67–САНО
1 Ижрочилар раҳбарига. Довуд саноси. Қўшиқ.
2 Қўзғалсин Худо, тарқалиб кетсин душманлари,
Олдидан қочиб кетсин Ундан нафратланганлар.
3 Тутунни шамол тарқатгани каби,
Худо уларни ҳайдаб юборсин.
Мум оловда эригани каби,
Худо олдида фосиқ ҳалок бўлсин.
4 Солиҳлар эса хурсанд бўлсин,
Худо олдида шод бўлсин,
Улар хурсандликка тўлиб–тошсин.
5 Худога ҳамду санолар куйланг,
Унинг номини тараннум этинг.
У булутларни миниб боради,
Уни улуғланг.
У Эгамиздир!
Ҳузурида шодланинг!
6 У Худодир, макони муқаддасдир,
Етимларнинг отаси, бевалар ҳимоячисидир.
7 Худо ёлғизларни хонадонга жойлаштиради,
Асирларни роҳатга, эркинликка олиб чиқади,
Исёнкорлар эса қақраган ерга эга бўлади.
8 Эй Худо, Ўз халқингнинг олдида борганингда,
Саҳро бўйлаб юриш қилганингда,
Замин титради, осмон ёмғирини қуйди.
9 Сенинг ҳузурингда, эй Синай тоғининг Худоси ,
Сенинг олдингда, эй Исроил халқининг Худоси,
Замин титради, осмон ёмғирини қуйди.
10 Сен, эй Худо, мўл ёмғир бердинг,
Толиққан ерингга қайтадан куч ато этдинг.
11 Халқинг ўша ерда бошпана топди,
Эй Худо, ҳимматингдан муҳтожларни баҳраманд қилдинг.
12 Раббийдан амр келади,
Аёлларнинг катта жамоаси хушхабарни элтади:
13 “Шоҳлару лашкарлар шоша–пиша қочди!”
Ҳа, Исроил аёллари чодирларда ўлжани бўлишиб олади!
14 Ҳатто уйда қолганлар учун ҳам
Бордир кумуш билан қопланган каптар қанотлари,
Ялтироқ олтин билан қопланган каптар патлари.
15 Қодир Худо шоҳларни тўзғитганда,
Залмон тоғига қор ёққандай бўлди.
16 Эй Башаннинг тоғи , улуғвор тоғ,
Эй чўққилари кўп тоғ, Башаннинг тоғи!
17 Эй чўққилари кўп тоғ!
Худо макон қилиб танлаган тоққа
Нега ҳасад билан қарайсан?
Эгамиз то абад у ерда истиқомат қилади.
18 Худонинг жанг аравалари сон–саноқсиздир,
Раббий Синайдан муқаддас маконига келади.
19 Юксакларга чиқди У,
Асирларни ортидан эргаштирди.
Халқлардан ҳадялар олди,
Ҳатто гуноҳкор исёнчилардан ҳам туҳфалар олди.
Ахир, Парвардигор Эгамиз у ерда яшайди!
20 Раббийга олқишлар бўлсин,
У ҳар куни оғирлигимизни кўтаради.
Худо бизнинг нажотимиздир.
21 Худойимиз — нажот бергувчи Худо,
Эгамиз Раббий ўлимдан қутқаради.
22 Худо шубҳасиз душманлар бошини янчади,
Гуноҳ йўлидан юрган одамнинг
Бош суякларини ҳам эзади.
23 Раббий шундай дейди:
“Душманларингни Башандан қайтариб келаман,
Уларни денгиз тубидан олиб келаман.
24 Оёғингни душманларинг қонига ботирасан,
Итларинг ҳам душман қонини ялаб,
Ўз улушини олади.”
25 Эй Худо, зафарли карвонинг кўринмоқда!
Худойим, менинг Шоҳим, Сенинг карвонинг
Муқаддас маконингга бораётгани кўринмоқда!
