30–САНО
1 Ижрочилар раҳбарига. Довуд саноси.
2 Эй Эгам, Сенда мен паноҳ топаман,
Шарманда бўлишимга асло йўл қўйма,
Адолатлисан, мени қутқаргин.
3 Қулоқ тут менга, дарров халос қилгин,
Менинг паноҳ қоям бўлгин.
Нажот топай, мустаҳкам қўрғоним бўлгин.
4 Чиндан ҳам Сен суянган қоямсан, қалъамсан,
Ўз номинг ҳақи мени етакла, йўл кўрсатгин.
5 Сен менинг паноҳимсан.
Қўйилган тузоқдан мени қутқаргин.
6 Ҳаётимни Сенга топшираман, эй Эгам,
Мени қутқарасан, эй содиқ Худо.
7 Сохта худоларни иззатлаганларга
Мен нафратимни сочаман.
Эй Эгам, мен Сенга умид боғлайман.
8 Содиқ севгинг ила шод–хуррам бўлай,
Қайғуларимни Ўзинг кўргансан,
Жоним азобда қолганини биласан.
9 Мени ғаним қўлига бермадинг,
Оёқларимни бехавотир ерга қўйдинг.
10 Раҳм қил, эй Эгам, кулфатда қолдим,
Кўзларим қайғудан толди,
Жону танам адойи тамом бўлди.
11 Ҳаётим азоб билан тугайди,
Йилларим оҳ–воҳ билан битади.
Гуноҳларим дастидан кучдан қолдим,
Этларим суякларимга ёпишиб кетган.
12 Душманларим мени ҳақорат қилади,
Қўшниларим мендан ҳазар қилади.
Дўстларим ҳам мендан қўрқади,
Кўчада кўриб мени, қочиб кетади.
13 Мени унутдилар, гўё ўлганман,
Гўё синган сопол идиш кабиман.
14 Эшитяпман, кўпчилик ғийбат қилади,
Атрофимни даҳшат ўраб олган.
Биргаликда менга қарши фитна тўқишади,
Мени ўлдирмоқни ният қилишади.
15 Эй Эгам, мен Сенга умид боғлайман,
“Менинг Худойим Сенсан”, деб айтаман.
16 Ҳаётим Сенинг қўлингдадир,
Ғанимларим қўлидан,
Пайимга тушганлардан мени қутқаргин.
17 Жамолинг мен, қулингга нурларини сочсин,
Сен содиқсан, мени қутқаргин.
18 Йўл қўйма, эй Эгам, шарманда бўлишимга,
Мадад сўраб илтижо қилдим Сенга.
Қабиҳлар шармандаи шармисор бўлсин,
Ўликлар диёрига жим кириб борсин.
19 Ўчсин уларнинг ёлғончи овозлари,
Зеро, такаббурлик ва нафрат билан
Улар солиҳга қарши сўйлар.
20 О, нақадар буюкдир Сенинг эзгулигинг!
Ўзингдан қўрққанларга уни сақлаб қўйгансан,
Сенда паноҳ топганларга ҳадя қиласан,
Ҳамманинг кўзи олдида инъом қиласан.
21 Ҳузурингда уларни ҳимоя қиласан,
Инсон фитналаридан омон сақлайсан.
Уларни Ўз чодиринг остида
Иғволардан сақлаб турасан.
22 Қамалда қолган шаҳардай бўлганимда
Менга ажойиб садоқатингни кўрсатганинг учун
Эй Эгам, Сенга олқишлар бўлсин!
23 Ваҳимага тушиб мен:
“Эй Эгам, Сенинг назарингдан маҳрум бўлдим”, дегандим.
Ҳа, мадад сўраб Сенга ёлворганимда
Илтижоларимни эшитдинг.
24 Эй Эгамизнинг тақводорлари, Уни севинг!
Унга содиқ бўлганларни Эгамиз ҳимоя қилади,
Такаббурларга тўлиқ жазо беради.
25 Бардам бўлинг, дадил бўлсин юрагингиз,
Эй сиз, Эгамиздан умид қилганлар!
