yil boʻlganda, Xoʻsheya Samariyada Isroil shohi boʻldi va toʻqqiz yil hukmronlik qildi. Xoʻsheya Eloxning oʻgʻli edi. 2 U Egamiz oldida qabih ishlar qilgan boʻlsa ham, oʻzidan oldin oʻtgan Isroil shohlari qadar emasdi.

3 Ossuriya shohi Shalmanasar Xoʻsheyaga qarshi urush ochdi. Xoʻsheya taslim boʻlib, Shalmanasarga oʻlpon toʻlay boshladi. 4 Lekin keyinroq Xoʻsheya Misr firʼavni Soʻvaxdan yordam soʻrab xabarchilar joʻnatdi va Ossuriya shohiga har yili toʻlashi kerak boʻlgan oʻlponni toʻlamay qoʻydi. Xoʻsheyaning xoinlik qilganini Ossuriya shohi bilib qoldi, shuning uchun uni tutib, zindonga tashladi.

Samariyaning magʻlubiyati

5 Shalmanasar Isroil yerlariga hujum qilib, Samariyani uch yil qamal qilib turdi. 6 Xoʻsheya hukmronligining toʻqqizinchi yilida Ossuriya shohi Samariyani qoʻlga kiritib , Isroil xalqini Ossuriyaga koʻchirdi. Ularni Xalax shahriga, Xavor daryosi boʻyidagi Gozan hududiga va Midiya shaharlariga joylashtirdi.

7 Isroil xalqi oʻzlarini Misr firʼavni hukmronligidan xalos qilib, Misrdan olib chiqqan Egasi Xudoga qarshi gunoh qilgan edilar. Ularning boshiga kelgan jamiki gʻam–kulfatlarning sababi shu edi. Oʻsha paytlarda Isroil xalqi begona xudolarga sajda qilishar, 8 Kanʼon yurtidan Egamiz quvgan qavmlarning odatlariga va Isroil shohlari oʻzlaricha joriy qilgan odatlarga binoan yashardilar. 9 Oʻzlarining Egasi Xudoga maʼqul kelmaydigan ishlarni qilardilar. Hamma yerda — qishloqlardan tortib, mustahkam shahargacha boʻlgan joylarda sajdagohlar qurgan edilar. 10 Har bir tepalikning ustiga, har bir yashil daraxtning ostiga butsimon toshlarni, Asheraga atab ustunlarni oʻrnatgan edilar. 11 Kanʼon yurtidan Egamiz quvib yuborgan xalqlar singari, Isroil xalqi hamma sajdagohlarda qurbonliklar qilishardi. Ular qabih ishlari bilan Egamizni gʻazablantirardilar. 12 Egamiz: “Bunday ishlarni qilmanglar”, deb aytganiga qaramasdan, butlarga xizmat qilaverardilar.

13 Egamiz Isroil va Yahudo xalqini hamma paygʻambarlar, valiylar orqali ogohlantirib, ularga shunday amr bergan edi: “Qabih yoʻllaringizdan qaytinglar. Mening amrlarimga, farmonlarimga itoat etinglar! Men hamma qonunlarimni ota–bobolaringizga berganman, paygʻambar boʻlgan qullarim orqali sizlarga yuborganman.”

14 Ammo Isroil xalqi quloq solmasdi. Ular otalari kabi oʻjarlik qilaverdilar, oʻzlarining Egasi Xudoga ishonmas edilar. 15 Egamizning farmonlaridan, ogohlantirishlaridan va otalari bilan qilgan ahdidan yuz oʻgirib, betayin xudolarga sajda qilgani uchun oʻzlari ham betayin boʻlib qolgandilar. Egamiz: “Atrofingizdagi xalqlarga oʻxshab yashamanglar”, deb ularga amr bersa ham, oʻsha xalqlarning odatlariga koʻra, yashayverardilar.

16 Isroil xalqi oʻzlarining Egasi Xudoning hamma amrlaridan yuz oʻgirgandi. Ular topingani ikkita buzoq tasvirini va Asheraning ustunini yasadilar. Barcha samoviy jismlarga sajda qilib, Baalga xizmat etardilar. 17 Oʻgʻillarini, qizlarini qurbonlik qilib, olovda kuydirardilar , fol ochtirib, taʼbirchilarga eʼtiqod qilardilar. Egamiz oldida qabih ishlarga mukkasidan ketib, Egamizni gʻazablantiraverdilar. 18 Egamiz Isroil xalqidan qattiq gʻazablanib, ularni Oʻzining huzuridan chiqarib tashlagandi. Yahudo xalqidan tashqari bironta qabila Egamizning huzurida qolmagan edi. 19 Hatto Yahudo xalqi ham oʻzlarining Egasi Xudoning amrlariga rioya qilmay qoʻygandi. Ular Isroil xalqining qabih odatlariga taqlid qildilar. 20 Oqibatda Egamiz Isroilning hamma qavmidan yuz oʻgirdi. Ularni talonchilarning qoʻliga berib, jazoladi. Oxiri, hammasini huzuridan uloqtirib tashladi.

