28–БОБ
Донолик
1 Мана, кумуш қазиб олинадиган конлар бор,
Тилла тозаланадиган жойлар ҳам бор.
2 Темирни ердан қазиб олишади,
Тошларни эритиб, мис ажратиб олишади.
3 Инсон қоронғи конларга чироқ билан киради,
Ҳатто ер остининг энг чет жойларини ҳам қазийди.
Ернинг қоп–қоронғи жойларигача бориб,
Темир ва мис қидиради.
4 У одамзод яшайдиган жойлардан узоқда,
Инсон қадам босмайдиган ерларда конлар қазийди.
Одамзоддан узоқ жойларда арқонларга осилиб, чуқурларга тушади.
5 Мана, дону нон ердан униб чиқади,
Аммо ер ости эса ёндирилгандай алғов–далғов бўлиб ётибди.
6 Ердаги тошлардан зангори ёқутлар чиқади,
Тупроғида тилла бор.
7 Ҳеч бир қузғун конларнинг яширин сўқмоқларини билмайди,
Ҳеч бир бургутнинг кўзлари у жойларни кўрмаган.
8 Ёввойи ҳайвонлар у ерларга оёқ босмаган,
Шерлар ҳам у ерлардан юрмаган.
9 Инсон қояларни ўяди,
Тоғларни таг–туги билан қўпориб ташлайди.
10 Қоялар орасидан йўллар очади,
Инсон кўзлари ҳамма бебаҳо хазиналарни кўради.
11 Инсон дарёларнинг манбаини топади ,
Яширин хазиналарни ёруғликка олиб чиқади.
12 Аммо доноликни қаердан топса бўлади?!
Идрокнинг манбаи қаерда экан?!
13 Одамзод доноликнинг қаерда эканлигини билмайди,
Чунки ёруғ ер юзида донолик топилмайди.
14 Тубсиз сувлар, донолик бизда эмас, дейдилар,
Денгиз ҳам, менинг ичимда у йўқ, деб айтар.
15 Доноликни тиллага сотиб олиб бўлмайди,
Унинг нархини кумуш билан ўлчаб бўлмайди.
16 Донолик Офир тилласию ақиқ тошлар,
Зангори ёқутлар билан ҳам сотиб олинмайди.
17 Тилла ҳам, биллур ҳам доноликка тенг келмайди,
Доноликни тоза тилла тақинчоқларга алмаштириб бўлмайди.
18 Доноликнинг қадри гавҳардан ҳам баланддир,
Маржон ва жавоҳирлар унинг олдида қадрсиздир.
19 Ҳабашистоннинг жавоҳири ҳам унга тенг келолмайди,
Энг соф тилла билан ҳам доноликни сотиб олиб бўлмайди.
20 Шундай экан, донолик қаердан келиб чиқади?
Идрокнинг манбаи қаерда?
21 У барча жонзотларнинг кўзларидан яширилган,
Ҳатто осмондаги қушлардан ҳам беркитилган.
22 Ҳатто Ҳалокат ва Ўлим ҳам,
Биз донолик ҳақида фақат эшитганмиз, деб айтади.
23 Доноликка олиб борадиган йўлни Худо билади,
Доноликнинг масканини фақатгина У билади.
24 Зотан, Худо ернинг тўрт томонини ҳам кўриб туради,
Фалак остидаги ҳамма нарсани кузатиб туради.
25 Худо шамолга куч берган,
Денгизнинг ҳажмини белгилаган.
26 Ёмғирнинг қаерга ёғишини У кўрсатиб берган,
Чақмоқ учун йўлларни белгилаган.
27 Ўшанда Худо доноликка қаради–да,
Доноликнинг қадрини белгилади.
Уни текшириб кўриб, барқарор қилди.
28 Худо одамзодга шундай деди:
«Мен, Раббингиздан қўрқиш доноликдир,
Фосиқликдан юз ўгириш идрокдандир.»”
