34–САНО
Довуд саноси.
1 Эй Эгам, менга қарши чиққанларга Ўзинг қарши бўл.
Менга ҳужум қилганлар билан Ўзинг жанг қил.
2 Қалқону совутингни ол,
Қани, менга ёрдамга кел.
3 Мени таъқиб қилганларга қарши
Найзаю болтангни олгин.
“Сенга нажот бераман”, деб
Ўзинг менга ваъда бергин.
4 Менинг жонимга қасд қилганлар
Шармандаю шармисор бўлсин!
Менга қарши фитна қилаётганлар
Уятга қолиб, орқага қайтсин!
5 Эй Эгам, Сенинг фариштанг уларни қувсин.
Ҳа, улар худди шамолда учган сомондай бўлсин.
6 Қоронғи, сирпанчиқ бўлсин уларнинг йўли,
Эй Эгам, Сенинг фариштанг уларни қувсин.
7 Сабабсиз менга тузоқ қўйдилар,
Мени тутиб олиб ўлдирмоқ учун
Сабабсиз менга чуқур қазидилар.
8 Тўсатдан уларнинг бошига ҳалокат келсин,
Қўйган тузоғига ўзлари ўралиб қолсин,
Қазиган чуқурга ўзлари йиқилиб, битсин.
9 Шунда, эй Эгам, Сен туфайли шод бўламан,
Нажот берганинг учун қувонаман.
10 Бутун вужудим хитоб қилади:
“Сенга ўхшаши йўқ, эй Эгам,
Бечорани зўравондан қутқарасан,
Фақирни талончидан қутқарасан.”
11 Ёвуз ниятли гувоҳлар пайдо бўлади,
Билмайдиган нарсаларимни мендан сўрайди.
12 Улар яхшилигимга ёмонлик қайтаради,
Ўзимни тамом ёлғиз ҳис қиламан.
13 Улар хаста бўлганларида эса
Мен қанор кийиб, рўза тутиб, қайғу чекардим .
Бошимни қуйи солиб, ибодат қилардим .
14 Дўстим, биродарим, дея ташвиш тортардим,
Туққан онам учун аза тутгандай,
Қайғудан бошимни эгиб юрардим.
15 Қоқилганимда эса улар шод бўлдилар,
Менга қарши йиғилишиб келдилар,
Бехабар эканман, улар каллакесар экан,
Тўхтовсиз менга бўҳтон қилдилар.
16 Шаккоклардай аёвсиз масхара қилдилар,
Менга қараб тишларини ғижирлатдилар.
17 Эй Эгам, қачонгача қараб турасан?
Қутқаргин мени уларнинг ҳужумидан,
Халос қилгин жонимни ўша шерлардан!
18 Буюк жамоа ичра Сенга шукур айтаман,
Халқ йиғинларида Сенга ҳамдлар ўқийман.
19 Асоссиз менга душманлик қилганлар
Устимдан кулмасинлар,
Мендан сабабсиз нафрат этганлар
Кўзларини ўйнатмасинлар.
20 Тинчлик сўзини оғизга олмас улар,
Аммо юртда тинч яшаётганлар устидан
Ёлғон сўзларни ўйлаб топарлар.
21 Менга қарши шанғиллаб айтарлар улар:
“Аҳа, кўзларимиз билан кўрдик қилмишларини.”
22 Ўзинг кўргансан, эй Эгам, сукут сақлама!
Эй Раббий, мендан ҳеч узоқлашма!
23 Қани, бўл, ҳимоя қилгин мени,
Мен учун жанг қилгин, эй Худойим, Раббим!
24 Сен одилсан, эй Эгам Худо,
Шу боис мени оқлагин.
Душманларим асло устимдан кулмасин.
25 Улар ўзларига ўзлари:
“Аҳа, истаганимиз бўлди–ку!” деб айтмасин.
“Уни ютиб юбордик–ку”, демасин.
26 Кулфатларимдан завқланганларнинг ҳаммаси
Шармандаю шармисор бўлсин.
Мендан ўзларини юқори қўйганлар
Шармандалик, бадномликка ўралсин.
27 Мен ҳақ бўлиб чиқишимни истаганлар
Хурсанд бўлсин, севинч ила куйласин.
Ҳар доим айтаверсин улар:
“Қулининг саодатидан ҳузурланган
Эгамиз тобора юксалаверсин.”
28 Одиллигинг ҳақидаги сўзлару мадҳинг
Кун бўйи тилимдан тушмайди.
34–SANO
Dovud sanosi.
