57–САНО
1 Ижрочилар раҳбарига. “Хароб этма” куйига айтиладиган Довуд қўшиғи.
2 Эй ҳукмдорлар! Наҳот сиз адолатли қарор чиқарасиз?!
Наҳот сизлар тўғрилик ила халқларни ҳукм қиласиз?!
3 Йўқ, ахир, юракларингиз адолатсизликка тўла–ку!
Ер юзида қўлларингиз зўравонликни тақсимлайди–ку!
4 Фосиқлар онасининг қорнидаёқ адашади,
Ёлғончилар туғилишданоқ йўлдан озади.
5 Уларнинг заҳри илоннинг заҳрига ўхшайди.
Кар илондай қулоқ солишни улар истамайди.
6 Илон ўйнатувчининг куйини улар эшитмайди,
Унинг маҳорат билан чалган куйига бепарво.
7 Синдир уларнинг тишларини, эй Худо,
Суғуриб ол шерларнинг қозиқ тишларини, эй Эгам!
8 Улар оқар сувдай йўқ бўлиб кетсин,
Уларнинг ўқлари нишонга тегмайдиган бўлсин.
9 Балчиққа ботиб кетган шиллиқ қуртдай бўлсин,
Онаси қорнидан ўлик туғилиб,
Ҳеч қачон қуёш кўрмаган чақалоқдай бўлсин.
10 Ёнаётган тикан қозонни тез қиздиргандай
Фосиқни шунчалик тез супуриб йўқ қилгин.
11 Фосиқдан ўч олинганда, солиҳ севинади,
Уларнинг қонида солиҳ оёқларини ювади.
12 Одамлар айтар: “Шубҳасиз, солиҳга мукофот бордир,
Ер юзида ҳукм қилувчи Худо албатта бордир.”
57–SANO
1 Ijrochilar rahbariga. “Xarob etma” kuyiga aytiladigan Dovud qoʻshigʻi.
2 Ey hukmdorlar! Nahot siz adolatli qaror chiqarasiz?!
Nahot sizlar toʻgʻrilik ila xalqlarni hukm qilasiz?!
3 Yoʻq, axir, yuraklaringiz adolatsizlikka toʻla–ku!
Yer yuzida qoʻllaringiz zoʻravonlikni taqsimlaydi–ku!
4 Fosiqlar onasining qornidayoq adashadi,
Yolgʻonchilar tugʻilishdanoq yoʻldan ozadi.
5 Ularning zahri ilonning zahriga oʻxshaydi.
Kar ilonday quloq solishni ular istamaydi.
6 Ilon oʻynatuvchining kuyini ular eshitmaydi,
Uning mahorat bilan chalgan kuyiga beparvo.
7 Sindir ularning tishlarini, ey Xudo,
Sugʻurib ol sherlarning qoziq tishlarini, ey Egam!
8 Ular oqar suvday yoʻq boʻlib ketsin,
Ularning oʻqlari nishonga tegmaydigan boʻlsin.
9 Balchiqqa botib ketgan shilliq qurtday boʻlsin,
Onasi qornidan oʻlik tugʻilib,
Hech qachon quyosh koʻrmagan chaqaloqday boʻlsin.
10 Yonayotgan tikan qozonni tez qizdirganday
Fosiqni shunchalik tez supurib yoʻq qilgin.
11 Fosiqdan oʻch olinganda, solih sevinadi,
Ularning qonida solih oyoqlarini yuvadi.
12 Odamlar aytar: “Shubhasiz, solihga mukofot bordir,
Yer yuzida hukm qiluvchi Xudo albatta bordir.”
