84–САНО
1 Ижрочилар раҳбарига. Кўрах наслининг саноси.
2 Эй Эгам, Ўз юртингга марҳамат кўрсатгансан,
Ёқуб наслини яна фаровонликка эриштиргансан.
3 Халқингнинг айбларини унутгансан,
Уларнинг гуноҳларини кечиргансан.
4 Бутун ғазабингни жиловладинг,
Қаҳру ғазабингдан қайтдинг.
5 Эй нажоткоримиз Худо,
Олдинги ҳолимизга бизни қайтаргин,
Бизга қарши бўлган ғазабингни тўхтатгин.
6 Сен биздан то абад ғазабланасанми?
Ғазабингни насллар оша сочаверасанми?
7 Халқим Менда севинч топсин дея,
Бизга яна янги ҳаёт бахш этмайсанми?
8 Эй Эгам, бизга содиқ севгингни кўрсат,
Бизга нажотингни ато қил.
9 Парвардигор Эгамиз айтаётганига қулоқ соламан,
У Ўз халқига, Ўз тақводорларига тинчлик ваъда қилаётир,
Энди улар бемаъни йўлларига қайтмасин.
10 Шубҳасиз, Эгамиздан қўрққанларга
Унинг Ўзи нажот беришга тайёр туради,
Бизнинг еримизда Унинг улуғворлиги макон топади.
11 Севги ва ҳақиқат учрашади,
Адолат, тинчлик бир–бири ила ўпишади.
12 Ҳақиқат заминдан ўсиб чиқади,
Адолат самодан туриб боқади.
13 Эгамиз чиндан неъматин ёғдиради,
Еримиз ўз ҳосилини беради.
14 Адолат Эгамизнинг олдида юради,
Унинг қадамлари учун йўл тайёрлайди.
84–SANO
1 Ijrochilar rahbariga. Koʻrax naslining sanosi.
2 Ey Egam, Oʻz yurtingga marhamat koʻrsatgansan,
Yoqub naslini yana farovonlikka erishtirgansan.
3 Xalqingning ayblarini unutgansan,
Ularning gunohlarini kechirgansan.
4 Butun gʻazabingni jilovlading,
Qahru gʻazabingdan qaytding.
5 Ey najotkorimiz Xudo,
Oldingi holimizga bizni qaytargin,
Bizga qarshi boʻlgan gʻazabingni toʻxtatgin.
6 Sen bizdan to abad gʻazablanasanmi?
Gʻazabingni nasllar osha sochaverasanmi?
7 Xalqim Menda sevinch topsin deya,
Bizga yana yangi hayot baxsh etmaysanmi?
8 Ey Egam, bizga sodiq sevgingni koʻrsat,
Bizga najotingni ato qil.
9 Parvardigor Egamiz aytayotganiga quloq solaman,
U Oʻz xalqiga, Oʻz taqvodorlariga tinchlik vaʼda qilayotir,
Endi ular bemaʼni yoʻllariga qaytmasin.
10 Shubhasiz, Egamizdan qoʻrqqanlarga
Uning Oʻzi najot berishga tayyor turadi,
Bizning yerimizda Uning ulugʻvorligi makon topadi.
11 Sevgi va haqiqat uchrashadi,
Adolat, tinchlik bir–biri ila oʻpishadi.
12 Haqiqat zamindan oʻsib chiqadi,
Adolat samodan turib boqadi.
13 Egamiz chindan neʼmatin yogʻdiradi,
Yerimiz oʻz hosilini beradi.
14 Adolat Egamizning oldida yuradi,
Uning qadamlari uchun yoʻl tayyorlaydi.