21 Darvoqe, Egamiz Dovud xonadonidan Isroilni tortib olgandan keyin , Isroil xalqi Nabat oʻgʻli Yeribomni shoh qilgan edi. Yeribom Isroil xalqini Egamizning yoʻlidan ozdirib, ogʻir gunohga botirdi. 22 Isroil xalqi Yeribom qilgan hamma gunohlarga ergashdi, bu gunohlardan qaytmadi. 23 Natijada Egamiz paygʻambar qullari orqali aytganiday, Isroil xalqini Oʻz huzuridan quvgan va Isroil xalqi oʻz yurtlaridan Ossuriyaga surgun qilingan edilar. Ular bugungacha oʻsha yerda yashaydilar.

Samariyaga oʻrnashgan xalqlarning butparastligi

24 Ossuriya shohi Bobildan, Goʻsax, Ivvax, Xomat va Sefarvayim shaharlaridan odamlarni olib kelib, Samariya shaharlarida Isroil xalqi oʻrniga joylashtirdi. Ular Samariyani egallab, Samariya shaharlarida istiqomat qila boshladilar.

25 Ular bu joylarga dastlab oʻrnashganlarida, Egamizga sajda qilmadilar. Shuning uchun Egamiz Samariya shaharlariga arslonlar yubordi. Arslonlar oʻsha xalqlardan baʼzi odamlarni oʻldirdi. 26 Soʻngra Samariyadan Ossuriya shohiga quyidagicha xabar joʻnatildi: “Siz Samariya shaharlariga koʻchirib kelib oʻrnashtirgan xalqlar bu yurt xudosining qonun–qoidalarini bilmayaptilar. Shuning uchun oʻsha xudo bu yerga arslonlar yuboryapti, odamlar esa arslonlarga yem boʻlyapti.”

27 Shundan keyin Ossuriya shohi quyidagicha farmon berdi: “Samariyadan asir qilib olib ketilgan ruhoniylardan birortasini oʻsha yerga qaytarib yuboringlar. Ruhoniy oʻsha yurtga borib yashasin va Samariyaning xudosi qonun–qoidalarini oʻsha yerdagi xalqlarga oʻrgatsin.” 28 Samariyadan koʻchirib yuborilgan ruhoniylardan biri qaytib kelib, Baytilda istiqomat qila boshladi. U oʻsha yerda oʻrnashgan xalqlarga Egamizga qanday sajda qilishni oʻrgatishga kirishdi.

29 Lekin Samariya shaharlariga joylashgan har bir xalq oʻz xudolarining tasvirini yasayverdi. Isroil xalqi Samariyada yashaganda barpo qilgan sajdagohlarga oʻsha xudolarning tasvirini qoʻydilar. 30 Bobilliklar xudo Suxotvanotning, Xutliklar xudo Nargalning, Xomatliklar xudo Oshimaning, 31 Ivvaxliklar esa xudolar Nivxaz va Tartoqning tasvirlarini yasab, oʻsha xudolarga sajda qildilar. Sefarvayimliklar oʻzlarining xudolari Odrammalek va Anammalekka bolalarini kuydirib qurbonlik qildilar. 32 Ular ham Egamizga sajda qildilar, ayni paytda oʻz xudolarining sajdagohlarida xizmat qilish uchun oralaridan ruhoniylar ham saylab oldilar. 33 Ular Egamizga sajda qilish bilan birga, oʻzlari oldin yashagan ona yurtining odatlariga muvofiq oʻz xudolariga ham xizmat qilaverdilar. 34 Oʻsha xalqlar bugungacha eski odatlari boʻyicha yashab keladilar: na Egamizdan qoʻrqadilar, na Egamiz Yoqubga, yaʼni Isroil nasliga bergan farmonlarni, qoidalarni, qonun va amrlarni bajaradilar.

35 Ilgarilari Egamiz Isroil xalqi bilan ahd tuzib, shunday amr etgan edi: “Begona xudolarga sajda qilmanglar, taʼzim qilmanglar, u xudolarga xizmat qilmanglar, qurbonlik keltirmanglar. 36 Faqat Menga sajda qilinglar! Men, Egangiz, buyuk qudratim va ajoyibotlarim bilan sizlarni Misrdan olib chiqqanman. Menga taʼzim qilib, qurbonlik keltiringlar. 37 Sizlar uchun yozgan farmonlarimni, qoidalarimni, qonunlarimni va amrlarimni to abad ijro etinglar, begona xudolarga sajda qilmanglar. 38 Sizlar bilan tuzgan ahdimni unutmanglar, begona xudolarga sajda qilmanglar. 39 Faqat Men, Egangiz Xudogagina sajda qilinglar. Hamma gʻanimlaringiz qoʻlidan sizlarni xalos qiladigan Menman.”

40 Shunga qaramay, Samariyaga oʻrnashgan xalqlar Egamizning amrlariga quloq solmasdan eski odatlariga koʻra, yashayverdilar. 41 Bu xalqlar bir paytning oʻzida ham Egamizga sajda qilar, ham oʻyib ishlangan tasvirlarga xizmat qilardilar. Ularning bolalari va nabiralari ham bugungacha otalari kabi yashaydilar.