20–САНО
1 Ижрочилар раҳбарига. Довуд саноси.
2 Эй Эгам! Сенинг қудратинг туфайли шоҳ қувонади,
Сен берган зафарлардан у нақадар лаззатланар!
3 Кўнглидаги истакларини рўёбга чиқардинг,
Унинг тилакларини рад қилмадинг.
4 Улуғ баракани унга ато қилдинг,
Унинг бошига соф олтин тож кийгиздинг.
5 Сендан умр сўраганда, умр бердинг,
Узоқ ҳамда боқий умр бахш этдинг.
6 Шоҳнинг шуҳрати Сен берган зафарлар туфайли улуғдир,
Унга дабдаба, улуғворлик ато қилган Сенсан.
7 Сен то абад унга барака берасан,
Унга жуда яқин бўлиб,
Уни шодликка тўлдирасан.
8 Эгамизга шоҳимиз умид боғлайди,
Худойи Таолонинг содиқ севгиси туфайли
У ҳеч қачон қоқилмайди.
9 Эй шоҳимиз, қўлинг барча душманларингни мағлуб қилади,
Ҳа, ўнг қўлинг сендан нафратланганларни мағлуб қилади.
10 Сен зоҳир бўлганинг замон
Қизиган тандирдай уларни ёндирасан.
Эгамиз Ўз ғазаби билан уларни ютиб юборади,
Аланга уларни ёндириб ташлайди.
11 Эй шоҳимиз, уларнинг наслини
Ер юзидан қириб ташлайсан,
Зурриётини инсоният орасидан йўқотасан.
12 Душманларинг сенга қарши ёмонликни режа қилсалар,
Улар сенга қарши фитна қўзғасалар,
Ҳеч нарсага эриша олмайдилар.
13 Камонингдан уларга ўқлар отасан,
Ортига қочишга мажбур қиласан.
14 Ўз қудратинг туфайли юксалавер, эй Эгам,
Қудратингни куйлаб, ҳамду сано айтамиз.
20–SANO
1 Ijrochilar rahbariga. Dovud sanosi.
2 Ey Egam! Sening qudrating tufayli shoh quvonadi,
Sen bergan zafarlardan u naqadar lazzatlanar!
3 Koʻnglidagi istaklarini roʻyobga chiqarding,
Uning tilaklarini rad qilmading.
4 Ulugʻ barakani unga ato qilding,
Uning boshiga sof oltin toj kiygizding.
5 Sendan umr soʻraganda, umr berding,
Uzoq hamda boqiy umr baxsh etding.
6 Shohning shuhrati Sen bergan zafarlar tufayli ulugʻdir,
Unga dabdaba, ulugʻvorlik ato qilgan Sensan.
7 Sen to abad unga baraka berasan,
Unga juda yaqin boʻlib,
Uni shodlikka toʻldirasan.
8 Egamizga shohimiz umid bogʻlaydi,
Xudoyi Taoloning sodiq sevgisi tufayli
U hech qachon qoqilmaydi.
9 Ey shohimiz, qoʻling barcha dushmanlaringni magʻlub qiladi,
Ha, oʻng qoʻling sendan nafratlanganlarni magʻlub qiladi.
10 Sen zohir boʻlganing zamon
Qizigan tandirday ularni yondirasan.
Egamiz Oʻz gʻazabi bilan ularni yutib yuboradi,
Alanga ularni yondirib tashlaydi.
11 Ey shohimiz, ularning naslini
Yer yuzidan qirib tashlaysan,
Zurriyotini insoniyat orasidan yoʻqotasan.
12 Dushmanlaring senga qarshi yomonlikni reja qilsalar,
Ular senga qarshi fitna qoʻzgʻasalar,
Hech narsaga erisha olmaydilar.
13 Kamoningdan ularga oʻqlar otasan,
Ortiga qochishga majbur qilasan.
14 Oʻz qudrating tufayli yuksalaver, ey Egam,
Qudratingni kuylab, hamdu sano aytamiz.
