6–БОБ
Энг буюк амр
1 Эгангиз Худо, халққа ўргатгин, деб менга берган амрлар, фармонлар ва қонун–қоидалар шулардан иборатдир. Иорданни кечиб ўтиб, мулк қилиб оладиган юртда буларга риоя қилинглар. 2 Мен сизларга берадиган фармон ва амрларга ўзларингиз, фарзандларингиз ва набираларингиз, ҳаммангиз риоя қилинглар. Бир умр Эгангиз Худодан қўрқинглар, шунда умрингиз узоқ бўлади. 3 Эй Исроил халқи, қулоқ солинг, буларни битта қолдирмай бажаринг. Шунда ота–боболарингизнинг Худоси — Эгангиз берган ваъдага кўра, сут ва асал оқиб ётган юртда кўпаясизлар, бахтиёр бўласизлар.
4 Эй Исроил, қулоқ сол! Эгамиз Худо танҳо Эгадир . 5 Эгангиз Худони бутун қалбингиз билан, жону дилингиз билан, бутун вужудингиз билан севинглар. 6 Бугун мен сизларга берган бу амрларни юрагингизда сақланглар. 7 Буларни болаларингизга ҳам ўргатинглар. Уйда ўтирганда ҳам, йўлда юрганда ҳам, ётганингизда ҳам, турганингизда ҳам шулар ҳақида гапиринглар. 8 Буларни қўлингизга белги қилиб боғланглар, пешанангизга нишона қилиб тақиб олинглар. 9 Эшигингиз кесакисига , дарвозаларингизга ёзиб қўйинглар.
Итоатсизликка қарши огоҳлантириш
10 Эгангиз Худо ота–боболарингиз Иброҳим, Исҳоқ, Ёқубга қасам ичиб, ваъда қилган ерга сизларни олиб киради. У сизларга ўзингиз қурмаган катта ва чиройли шаҳарларни беради. 11 Ўзингиз тўлдирмаган, бойликларга тўла уйларни, ўзингиз қазимаган сардобаларни, сиз экмаган токлар ва зайтунзорларни беради. Ўшанда еб тўйганларингиздан кейин 12 эҳтиёт бўлинглар! Сизларни Мисрдаги қулликдан олиб чиққан Эгамизни унутманглар. 13 Эгангиз Худодан қўрқинглар. Фақат Унга хизмат қилинглар. Ёлғиз Унинг номи билан қасам ичинглар. 14 Бегона худоларга, атрофингиздаги халқларнинг худоларига эргашманглар. 15 Ахир, орангиздаги Эгангиз Худо сизнинг севгингизни бошқа худолар билан баҳам кўрмайдиган Худодир. У ғазабланиб, сизларни ер юзидан йўқотиб юборади.
16 Массахда қилганингиздек , Эгангиз Худони синаманглар. 17 Унинг амрларини, фармон ва шартларини битта қолдирмай бажаринглар. 18 Эгамиз тўғри ва яхши деб билган ишларни қилинглар. Шунда Эгамиз ота–боболарингизга қасам ичиб, ваъда қилган ҳосилдор юртни сизлар мулк қилиб оласизлар, бахтиёр бўласизлар. 19 Эгамиз, Ўзи айтганидек, юртингизда яшаган барча душманларингизни ҳайдаб чиқаради.
20 Келажакда фарзандларингиз сизлардан: “Эгамиз Худо сизларга берган қонун–қоидалар, фармон ва шартларнинг маъноси нима?” деб сўрайди. 21 Уларга шундай деб жавоб беринглар: “Биз Мисрда фиръавннинг қуллари эдик. Эгамиз Ўз қудрати билан бизни Мисрдан олиб чиқди. 22 У бизнинг кўзимиз олдида Мисрга, фиръавн ва унинг бутун хонадонига буюк, қўрқинчли аломату мўъжизаларни кўрсатди. 23 Ота–боболаримизга онт ичиб ваъда қилган юртга бизни олиб кириш учун, ўша юртни бизга бериш учун бизни Мисрдан олиб чиқди. 24 Эгамиз Худо: «Мана шу фармонларнинг ҳаммасига риоя қилинглар, Мендан қўрқинглар, шунда бугунгидай тирик бўласиз, бахтли ҳаёт кечирасиз», деди. 25 Эгамиз Худонинг олдида мана шу амрларни битта қолдирмай бажарсак, солиҳ бўламиз.”
