89–САНО
1 Худо одами Мусонинг ибодати.
2 Эй Раббий, насллар оша
Сен паноҳимиз бўлган эдинг.
3 Тоғлар ҳали пайдо бўлмасдан олдин,
Еру оламни яратмасингдан олдин,
Абадулабад Сен Худосан.
4 Сен инсонни тупроққа қайтарасан ,
“Қайтинглар тупроққа, эй бандалар”, деб айтасан.
5 Минг йил Сенинг назарингда бир кундайдир,
Қисқа бир тун вақтидайдир.
6 Сен одамларни супуриб ташлайсан,
Улар гўё тушга ўхшайди.
Улар тонгда унган янги майса кабидир.
Тонгда майса янгидан ўсиб чиқса ҳам
Оқшомда сўлиб, хазон бўлади.
7 Сенинг ғазабингдан адойи тамом бўлдик,
Қаҳрингдан биз ваҳимага тушдик.
8 Гуноҳларимизни Сен олдингга келтирдинг,
Яширин гуноҳларимизни нурларинг ёритиб туради.
9 Кунларимиз Сенинг ғазабинг остида ўтади,
Йилларимиз бир оҳ каби, тез ниҳоясига етади.
10 Кунларимиз етмиш йил экан,
Агар бардам бўлсак, саксон йил экан.
Энг ажойиб йиллар заҳмат, жафо билан кечаркан,
Умримиз тез ўтар, ўзимиз учиб кетармиз.
11 Сенинг ғазабинг қудратини ким била олар?!
Қаҳринг, Ўзингга лойиқ қўрқув каби буюкдир.
12 Умримиз кунларини санашни бизга ўргатгин,
Токи биз доно қалбга эга бўлайлик.
13 Кел, эй Эгам! Қачонгача кутамиз?!
Ўз қулларингга шафқат қилгин!
14 Саҳарда содиқ севгинг билан бизни қондиргин,
Умримиз бўйи қўшиқ айтиб, хурсанд бўлайлик.
15 Кулфатлар кўрдик кўп кунлар,
Бизни қайғуга гирифтор қилдинг қанча йиллар,
Ўша кунлар эвазига бизни хурсанд қил.
16 Биз, Ўз қулларингга қудратли ишларингни кўрсатгин,
Бизнинг наслимиз улуғворлигингни кўрсин.
17 Эй Раббимиз Худо, лутф–караминг бизга ёр бўлсин,
Қилган ишимиз бароридан келсин,
Ҳа, ишларимизга барака бергин!
89–SANO
1 Xudo odami Musoning ibodati.
2 Ey Rabbiy, nasllar osha
Sen panohimiz boʻlgan eding.
3 Togʻlar hali paydo boʻlmasdan oldin,
Yeru olamni yaratmasingdan oldin,
Abadulabad Sen Xudosan.
4 Sen insonni tuproqqa qaytarasan ,
“Qaytinglar tuproqqa, ey bandalar”, deb aytasan.
5 Ming yil Sening nazaringda bir kundaydir,
Qisqa bir tun vaqtidaydir.
6 Sen odamlarni supurib tashlaysan,
Ular goʻyo tushga oʻxshaydi.
Ular tongda ungan yangi maysa kabidir.
Tongda maysa yangidan oʻsib chiqsa ham
Oqshomda soʻlib, xazon boʻladi.
7 Sening gʻazabingdan adoyi tamom boʻldik,
Qahringdan biz vahimaga tushdik.
8 Gunohlarimizni Sen oldingga keltirding,
Yashirin gunohlarimizni nurlaring yoritib turadi.
9 Kunlarimiz Sening gʻazabing ostida oʻtadi,
Yillarimiz bir oh kabi, tez nihoyasiga yetadi.
10 Kunlarimiz yetmish yil ekan,
Agar bardam boʻlsak, sakson yil ekan.
Eng ajoyib yillar zahmat, jafo bilan kecharkan,
Umrimiz tez oʻtar, oʻzimiz uchib ketarmiz.
11 Sening gʻazabing qudratini kim bila olar?!
Qahring, Oʻzingga loyiq qoʻrquv kabi buyukdir.
12 Umrimiz kunlarini sanashni bizga oʻrgatgin,
Toki biz dono qalbga ega boʻlaylik.
13 Kel, ey Egam! Qachongacha kutamiz?!
Oʻz qullaringga shafqat qilgin!
14 Saharda sodiq sevging bilan bizni qondirgin,
Umrimiz boʻyi qoʻshiq aytib, xursand boʻlaylik.
15 Kulfatlar koʻrdik koʻp kunlar,
Bizni qaygʻuga giriftor qilding qancha yillar,
Oʻsha kunlar evaziga bizni xursand qil.
16 Biz, Oʻz qullaringga qudratli ishlaringni koʻrsatgin,
Bizning naslimiz ulugʻvorligingni koʻrsin.
17 Ey Rabbimiz Xudo, lutf–karaming bizga yor boʻlsin,
Qilgan ishimiz baroridan kelsin,
Ha, ishlarimizga baraka bergin!