1 Ey Egam, menga qarshi chiqqanlarga Oʻzing qarshi boʻl.
Menga hujum qilganlar bilan Oʻzing jang qil.
2 Qalqonu sovutingni ol,
Qani, menga yordamga kel.
3 Meni taʼqib qilganlarga qarshi
Nayzayu boltangni olgin.
“Senga najot beraman”, deb
Oʻzing menga vaʼda bergin.
4 Mening jonimga qasd qilganlar
Sharmandayu sharmisor boʻlsin!
Menga qarshi fitna qilayotganlar
Uyatga qolib, orqaga qaytsin!
5 Ey Egam, Sening farishtang ularni quvsin.
Ha, ular xuddi shamolda uchgan somonday boʻlsin.
6 Qorongʻi, sirpanchiq boʻlsin ularning yoʻli,
Ey Egam, Sening farishtang ularni quvsin.
7 Sababsiz menga tuzoq qoʻydilar,
Meni tutib olib oʻldirmoq uchun
Sababsiz menga chuqur qazidilar.
8 Toʻsatdan ularning boshiga halokat kelsin,
Qoʻygan tuzogʻiga oʻzlari oʻralib qolsin,
Qazigan chuqurga oʻzlari yiqilib, bitsin.
9 Shunda, ey Egam, Sen tufayli shod boʻlaman,
Najot berganing uchun quvonaman.
10 Butun vujudim xitob qiladi:
“Senga oʻxshashi yoʻq, ey Egam,
Bechorani zoʻravondan qutqarasan,
Faqirni talonchidan qutqarasan.”
11 Yovuz niyatli guvohlar paydo boʻladi,
Bilmaydigan narsalarimni mendan soʻraydi.
12 Ular yaxshiligimga yomonlik qaytaradi,
Oʻzimni tamom yolgʻiz his qilaman.
13 Ular xasta boʻlganlarida esa
Men qanor kiyib, roʻza tutib, qaygʻu chekardim .
Boshimni quyi solib, ibodat qilardim .
14 Doʻstim, birodarim, deya tashvish tortardim,
Tuqqan onam uchun aza tutganday,
Qaygʻudan boshimni egib yurardim.
15 Qoqilganimda esa ular shod boʻldilar,
Menga qarshi yigʻilishib keldilar,
Bexabar ekanman, ular kallakesar ekan,
Toʻxtovsiz menga boʻhton qildilar.
16 Shakkoklarday ayovsiz masxara qildilar,
Menga qarab tishlarini gʻijirlatdilar.
17 Ey Egam, qachongacha qarab turasan?
Qutqargin meni ularning hujumidan,
Xalos qilgin jonimni oʻsha sherlardan!
18 Buyuk jamoa ichra Senga shukur aytaman,
Xalq yigʻinlarida Senga hamdlar oʻqiyman.
19 Asossiz menga dushmanlik qilganlar
Ustimdan kulmasinlar,
Mendan sababsiz nafrat etganlar
Koʻzlarini oʻynatmasinlar.
20 Tinchlik soʻzini ogʻizga olmas ular,
Ammo yurtda tinch yashayotganlar ustidan
Yolgʻon soʻzlarni oʻylab toparlar.
21 Menga qarshi shangʻillab aytarlar ular:
“Aha, koʻzlarimiz bilan koʻrdik qilmishlarini.”
22 Oʻzing koʻrgansan, ey Egam, sukut saqlama!
Ey Rabbiy, mendan hech uzoqlashma!
23 Qani, boʻl, himoya qilgin meni,
Men uchun jang qilgin, ey Xudoyim, Rabbim!
24 Sen odilsan, ey Egam Xudo,
Shu bois meni oqlagin.
Dushmanlarim aslo ustimdan kulmasin.
25 Ular oʻzlariga oʻzlari:
“Aha, istaganimiz boʻldi–ku!” deb aytmasin.
“Uni yutib yubordik–ku”, demasin.
26 Kulfatlarimdan zavqlanganlarning hammasi
Sharmandayu sharmisor boʻlsin.
Mendan oʻzlarini yuqori qoʻyganlar
Sharmandalik, badnomlikka oʻralsin.
27 Men haq boʻlib chiqishimni istaganlar
Xursand boʻlsin, sevinch ila kuylasin.
Har doim aytaversin ular:
“Qulining saodatidan huzurlangan
Egamiz tobora yuksalaversin.”
28 Odilliging haqidagi soʻzlaru madhing
Kun boʻyi tilimdan tushmaydi.