6–BOB
Eng buyuk amr
1 Egangiz Xudo, xalqqa oʻrgatgin, deb menga bergan amrlar, farmonlar va qonun–qoidalar shulardan iboratdir. Iordanni kechib oʻtib, mulk qilib oladigan yurtda bularga rioya qilinglar. 2 Men sizlarga beradigan farmon va amrlarga oʻzlaringiz, farzandlaringiz va nabiralaringiz, hammangiz rioya qilinglar. Bir umr Egangiz Xudodan qoʻrqinglar, shunda umringiz uzoq boʻladi. 3 Ey Isroil xalqi, quloq soling, bularni bitta qoldirmay bajaring. Shunda ota–bobolaringizning Xudosi — Egangiz bergan vaʼdaga koʻra, sut va asal oqib yotgan yurtda koʻpayasizlar, baxtiyor boʻlasizlar.
4 Ey Isroil, quloq sol! Egamiz Xudo tanho Egadir . 5 Egangiz Xudoni butun qalbingiz bilan, jonu dilingiz bilan, butun vujudingiz bilan sevinglar. 6 Bugun men sizlarga bergan bu amrlarni yuragingizda saqlanglar. 7 Bularni bolalaringizga ham oʻrgatinglar. Uyda oʻtirganda ham, yoʻlda yurganda ham, yotganingizda ham, turganingizda ham shular haqida gapiringlar. 8 Bularni qoʻlingizga belgi qilib bogʻlanglar, peshanangizga nishona qilib taqib olinglar. 9 Eshigingiz kesakisiga , darvozalaringizga yozib qoʻyinglar.
Itoatsizlikka qarshi ogohlantirish
10 Egangiz Xudo ota–bobolaringiz Ibrohim, Isʼhoq, Yoqubga qasam ichib, vaʼda qilgan yerga sizlarni olib kiradi. U sizlarga oʻzingiz qurmagan katta va chiroyli shaharlarni beradi. 11 Oʻzingiz toʻldirmagan, boyliklarga toʻla uylarni, oʻzingiz qazimagan sardobalarni, siz ekmagan toklar va zaytunzorlarni beradi. Oʻshanda yeb toʻyganlaringizdan keyin 12 ehtiyot boʻlinglar! Sizlarni Misrdagi qullikdan olib chiqqan Egamizni unutmanglar. 13 Egangiz Xudodan qoʻrqinglar. Faqat Unga xizmat qilinglar. Yolgʻiz Uning nomi bilan qasam ichinglar. 14 Begona xudolarga, atrofingizdagi xalqlarning xudolariga ergashmanglar. 15 Axir, orangizdagi Egangiz Xudo sizning sevgingizni boshqa xudolar bilan baham koʻrmaydigan Xudodir. U gʻazablanib, sizlarni yer yuzidan yoʻqotib yuboradi.
16 Massaxda qilganingizdek , Egangiz Xudoni sinamanglar. 17 Uning amrlarini, farmon va shartlarini bitta qoldirmay bajaringlar. 18 Egamiz toʻgʻri va yaxshi deb bilgan ishlarni qilinglar. Shunda Egamiz ota–bobolaringizga qasam ichib, vaʼda qilgan hosildor yurtni sizlar mulk qilib olasizlar, baxtiyor boʻlasizlar. 19 Egamiz, Oʻzi aytganidek, yurtingizda yashagan barcha dushmanlaringizni haydab chiqaradi.
20 Kelajakda farzandlaringiz sizlardan: “Egamiz Xudo sizlarga bergan qonun–qoidalar, farmon va shartlarning maʼnosi nima?” deb soʻraydi. 21 Ularga shunday deb javob beringlar: “Biz Misrda firʼavnning qullari edik. Egamiz Oʻz qudrati bilan bizni Misrdan olib chiqdi. 22 U bizning koʻzimiz oldida Misrga, firʼavn va uning butun xonadoniga buyuk, qoʻrqinchli alomatu moʻjizalarni koʻrsatdi. 23 Ota–bobolarimizga ont ichib vaʼda qilgan yurtga bizni olib kirish uchun, oʻsha yurtni bizga berish uchun bizni Misrdan olib chiqdi. 24 Egamiz Xudo: «Mana shu farmonlarning hammasiga rioya qilinglar, Mendan qoʻrqinglar, shunda bugungiday tirik boʻlasiz, baxtli hayot kechirasiz», dedi. 25 Egamiz Xudoning oldida mana shu amrlarni bitta qoldirmay bajarsak, solih boʻlamiz.”
