61–БОБ
Нажот ҳақида хушхабар
1 Эгамиз Раббийнинг Руҳи мени қамраб олган,
Чунки У мени танлаган.
“Йўқсилларга хушхабар етказсин,
Хаста қалбларга шифо берсин,
Асирларга озодлик эълон қилсин,
Зиндондагиларга эркинлик хабарини берсин” деб,
Эгам мени юборди.
2 “Эгамнинг марҳамат йилини,
Худонинг қасос оладиган кунини эълон қилсин,
Азадорларнинг ҳаммасини овутсин” деб,
Эгам мени юборди.
3 “Қуддусда нола қилаётганларга тасалли берсин,
Уларга кул ўрнига зеб–зийнат,
Аза ўрнига шодлик мойи,
Маъюс руҳ ўрнига мадҳия берсин” деб,
Эгам мени юборди.
Энди уларни “Эгамиз Ўз шуҳрати учун эккан кўчатлар,
Солиҳлик эманлари” деб аташади.
4 Энди улар қадимги вайроналарни қайта тиклайди,
Азалий вайрона ерларни яна ўнглайди,
Насллар оша вайрон ётган шаҳарларни қайта қуради.
5 Эй халқим, бегоналар келиб, мол–қўйларингизни боқади,
Ёт халқ ўғиллари деҳқонингиз, боғбонингиз бўлади.
6 Сизларни эса Эгамизнинг руҳонийлари деб аташади,
Худойимизнинг хизматкорлари деган ном оласизлар.
Элатларнинг бойликлари сизларники бўлади,
Ўзга халқлардан келган мол–мулк билан фахрланасиз.
7 Уят ўрнига сизлар икки ҳисса улуш оласиз.
Шарманда бўлмайсиз, олган мулкингиздан шодланасиз.
Ҳа, ўз юртингизда икки ҳисса улуш оласиз,
Абадий шодликка эга бўласиз.
8 Эгам айтар: “Мен, Эгангиз, адолатни севаман,
Талончилик, ҳақсизликдан нафратланаман.
Садоқат билан халқимга мукофотини бераман.
Улар билан абадий аҳд тузаман.
9 Уларнинг насли халқлар орасида машҳур бўлади,
Уларнинг зурриёти эллар орасида донг таратади,
Кўрганларнинг ҳаммаси уларни
«Эгамиз барака берган халқ» деб тан олади.”
10 Эгам туфайли мен буюк шодлик топаман,
Худойим деб қалбим жўш уради.
Зотан, У мени нажот либоси билан ўради,
Зафар кийимини менга кийдирди.
Мен тож кийган куёвга ўхшайман,
Зеб–зийнат билан безанган келиндайман.
11 Ер ўсимликни етиштиргани каби,
Боғ экилганларни ўстиргани сингари,
Эгамиз Раббий барча халқлар кўз ўнгида
Солиҳлик ва мадҳияларни етиштиради.
61–BOB
Najot haqida xushxabar
1 Egamiz Rabbiyning Ruhi meni qamrab olgan,
Chunki U meni tanlagan.
“Yoʻqsillarga xushxabar yetkazsin,
Xasta qalblarga shifo bersin,
Asirlarga ozodlik eʼlon qilsin,
Zindondagilarga erkinlik xabarini bersin” deb,
Egam meni yubordi.
2 “Egamning marhamat yilini,
Xudoning qasos oladigan kunini eʼlon qilsin,
Azadorlarning hammasini ovutsin” deb,
Egam meni yubordi.
3 “Quddusda nola qilayotganlarga tasalli bersin,
Ularga kul oʻrniga zeb–ziynat,
Aza oʻrniga shodlik moyi,
Maʼyus ruh oʻrniga madhiya bersin” deb,
Egam meni yubordi.
Endi ularni “Egamiz Oʻz shuhrati uchun ekkan koʻchatlar,
Solihlik emanlari” deb atashadi.
4 Endi ular qadimgi vayronalarni qayta tiklaydi,
Azaliy vayrona yerlarni yana oʻnglaydi,
Nasllar osha vayron yotgan shaharlarni qayta quradi.
5 Ey xalqim, begonalar kelib, mol–qoʻylaringizni boqadi,
Yot xalq oʻgʻillari dehqoningiz, bogʻboningiz boʻladi.
6 Sizlarni esa Egamizning ruhoniylari deb atashadi,
Xudoyimizning xizmatkorlari degan nom olasizlar.
Elatlarning boyliklari sizlarniki boʻladi,
Oʻzga xalqlardan kelgan mol–mulk bilan faxrlanasiz.
7 Uyat oʻrniga sizlar ikki hissa ulush olasiz.
Sharmanda boʻlmaysiz, olgan mulkingizdan shodlanasiz.
Ha, oʻz yurtingizda ikki hissa ulush olasiz,
Abadiy shodlikka ega boʻlasiz.
8 Egam aytar: “Men, Egangiz, adolatni sevaman,
Talonchilik, haqsizlikdan nafratlanaman.
Sadoqat bilan xalqimga mukofotini beraman.
Ular bilan abadiy ahd tuzaman.
9 Ularning nasli xalqlar orasida mashhur boʻladi,
Ularning zurriyoti ellar orasida dong taratadi,
Koʻrganlarning hammasi ularni
«Egamiz baraka bergan xalq» deb tan oladi.”
10 Egam tufayli men buyuk shodlik topaman,
Xudoyim deb qalbim joʻsh uradi.
Zotan, U meni najot libosi bilan oʻradi,
Zafar kiyimini menga kiydirdi.
Men toj kiygan kuyovga oʻxshayman,
Zeb–ziynat bilan bezangan kelindayman.
11 Yer oʻsimlikni yetishtirgani kabi,
Bogʻ ekilganlarni oʻstirgani singari,
Egamiz Rabbiy barcha xalqlar koʻz oʻngida
Solihlik va madhiyalarni yetishtiradi.
