76–САНО
1 Ижрочилар раҳбари Ёдутунга . Осиф саноси.
2 Фарёд қилиб, Худога ёлвораман,
Эшитгин мени, деб Худога ҳайқираман .
3 Қайғули кунимда Раббийга интилдим,
Тунда қўлларимни кўтариб илтижо қилдим,
Жоним тасалли топишни рад этди.
4 Эй Худо, Сени ўйлаганимда, фиғон чекаман,
Руҳим заифлашади.
5 Тун бўйи Сен мени бедор қилдинг,
Сўзлай олмайман азобланганимдан.
6 Олдинги кунлар ҳақида ўйлаб юрдим,
Эски даврларни эслаб юрдим.
7 Тун бўйи ўзим билан ўзим суҳбат қурдим ,
Қалбим хаёлга берилиб, руҳим сўраб–суриштирди:
8 “Раббий то абад бизни рад этармикан?
Ҳеч қачон шафқат кўрсатмасмикан?
9 Унинг содиқ севгиси то абад йўқолганми?
Унинг ваъдалари бир умрга тамом бўлганми?
10 Худо шафқатли бўлишни унутиб қўйдими?
Раҳмдиллик ўрнини ғазаб эгалладими?”
11 Ўзимга ўзим дедим:
“Худойи Таоло ўнг қўли орқали
Энди бизга ёрдам бермаяпти.
Бу менинг кулфатимдир.”
12 Эй Эгам, ишларингни мен ёдга оламан,
Азалий мўъжизаларингни эсга оламан.
13 Ҳамма ишларингни хаёлимдан ўтказаман,
Қудратли ишларинг ҳақида фикр юритаман.
14 Сенинг йўлинг, эй Худо, муқаддасдир,
Қайси худо Сендай буюкдир?!
15 Мўъжизалар яратувчи Худо Сенсан,
Халқлар орасида қудратингни кўрсатган Сенсан.
16 Қудратинг билан Ўз халқингни,
Ёқуб ҳамда Юсуф наслларини қутқаргансан.
17 Эй Худо, сувлар Сени кўрганда,
Ҳа, сувлар Сени кўрганда, қўрқиб кетдилар,
Тубсиз денгизлар ларзага келди!
18 Булутлар ёмғирин қуйди,
Самолар гумбурлаб янгради,
Ўқларинг ҳар томонда
Ялт этиб пайдо бўлди.
19 Гумбур–гумбур эшитилди қуюн ичида,
Чақмоқларинг оламни ёритди,
Замин титраб, тебранди.
20 Йўлинг денгиз орқали ўтди,
Сўқмоғинг баҳайбат сувлардан ўтди,
Изларинг эса кўринмас эди.
21 Халқингни қўй сурувидай етаклаб бординг,
Мусо, Ҳорунни раҳнамо қилиб танладинг.
76–SANO
1 Ijrochilar rahbari Yodutunga . Osif sanosi.
2 Faryod qilib, Xudoga yolvoraman,
Eshitgin meni, deb Xudoga hayqiraman .
3 Qaygʻuli kunimda Rabbiyga intildim,
Tunda qoʻllarimni koʻtarib iltijo qildim,
Jonim tasalli topishni rad etdi.
4 Ey Xudo, Seni oʻylaganimda, figʻon chekaman,
Ruhim zaiflashadi.
5 Tun boʻyi Sen meni bedor qilding,
Soʻzlay olmayman azoblanganimdan.
6 Oldingi kunlar haqida oʻylab yurdim,
Eski davrlarni eslab yurdim.
7 Tun boʻyi oʻzim bilan oʻzim suhbat qurdim ,
Qalbim xayolga berilib, ruhim soʻrab–surishtirdi:
8 “Rabbiy to abad bizni rad etarmikan?
Hech qachon shafqat koʻrsatmasmikan?
9 Uning sodiq sevgisi to abad yoʻqolganmi?
Uning vaʼdalari bir umrga tamom boʻlganmi?
10 Xudo shafqatli boʻlishni unutib qoʻydimi?
Rahmdillik oʻrnini gʻazab egalladimi?”
11 Oʻzimga oʻzim dedim:
“Xudoyi Taolo oʻng qoʻli orqali
Endi bizga yordam bermayapti.
Bu mening kulfatimdir.”
12 Ey Egam, ishlaringni men yodga olaman,
Azaliy moʻjizalaringni esga olaman.
13 Hamma ishlaringni xayolimdan oʻtkazaman,
Qudratli ishlaring haqida fikr yuritaman.
14 Sening yoʻling, ey Xudo, muqaddasdir,
Qaysi xudo Senday buyukdir?!
15 Moʻjizalar yaratuvchi Xudo Sensan,
Xalqlar orasida qudratingni koʻrsatgan Sensan.
16 Qudrating bilan Oʻz xalqingni,
Yoqub hamda Yusuf nasllarini qutqargansan.
17 Ey Xudo, suvlar Seni koʻrganda,
Ha, suvlar Seni koʻrganda, qoʻrqib ketdilar,
Tubsiz dengizlar larzaga keldi!
18 Bulutlar yomgʻirin quydi,
Samolar gumburlab yangradi,
Oʻqlaring har tomonda
Yalt etib paydo boʻldi.
19 Gumbur–gumbur eshitildi quyun ichida,
Chaqmoqlaring olamni yoritdi,
Zamin titrab, tebrandi.
20 Yoʻling dengiz orqali oʻtdi,
Soʻqmogʻing bahaybat suvlardan oʻtdi,
Izlaring esa koʻrinmas edi.
21 Xalqingni qoʻy suruviday yetaklab bording,
Muso, Horunni rahnamo qilib tanlading.