30–SANO
1 Ijrochilar rahbariga. Dovud sanosi.
2 Ey Egam, Senda men panoh topaman,
Sharmanda boʻlishimga aslo yoʻl qoʻyma,
Adolatlisan, meni qutqargin.
3 Quloq tut menga, darrov xalos qilgin,
Mening panoh qoyam boʻlgin.
Najot topay, mustahkam qoʻrgʻonim boʻlgin.
4 Chindan ham Sen suyangan qoyamsan, qalʼamsan,
Oʻz noming haqi meni yetakla, yoʻl koʻrsatgin.
5 Sen mening panohimsan.
Qoʻyilgan tuzoqdan meni qutqargin.
6 Hayotimni Senga topshiraman, ey Egam,
Meni qutqarasan, ey sodiq Xudo.
7 Soxta xudolarni izzatlaganlarga
Men nafratimni sochaman.
Ey Egam, men Senga umid bogʻlayman.
8 Sodiq sevging ila shod–xurram boʻlay,
Qaygʻularimni Oʻzing koʻrgansan,
Jonim azobda qolganini bilasan.
9 Meni gʻanim qoʻliga bermading,
Oyoqlarimni bexavotir yerga qoʻyding.
10 Rahm qil, ey Egam, kulfatda qoldim,
Koʻzlarim qaygʻudan toldi,
Jonu tanam adoyi tamom boʻldi.
11 Hayotim azob bilan tugaydi,
Yillarim oh–voh bilan bitadi.
Gunohlarim dastidan kuchdan qoldim,
Etlarim suyaklarimga yopishib ketgan.
12 Dushmanlarim meni haqorat qiladi,
Qoʻshnilarim mendan hazar qiladi.
Doʻstlarim ham mendan qoʻrqadi,
Koʻchada koʻrib meni, qochib ketadi.
13 Meni unutdilar, goʻyo oʻlganman,
Goʻyo singan sopol idish kabiman.
14 Eshityapman, koʻpchilik gʻiybat qiladi,
Atrofimni dahshat oʻrab olgan.
Birgalikda menga qarshi fitna toʻqishadi,
Meni oʻldirmoqni niyat qilishadi.
15 Ey Egam, men Senga umid bogʻlayman,
“Mening Xudoyim Sensan”, deb aytaman.
16 Hayotim Sening qoʻlingdadir,
Gʻanimlarim qoʻlidan,
Payimga tushganlardan meni qutqargin.
17 Jamoling men, qulingga nurlarini sochsin,
Sen sodiqsan, meni qutqargin.
18 Yoʻl qoʻyma, ey Egam, sharmanda boʻlishimga,
Madad soʻrab iltijo qildim Senga.
Qabihlar sharmandayi sharmisor boʻlsin,
Oʻliklar diyoriga jim kirib borsin.
19 Oʻchsin ularning yolgʻonchi ovozlari,
Zero, takabburlik va nafrat bilan
Ular solihga qarshi soʻylar.
20 O, naqadar buyukdir Sening ezguliging!
Oʻzingdan qoʻrqqanlarga uni saqlab qoʻygansan,
Senda panoh topganlarga hadya qilasan,
Hammaning koʻzi oldida inʼom qilasan.
21 Huzuringda ularni himoya qilasan,
Inson fitnalaridan omon saqlaysan.
Ularni Oʻz chodiring ostida
Igʻvolardan saqlab turasan.
22 Qamalda qolgan shaharday boʻlganimda
Menga ajoyib sadoqatingni koʻrsatganing uchun
Ey Egam, Senga olqishlar boʻlsin!
23 Vahimaga tushib men:
“Ey Egam, Sening nazaringdan mahrum boʻldim”, degandim.
Ha, madad soʻrab Senga yolvorganimda
Iltijolarimni eshitding.
24 Ey Egamizning taqvodorlari, Uni seving!
Unga sodiq boʻlganlarni Egamiz himoya qiladi,
Takabburlarga toʻliq jazo beradi.
25 Bardam boʻling, dadil boʻlsin yuragingiz,
Ey siz, Egamizdan umid qilganlar!
