65–САНО
Ижрочилар раҳбарига. Сано. Қўшиқ.
1 Худога шодлик ила ҳайқиринг,
Эй ер юзидаги инсонлар!
2 Худонинг улуғворлигини куйланг!
Унга ажойиб ҳамду санолар айтинг!
3 Худога айтинглар:
“Сенинг ишларинг нақадар ғаройиб!
Қудратинг буюклигидан
Душманларинг олдингда титраб тиз чўкади.
4 Бутун замин Сенга сажда қилади,
Улар Сенга ҳамду сано айтади,
Ҳа, Ўзингга ҳамду сано куйлайди.”
5 Кел! Худо нима қилганини кўргин!
Инсон манфаати учун қилган
Ғаройиб ишларини кўргин!
6 Худо денгизни қуруқ ерга айлантирди,
Ота–боболаримиз баҳрдан юриб ўтди ,
У ерда қилган ишларидан,
Худо туфайли биз севинамиз.
7 Қудрати ила то абад ҳукм суради,
Кўзлари халқларни кузатиб туради,
Унга қарши исёнчилар қўзғалмасин.
8 Эй халқлар, Худойимизга олқишлар айтинг,
Унинг ҳамду саноси янграсин.
9 У бизнинг ҳаётимизни сақлаган,
Оёқларимизни тойиб кетишдан асраган.
10 Эй Худо, Сен бизни синадинг,
Кумушни тозалагандай бизни тозаладинг.
11 Бизни тузоққа йўлиқтирдинг,
Елкамизга оғир юк ортдинг.
12 Араваларни бошимиз узра юргиздинг,
Олов, сувлардан биз кечиб ўтдик,
Фаровонликка бизни олиб келдинг.
13 Куйдириладиган қурбонликлар билан
Сенга берган онтимни адо этгани
Мен Сенинг уйингга келаман.
14 Кулфатда қолганимда онт ичган эдим,
Тилим ваъда берган, оғзим сўйлаган эди.
15 Бўрдоқиларни куйдириб, Сенга қурбонлик қиламан.
Қўчқор, така, буқаларни келтираман.
Қурбонликларнинг ҳиди самога етиб боради.
16 Эй Худодан қўрққанлар, келиб эшитинглар,
Мен учун У нима қилганин сўзлаб берайин.
17 Мадад сўраб Худога ёлвордим,
Унинг ҳамду саноси ҳеч тилимдан тушмади.
18 Юрагимда гуноҳим бўлса эди,
Мени асло эшитмас эди Раббий.
19 Худо мени тинглади,
Ибодат қилганимда, овозимни эшитди.
20 Худога олқишлар бўлсин!
Ибодатимни У рад қилмади,
Содиқ севгисини мендан дариғ тутмади.
65–SANO
Ijrochilar rahbariga. Sano. Qoʻshiq.
1 Xudoga shodlik ila hayqiring,
Ey yer yuzidagi insonlar!
2 Xudoning ulugʻvorligini kuylang!
Unga ajoyib hamdu sanolar ayting!
3 Xudoga aytinglar:
“Sening ishlaring naqadar gʻaroyib!
Qudrating buyukligidan
Dushmanlaring oldingda titrab tiz choʻkadi.
4 Butun zamin Senga sajda qiladi,
Ular Senga hamdu sano aytadi,
Ha, Oʻzingga hamdu sano kuylaydi.”
5 Kel! Xudo nima qilganini koʻrgin!
Inson manfaati uchun qilgan
Gʻaroyib ishlarini koʻrgin!
6 Xudo dengizni quruq yerga aylantirdi,
Ota–bobolarimiz bahrdan yurib oʻtdi ,
U yerda qilgan ishlaridan,
Xudo tufayli biz sevinamiz.
7 Qudrati ila to abad hukm suradi,
Koʻzlari xalqlarni kuzatib turadi,
Unga qarshi isyonchilar qoʻzgʻalmasin.
8 Ey xalqlar, Xudoyimizga olqishlar ayting,
Uning hamdu sanosi yangrasin.
9 U bizning hayotimizni saqlagan,
Oyoqlarimizni toyib ketishdan asragan.
10 Ey Xudo, Sen bizni sinading,
Kumushni tozalaganday bizni tozalading.
11 Bizni tuzoqqa yoʻliqtirding,
Yelkamizga ogʻir yuk ortding.
12 Aravalarni boshimiz uzra yurgizding,
Olov, suvlardan biz kechib oʻtdik,
Farovonlikka bizni olib kelding.
13 Kuydiriladigan qurbonliklar bilan
Senga bergan ontimni ado etgani
Men Sening uyingga kelaman.
14 Kulfatda qolganimda ont ichgan edim,
Tilim vaʼda bergan, ogʻzim soʻylagan edi.
15 Boʻrdoqilarni kuydirib, Senga qurbonlik qilaman.
Qoʻchqor, taka, buqalarni keltiraman.
Qurbonliklarning hidi samoga yetib boradi.
16 Ey Xudodan qoʻrqqanlar, kelib eshitinglar,
Men uchun U nima qilganin soʻzlab berayin.
17 Madad soʻrab Xudoga yolvordim,
Uning hamdu sanosi hech tilimdan tushmadi.
18 Yuragimda gunohim boʻlsa edi,
Meni aslo eshitmas edi Rabbiy.
19 Xudo meni tingladi,
Ibodat qilganimda, ovozimni eshitdi.
20 Xudoga olqishlar boʻlsin!
Ibodatimni U rad qilmadi,
Sodiq sevgisini mendan darigʻ tutmadi.
