54–САНО
1 Ижрочилар раҳбарига. Торли асбоблар жўрлигида айтиладиган Довуд қасидаси .
2 Ибодатимга қулоқ сол, эй Худо,
Илтижоимни эътиборсиз қолдирма.
3-4 Эшит мени, жавоб бер,
Душманларим дағдағаси, фосиқларнинг сиқуви
Бошимга ғам–кулфат келтиради.
Улар ғазабланиб, мендан нафратланади.
Эҳ, ўйларим қийнайди мени,
Ғам–ташвишлар қаттиқ эзади.
5 Юрагим ҳасратга тўладир,
Ўлим ваҳимаси мени босиб келадир.
6 Қўрқув, титроқ менга келмоқда,
Даҳшат мени эзиб бормоқда.
7 “Қанийди каптар каби, қанотим бўлса”, дедим,
“Учиб кетиб, ором олган бўлардим.
8 Ҳақиқатан, узоқларга учиб қутулардим,
Саҳрода макон қилган бўлардим.
9 Қутурган шамолу бўрондан қочиб,
Ўзимга бошпана топгани шошилган бўлардим.”
10 Эй Раббий, душманларимни чалғит,
Уларнинг гапларини чалкаштир.
Шаҳарда зўравонлик, жанжални кўриб турибман.
11 Фосиқлар кеча–кундуз шаҳар девори устида изғийди,
Ёвузлик, ваҳима шаҳар ичида юз бермоқда.
12 Шаҳарнинг ўртасида бузғунчилик,
Кўчаларидан зулм ва ҳийла аримайди.
13 Ғанимларим мени ҳақорат қилганда эди,
Бунга бардошим етган бўларди.
Душманим ўзини мендан юқори қўйганда эди,
Ундан яширинган бўлардим.
14 Аммо у менинг тенгим–ку,
Яқин дўстим ҳамда ҳамроҳим–ку.
15 У билан дилкаш дўст эдик,
Эй Худо, Сенинг уйингдаги йиғинда бирга юрардик.
16 Уйлари, юраклари фосиқликка тўла бўлгани учун
Ғанимларим ўлимга рўбарў бўлсин,
Тириклайин ўликлар диёрига тушсин.
17 Мен илтижо қиламан Худога,
Нажот беради Эгам менга.
18 Оқшом, саҳар ҳамда кундуз
Дарду фиғонларимни айтаман.
Эгам менинг овозимни эшитади.
19 Гарчи менга қаршилар кўп бўлса ҳам,
Бирорта ҳам зарар етказмай
Мени жанглардан қутқаради.
20 Азалдан тахтда ўтирган Худо
Менга қулоқ тутиб,
Душманларимни мағлуб қилади.
Ахир, улар ўз йўлидан қайтмадилар,
Худодан улар қўрқмадилар.
21 Ҳамроҳим ўз дўстига қарши қўлини кўтарди,
Мен билан қилган аҳдига у хиёнат қилди.
22 Унинг оғзидан бол томади,
Юраги эса адоватга тўла.
Сўзлари мойдан ҳам ёқимли,
Аслида қиндан чиққан қиличдайдир.
23 Ташвишларингни Эгамизга топширгин,
У сенга таянч бўлади.
Эгамиз ҳеч қачон солиҳнинг йиқилишига йўл қўймайди.
24 Эй Худо, фосиқларни Сен
Ўликлар диёрига улоқтирасан.
Қонхўр, хоин кимсалар асло
Умрининг ярмисини ҳам яшамайди.
Мен эса Сенга умид боғлайман.
54–SANO
1 Ijrochilar rahbariga. Torli asboblar joʻrligida aytiladigan Dovud qasidasi .
2 Ibodatimga quloq sol, ey Xudo,
Iltijoimni eʼtiborsiz qoldirma.
3-4 Eshit meni, javob ber,
Dushmanlarim dagʻdagʻasi, fosiqlarning siquvi
Boshimga gʻam–kulfat keltiradi.
Ular gʻazablanib, mendan nafratlanadi.
Eh, oʻylarim qiynaydi meni,
Gʻam–tashvishlar qattiq ezadi.
5 Yuragim hasratga toʻladir,
Oʻlim vahimasi meni bosib keladir.
6 Qoʻrquv, titroq menga kelmoqda,
Dahshat meni ezib bormoqda.
7 “Qaniydi kaptar kabi, qanotim boʻlsa”, dedim,
“Uchib ketib, orom olgan boʻlardim.
8 Haqiqatan, uzoqlarga uchib qutulardim,
Sahroda makon qilgan boʻlardim.
9 Quturgan shamolu boʻrondan qochib,
Oʻzimga boshpana topgani shoshilgan boʻlardim.”
10 Ey Rabbiy, dushmanlarimni chalgʻit,
Ularning gaplarini chalkashtir.
Shaharda zoʻravonlik, janjalni koʻrib turibman.
11 Fosiqlar kecha–kunduz shahar devori ustida izgʻiydi,
Yovuzlik, vahima shahar ichida yuz bermoqda.
12 Shaharning oʻrtasida buzgʻunchilik,
Koʻchalaridan zulm va hiyla arimaydi.
13 Gʻanimlarim meni haqorat qilganda edi,
Bunga bardoshim yetgan boʻlardi.
Dushmanim oʻzini mendan yuqori qoʻyganda edi,
Undan yashiringan boʻlardim.
14 Ammo u mening tengim–ku,
Yaqin doʻstim hamda hamrohim–ku.
15 U bilan dilkash doʻst edik,
Ey Xudo, Sening uyingdagi yigʻinda birga yurardik.
16 Uylari, yuraklari fosiqlikka toʻla boʻlgani uchun
Gʻanimlarim oʻlimga roʻbaroʻ boʻlsin,
Tiriklayin oʻliklar diyoriga tushsin.
17 Men iltijo qilaman Xudoga,
Najot beradi Egam menga.
18 Oqshom, sahar hamda kunduz
Dardu figʻonlarimni aytaman.
Egam mening ovozimni eshitadi.
19 Garchi menga qarshilar koʻp boʻlsa ham,
Birorta ham zarar yetkazmay
Meni janglardan qutqaradi.
20 Azaldan taxtda oʻtirgan Xudo
Menga quloq tutib,
Dushmanlarimni magʻlub qiladi.
Axir, ular oʻz yoʻlidan qaytmadilar,
Xudodan ular qoʻrqmadilar.
21 Hamrohim oʻz doʻstiga qarshi qoʻlini koʻtardi,
Men bilan qilgan ahdiga u xiyonat qildi.
22 Uning ogʻzidan bol tomadi,
Yuragi esa adovatga toʻla.
Soʻzlari moydan ham yoqimli,
Aslida qindan chiqqan qilichdaydir.
23 Tashvishlaringni Egamizga topshirgin,
U senga tayanch boʻladi.
Egamiz hech qachon solihning yiqilishiga yoʻl qoʻymaydi.
24 Ey Xudo, fosiqlarni Sen
Oʻliklar diyoriga uloqtirasan.
Qonxoʻr, xoin kimsalar aslo
Umrining yarmisini ham yashamaydi.
Men esa Senga umid bogʻlayman.