28–BOB
Donolik
1 Mana, kumush qazib olinadigan konlar bor,
Tilla tozalanadigan joylar ham bor.
2 Temirni yerdan qazib olishadi,
Toshlarni eritib, mis ajratib olishadi.
3 Inson qorongʻi konlarga chiroq bilan kiradi,
Hatto yer ostining eng chet joylarini ham qaziydi.
Yerning qop–qorongʻi joylarigacha borib,
Temir va mis qidiradi.
4 U odamzod yashaydigan joylardan uzoqda,
Inson qadam bosmaydigan yerlarda konlar qaziydi.
Odamzoddan uzoq joylarda arqonlarga osilib, chuqurlarga tushadi.
5 Mana, donu non yerdan unib chiqadi,
Ammo yer osti esa yondirilganday algʻov–dalgʻov boʻlib yotibdi.
6 Yerdagi toshlardan zangori yoqutlar chiqadi,
Tuprogʻida tilla bor.
7 Hech bir quzgʻun konlarning yashirin soʻqmoqlarini bilmaydi,
Hech bir burgutning koʻzlari u joylarni koʻrmagan.
8 Yovvoyi hayvonlar u yerlarga oyoq bosmagan,
Sherlar ham u yerlardan yurmagan.
9 Inson qoyalarni oʻyadi,
Togʻlarni tag–tugi bilan qoʻporib tashlaydi.
10 Qoyalar orasidan yoʻllar ochadi,
Inson koʻzlari hamma bebaho xazinalarni koʻradi.
11 Inson daryolarning manbaini topadi ,
Yashirin xazinalarni yorugʻlikka olib chiqadi.
12 Ammo donolikni qayerdan topsa boʻladi?!
Idrokning manbai qayerda ekan?!
13 Odamzod donolikning qayerda ekanligini bilmaydi,
Chunki yorugʻ yer yuzida donolik topilmaydi.
14 Tubsiz suvlar, donolik bizda emas, deydilar,
Dengiz ham, mening ichimda u yoʻq, deb aytar.
15 Donolikni tillaga sotib olib boʻlmaydi,
Uning narxini kumush bilan oʻlchab boʻlmaydi.
16 Donolik Ofir tillasiyu aqiq toshlar,
Zangori yoqutlar bilan ham sotib olinmaydi.
17 Tilla ham, billur ham donolikka teng kelmaydi,
Donolikni toza tilla taqinchoqlarga almashtirib boʻlmaydi.
18 Donolikning qadri gavhardan ham balanddir,
Marjon va javohirlar uning oldida qadrsizdir.
19 Habashistonning javohiri ham unga teng kelolmaydi,
Eng sof tilla bilan ham donolikni sotib olib boʻlmaydi.
20 Shunday ekan, donolik qayerdan kelib chiqadi?
Idrokning manbai qayerda?
21 U barcha jonzotlarning koʻzlaridan yashirilgan,
Hatto osmondagi qushlardan ham berkitilgan.
22 Hatto Halokat va Oʻlim ham,
Biz donolik haqida faqat eshitganmiz, deb aytadi.
23 Donolikka olib boradigan yoʻlni Xudo biladi,
Donolikning maskanini faqatgina U biladi.
24 Zotan, Xudo yerning toʻrt tomonini ham koʻrib turadi,
Falak ostidagi hamma narsani kuzatib turadi.
25 Xudo shamolga kuch bergan,
Dengizning hajmini belgilagan.
26 Yomgʻirning qayerga yogʻishini U koʻrsatib bergan,
Chaqmoq uchun yoʻllarni belgilagan.
27 Oʻshanda Xudo donolikka qaradi–da,
Donolikning qadrini belgiladi.
Uni tekshirib koʻrib, barqaror qildi.
28 Xudo odamzodga shunday dedi:
«Men, Rabbingizdan qoʻrqish donolikdir,
Fosiqlikdan yuz oʻgirish idrokdandir.»”
