94–САНО
1 Келинглар, севинч ила Эгамизни куйлайлик,
Нажотимиз Қоясига шодлик ила ҳайқирайлик.
2 Шукрона айтиб, Унинг ҳузурига борайлик,
Унга қўшиқлар айтиб, шодликдан ҳайқирайлик.
3 Зотан, Эгамиз улуғ Худодир,
Жамики худолар устидан улуғ Шоҳдир.
4 Заминнинг энг чуқур жойлари Унинг қўлидадир,
Тоғларнинг чўққилари ҳам Уникидир.
5 Уникидир Ўзи яратган денгиз ҳам,
Қўли барпо қилган қуруқ ер ҳам.
6 Келинглар, таъзим қилиб, сажда этайлик,
Яратган Эгамиз олдида тиз чўкайлик.
7 У Худойимиздир, биз Унинг яйловидаги халқмиз,
Биз Унинг қўл остидаги қўйлармиз.
Эгамиз шундай дейди:
“Қанийди, бугун Менинг овозимга қулоқ солсангиз!
8 Оталарингиз каби тош юрак бўлманглар.
Маривада, саҳродаги Массахда улар қилган ишни қилманглар.
9 Оталарингиз Менинг ишларимни кўрса ҳам,
У ерда Мени синаб кўрдилар.
10 Қирқ йил у наслдан нафратланиб ,
Шундай дедим: «Бу халқ Мендан юз ўгиради,
Амрларимга бўйсунишдан бош тортади.»
11 Шу боис ғазабланиб, онт ичдим:
«Улар фароғат диёримга кирмайди», дедим .”
94–SANO
1 Kelinglar, sevinch ila Egamizni kuylaylik,
Najotimiz Qoyasiga shodlik ila hayqiraylik.
2 Shukrona aytib, Uning huzuriga boraylik,
Unga qoʻshiqlar aytib, shodlikdan hayqiraylik.
3 Zotan, Egamiz ulugʻ Xudodir,
Jamiki xudolar ustidan ulugʻ Shohdir.
4 Zaminning eng chuqur joylari Uning qoʻlidadir,
Togʻlarning choʻqqilari ham Unikidir.
5 Unikidir Oʻzi yaratgan dengiz ham,
Qoʻli barpo qilgan quruq yer ham.
6 Kelinglar, taʼzim qilib, sajda etaylik,
Yaratgan Egamiz oldida tiz choʻkaylik.
7 U Xudoyimizdir, biz Uning yaylovidagi xalqmiz,
Biz Uning qoʻl ostidagi qoʻylarmiz.
Egamiz shunday deydi:
“Qaniydi, bugun Mening ovozimga quloq solsangiz!
8 Otalaringiz kabi tosh yurak boʻlmanglar.
Marivada, sahrodagi Massaxda ular qilgan ishni qilmanglar.
9 Otalaringiz Mening ishlarimni koʻrsa ham,
U yerda Meni sinab koʻrdilar.
10 Qirq yil u nasldan nafratlanib ,
Shunday dedim: «Bu xalq Mendan yuz oʻgiradi,
Amrlarimga boʻysunishdan bosh tortadi.»
11 Shu bois gʻazablanib, ont ichdim:
«Ular farogʻat diyorimga kirmaydi», dedim .”
