18–САНО
1 Ижрочилар раҳбарига. Довуд саноси.
2 Худонинг шуҳратини самолар намоён қилади,
Унинг ижодини фалак тоқи айтиб туради.
3 Осмон кундан–кунга буни билдиради,
Ҳар тун бундан хабардор қилади.
4 Само, фалак айтмас бир гап, ё бир жумла,
Чиқмас улардан ҳеч бир садо.
5 Аммо хабарлари ҳар томонга тарқалади,
Оламнинг четигача етиб боради.
Худо самоларда қуёш учун чодир қурган.
6 Қуёш гўшангадан чиққан куёвга ўхшайди.
Қаҳрамонларга ўхшаб ғайрат билан йўлагидан боради.
7 Самоларнинг бир четидан у чиқиб,
Айланиб, бошқа бир четига йўл олади,
Унинг тафтидан ҳеч нарса яширина олмайди.
8 Эгамизнинг қонуни мукаммалдир,
Бизга янги куч ато этади,
Эгамизнинг фармонлари ишончлидир,
Соддаларга донолик беради.
9 Эгамизнинг буйруқлари тўғридир,
Қалбларни шодликка тўлдиради,
Эгамизнинг амрлари равшандир,
Улар кўзларга нур беради.
10 Эгамиздан қўрқиш покликдир,
Бу то абад давом этади.
Эгамизнинг қоидалари ҳақиқатдир,
Ҳаммаси ғоят адолатлидир.
11 Улар соф олтиндан ҳам аълодир,
Тоза асалдан ҳам ширинроқдир.
12 Эй Эгам, қоидаларинг менга, Ўз қулингга ўгит беради,
Қоидаларингга итоат этганлар буюк мукофот олади.
13 Ким ўз хатосини била олади?!
Яширин хатолардан мени Ўзинг поклагин.
14 Мен, қулингни ошкора гуноҳдан сақлагин,
Устимдан гуноҳ ҳоким бўлмасин.
Шунда мен айбсиз бўламан,
Оғир гуноҳдан ҳам холи бўламан.
15 Эй Эгам, суянган Қоям, Қутқарувчим!
Оғзимдан чиққан сўзлар,
Юракдаги ниятларим Сенга маъқул бўлсин.
18–SANO
1 Ijrochilar rahbariga. Dovud sanosi.
2 Xudoning shuhratini samolar namoyon qiladi,
Uning ijodini falak toqi aytib turadi.
3 Osmon kundan–kunga buni bildiradi,
Har tun bundan xabardor qiladi.
4 Samo, falak aytmas bir gap, yo bir jumla,
Chiqmas ulardan hech bir sado.
5 Ammo xabarlari har tomonga tarqaladi,
Olamning chetigacha yetib boradi.
Xudo samolarda quyosh uchun chodir qurgan.
6 Quyosh goʻshangadan chiqqan kuyovga oʻxshaydi.
Qahramonlarga oʻxshab gʻayrat bilan yoʻlagidan boradi.
7 Samolarning bir chetidan u chiqib,
Aylanib, boshqa bir chetiga yoʻl oladi,
Uning taftidan hech narsa yashirina olmaydi.
8 Egamizning qonuni mukammaldir,
Bizga yangi kuch ato etadi,
Egamizning farmonlari ishonchlidir,
Soddalarga donolik beradi.
9 Egamizning buyruqlari toʻgʻridir,
Qalblarni shodlikka toʻldiradi,
Egamizning amrlari ravshandir,
Ular koʻzlarga nur beradi.
10 Egamizdan qoʻrqish poklikdir,
Bu to abad davom etadi.
Egamizning qoidalari haqiqatdir,
Hammasi gʻoyat adolatlidir.
11 Ular sof oltindan ham aʼlodir,
Toza asaldan ham shirinroqdir.
12 Ey Egam, qoidalaring menga, Oʻz qulingga oʻgit beradi,
Qoidalaringga itoat etganlar buyuk mukofot oladi.
13 Kim oʻz xatosini bila oladi?!
Yashirin xatolardan meni Oʻzing poklagin.
14 Men, qulingni oshkora gunohdan saqlagin,
Ustimdan gunoh hokim boʻlmasin.
Shunda men aybsiz boʻlaman,
Ogʻir gunohdan ham xoli boʻlaman.
15 Ey Egam, suyangan Qoyam, Qutqaruvchim!
Ogʻzimdan chiqqan soʻzlar,
Yurakdagi niyatlarim Senga maʼqul boʻlsin.
