62–САНО
1 Довуд Яҳудо чўлида бўлгандан кейин , унинг айтган саноси.
2 Эй Худо, менинг Худойимсан, интиламан Сенга,
Қуруқ, толиққан сувсиз тупроқдай
Жоним ташнадир Сенга,
Вужудим орзуманддир Сенга.
3 Муқаддас масканингда Сенга нигоҳ ташладим,
Қудратингни, шуҳратингни кўрдим.
4 Ҳаётдан афзал Сенинг севгинг,
Тилимдан тушмас Сенга мадҳия.
5 Бир умр Сени олқишлайман,
Қўлларимни кўтариб, Сенга сажда қиламан.
6 Илик билан ёғ егандай жоним мамнун бўлади,
Шодиёна қўшиқлар ила Сени мадҳ қиламан.
7 Ўрнимда ётиб ҳам, Сени эслайман,
Сени ўйлаб, тунни қарши оламан.
8 Ўзинг менинг мададкорим бўлдинг,
Қанотларинг соясида севинч ила куйлайман.
9 Сенинг ортингдан қолмай эргашаман,
Ўнг қўлинг мени маҳкам тутади.
10 Жонимнинг пайига тушганлар
Ернинг қаърига тушиб йўқ бўлиб кетади.
11 Улар қиличнинг дамига йўлиқади,
Чиябўриларга ем бўлади.
12 Шоҳ эса Худодан севинч топади,
Худо номи билан онт ичганлар Уни мадҳ қилади,
Ёлғончиларнинг оғзи эса ёпилади.
62–SANO
1 Dovud Yahudo choʻlida boʻlgandan keyin , uning aytgan sanosi.
2 Ey Xudo, mening Xudoyimsan, intilaman Senga,
Quruq, toliqqan suvsiz tuproqday
Jonim tashnadir Senga,
Vujudim orzumanddir Senga.
3 Muqaddas maskaningda Senga nigoh tashladim,
Qudratingni, shuhratingni koʻrdim.
4 Hayotdan afzal Sening sevging,
Tilimdan tushmas Senga madhiya.
5 Bir umr Seni olqishlayman,
Qoʻllarimni koʻtarib, Senga sajda qilaman.
6 Ilik bilan yogʻ yeganday jonim mamnun boʻladi,
Shodiyona qoʻshiqlar ila Seni madh qilaman.
7 Oʻrnimda yotib ham, Seni eslayman,
Seni oʻylab, tunni qarshi olaman.
8 Oʻzing mening madadkorim boʻlding,
Qanotlaring soyasida sevinch ila kuylayman.
9 Sening ortingdan qolmay ergashaman,
Oʻng qoʻling meni mahkam tutadi.
10 Jonimning payiga tushganlar
Yerning qaʼriga tushib yoʻq boʻlib ketadi.
11 Ular qilichning damiga yoʻliqadi,
Chiyaboʻrilarga yem boʻladi.
12 Shoh esa Xudodan sevinch topadi,
Xudo nomi bilan ont ichganlar Uni madh qiladi,
Yolgʻonchilarning ogʻzi esa yopiladi.