26 Олдинда қўшиқчилар, орқада созандалар,
Уларнинг ўртасида чилдирма чалган қизлар куйлар:
27 “Олқишлар айтинг Худога буюк жамоа ичра,
Ҳамду санолар ўқинг Эгамизга,
Эй Исроилнинг манбаидан пайдо бўлганлар!”
28 Уларнинг энг кичиги — Бенямин қабиласи олдинда келади,
Ортидан тўп бўлиб Яҳудо шаҳзодалари келади,
Забулун, Нафтали шаҳзодалари уларга эргашади.
29 Эй Худо, кўрсатгин қудратингни!
Эй Худо, аввалгидай намоён қил кучингни!
30 Қуддусдаги Маъбадинг ҳақи–ҳурмати
Шоҳлар Сенга ҳадялар келтиради.
31 Мисрга, қамишзор орасидаги ўша ёввойи ҳайвонга танбеҳ бер,
Халқларга, ўша буқалар подасига, бузоқларига танбеҳ бергин.
Сенга таъзим қилиб, кумушларини назр қилишсин.
Урушдан лаззатланувчи бу халқларни тўзғитгин.
32 Мисрдан бронза келтирилади ,
Ҳабашистон Сенга қўлларин чўзиб, эй Худо,
Ўлпон тўлашга шошилиб қолади.
33-34 Худони тараннум этинг, эй ер юзи шоҳликлари,
Самолар — азалий самолар узра чиққан,
Ҳайбатли овози гулдураган
Раббийга ҳамду санолар куйланг.
35 Ҳаммага эълон қилинг Худонинг қудратини,
Унинг улуғворлиги Исроил устидадир,
Унинг қудрати самолардадир.
36 Худо қўрқинчлидир Ўзининг муқаддас масканида,
Исроил халқининг Худоси куч–қудрат берар Ўз халқига.
Худога олқишлар бўлсин!
67–SANO
1 Ijrochilar rahbariga. Dovud sanosi. Qoʻshiq.
2 Qoʻzgʻalsin Xudo, tarqalib ketsin dushmanlari,
Oldidan qochib ketsin Undan nafratlanganlar.
3 Tutunni shamol tarqatgani kabi,
Xudo ularni haydab yuborsin.
Mum olovda erigani kabi,
Xudo oldida fosiq halok boʻlsin.
4 Solihlar esa xursand boʻlsin,
Xudo oldida shod boʻlsin,
Ular xursandlikka toʻlib–toshsin.
5 Xudoga hamdu sanolar kuylang,
Uning nomini tarannum eting.
U bulutlarni minib boradi,
Uni ulugʻlang.
U Egamizdir!
Huzurida shodlaning!
6 U Xudodir, makoni muqaddasdir,
Yetimlarning otasi, bevalar himoyachisidir.
7 Xudo yolgʻizlarni xonadonga joylashtiradi,
Asirlarni rohatga, erkinlikka olib chiqadi,
Isyonkorlar esa qaqragan yerga ega boʻladi.
8 Ey Xudo, Oʻz xalqingning oldida borganingda,
Sahro boʻylab yurish qilganingda,
Zamin titradi, osmon yomgʻirini quydi.
9 Sening huzuringda, ey Sinay togʻining Xudosi ,
Sening oldingda, ey Isroil xalqining Xudosi,
Zamin titradi, osmon yomgʻirini quydi.
10 Sen, ey Xudo, moʻl yomgʻir berding,
Toliqqan yeringga qaytadan kuch ato etding.
11 Xalqing oʻsha yerda boshpana topdi,
Ey Xudo, himmatingdan muhtojlarni bahramand qilding.
12 Rabbiydan amr keladi,
Ayollarning katta jamoasi xushxabarni eltadi:
13 “Shohlaru lashkarlar shosha–pisha qochdi!”
Ha, Isroil ayollari chodirlarda oʻljani boʻlishib oladi!
