59–САНО
1-2 Ижрочилар раҳбарига. Довуд Орам–Нахрайим ва Орам–Зўво халқи билан уруш қилаётган пайтда Йўаб қайтиб келиб, ўн икки минг Эдомликни Туз водийсида ўлдиргандан кейин, Довуднинг айтган қўшиғи. “Нилуфар гул шаҳодати” куйига айтилади. Таълим учун.
3 Эй Худо, бизни тарк этдинг,
Мудофаамизни ёриб ўтдинг,
Биздан ғазабландинг,
Энди бизни олдинги ҳолимизга қайтаргин!
4 Ерни силкитдинг, ёриқлар очдинг,
Ёриқларни тузатгин, ер тебранмоқда.
5 Халқингга кўп азоблар бердинг,
Гандираклаб юрсин деб, ичгани шароб бердинг.
6 Улар камон ўқларидан яшириниб олсин дея ,
Ўзингдан қўрққанларга ишора бериб, байроқ кўрсатасан.
7 Ўнг қўлинг ила ғалаба ато қилгин,
Илтижоимизга жавоб бергин ,
Суюкли бандаларинг нажот топсин.
8 Эй Худо, Ўз муқаддас маконингдан ваъда бергансан :
“Шодланиб, Шакамни бўлиб ташлайман,
Сухот водийсини тақсимлаб бераман.
9 Гилад Меникидир, Манаше Меникидир,
Эфрайим дубулғамдир, Яҳудо салтанат ҳассамдир.
10 Мўаб Менинг қўлювгичимдир,
Эдом узра чориғимни отаман ,
Олқишланг Мени, эй Филистлар! ”
11 Эй Худо, қанийди мустаҳкам шаҳарга мени олиб борсалар,
Эдомга мени бошлаб борсалар.
12 Ахир, бизни Ўзинг рад этдинг–ку!
Лашкаримизга йўлбошчилик қилмаяпсан–ку энди!
13 Душмандан қутқариб, бизга ёрдам бер,
Инсоннинг ёрдами бутунлай беҳуда.
14 Эй Худо, Сен билан биз ғолиб бўламиз,
Душманларимизни Сен янчиб ташлайсан.
59–SANO
1-2 Ijrochilar rahbariga. Dovud Oram–Naxrayim va Oram–Zoʻvo xalqi bilan urush qilayotgan paytda Yoʻab qaytib kelib, oʻn ikki ming Edomlikni Tuz vodiysida oʻldirgandan keyin, Dovudning aytgan qoʻshigʻi. “Nilufar gul shahodati” kuyiga aytiladi. Taʼlim uchun.
3 Ey Xudo, bizni tark etding,
Mudofaamizni yorib oʻtding,
Bizdan gʻazablanding,
Endi bizni oldingi holimizga qaytargin!
4 Yerni silkitding, yoriqlar ochding,
Yoriqlarni tuzatgin, yer tebranmoqda.
5 Xalqingga koʻp azoblar berding,
Gandiraklab yursin deb, ichgani sharob berding.
6 Ular kamon oʻqlaridan yashirinib olsin deya ,
Oʻzingdan qoʻrqqanlarga ishora berib, bayroq koʻrsatasan.
7 Oʻng qoʻling ila gʻalaba ato qilgin,
Iltijoimizga javob bergin ,
Suyukli bandalaring najot topsin.
8 Ey Xudo, Oʻz muqaddas makoningdan vaʼda bergansan :
“Shodlanib, Shakamni boʻlib tashlayman,
Suxot vodiysini taqsimlab beraman.
9 Gilad Menikidir, Manashe Menikidir,
Efrayim dubulgʻamdir, Yahudo saltanat hassamdir.
10 Moʻab Mening qoʻlyuvgichimdir,
Edom uzra chorigʻimni otaman ,
Olqishlang Meni, ey Filistlar! ”
11 Ey Xudo, qaniydi mustahkam shaharga meni olib borsalar,
Edomga meni boshlab borsalar.
12 Axir, bizni Oʻzing rad etding–ku!
Lashkarimizga yoʻlboshchilik qilmayapsan–ku endi!
13 Dushmandan qutqarib, bizga yordam ber,
Insonning yordami butunlay behuda.
14 Ey Xudo, Sen bilan biz gʻolib boʻlamiz,
Dushmanlarimizni Sen yanchib tashlaysan.