14 Hatto uyda qolganlar uchun ham
Bordir kumush bilan qoplangan kaptar qanotlari,
Yaltiroq oltin bilan qoplangan kaptar patlari.
15 Qodir Xudo shohlarni toʻzgʻitganda,
Zalmon togʻiga qor yoqqanday boʻldi.
16 Ey Bashanning togʻi , ulugʻvor togʻ,
Ey choʻqqilari koʻp togʻ, Bashanning togʻi!
17 Ey choʻqqilari koʻp togʻ!
Xudo makon qilib tanlagan toqqa
Nega hasad bilan qaraysan?
Egamiz to abad u yerda istiqomat qiladi.
18 Xudoning jang aravalari son–sanoqsizdir,
Rabbiy Sinaydan muqaddas makoniga keladi.
19 Yuksaklarga chiqdi U,
Asirlarni ortidan ergashtirdi.
Xalqlardan hadyalar oldi,
Hatto gunohkor isyonchilardan ham tuhfalar oldi.
Axir, Parvardigor Egamiz u yerda yashaydi!
20 Rabbiyga olqishlar boʻlsin,
U har kuni ogʻirligimizni koʻtaradi.
Xudo bizning najotimizdir.
21 Xudoyimiz — najot berguvchi Xudo,
Egamiz Rabbiy oʻlimdan qutqaradi.
22 Xudo shubhasiz dushmanlar boshini yanchadi,
Gunoh yoʻlidan yurgan odamning
Bosh suyaklarini ham ezadi.
23 Rabbiy shunday deydi:
“Dushmanlaringni Bashandan qaytarib kelaman,
Ularni dengiz tubidan olib kelaman.
24 Oyogʻingni dushmanlaring qoniga botirasan,
Itlaring ham dushman qonini yalab,
Oʻz ulushini oladi.”
25 Ey Xudo, zafarli karvoning koʻrinmoqda!
Xudoyim, mening Shohim, Sening karvoning
Muqaddas makoningga borayotgani koʻrinmoqda!
26 Oldinda qoʻshiqchilar, orqada sozandalar,
Ularning oʻrtasida childirma chalgan qizlar kuylar:
27 “Olqishlar ayting Xudoga buyuk jamoa ichra,
Hamdu sanolar oʻqing Egamizga,
Ey Isroilning manbaidan paydo boʻlganlar!”
28 Ularning eng kichigi — Benyamin qabilasi oldinda keladi,
Ortidan toʻp boʻlib Yahudo shahzodalari keladi,
Zabulun, Naftali shahzodalari ularga ergashadi.
29 Ey Xudo, koʻrsatgin qudratingni!
Ey Xudo, avvalgiday namoyon qil kuchingni!
30 Quddusdagi Maʼbading haqi–hurmati
Shohlar Senga hadyalar keltiradi.
31 Misrga, qamishzor orasidagi oʻsha yovvoyi hayvonga tanbeh ber,
Xalqlarga, oʻsha buqalar podasiga, buzoqlariga tanbeh bergin.
Senga taʼzim qilib, kumushlarini nazr qilishsin.
Urushdan lazzatlanuvchi bu xalqlarni toʻzgʻitgin.
32 Misrdan bronza keltiriladi ,
Habashiston Senga qoʻllarin choʻzib, ey Xudo,
Oʻlpon toʻlashga shoshilib qoladi.
33-34 Xudoni tarannum eting, ey yer yuzi shohliklari,
Samolar — azaliy samolar uzra chiqqan,
Haybatli ovozi gulduragan
Rabbiyga hamdu sanolar kuylang.
35 Hammaga eʼlon qiling Xudoning qudratini,
Uning ulugʻvorligi Isroil ustidadir,
Uning qudrati samolardadir.
36 Xudo qoʻrqinchlidir Oʻzining muqaddas maskanida,
Isroil xalqining Xudosi kuch–qudrat berar Oʻz xalqiga.
Xudoga olqishlar boʻlsin!
