143–САНО
Довуд саноси.
1 Эгамга, суянган қоямга олқишлар бўлсин,
У қўлларимни урушга, бармоқларимни жангга ўргатган.
2 Эгам доим менга содиқдир,
У менинг қалъам, қўрғоним, халоскоримдир.
Ҳа, Эгам менинг қалқоним,
Унда мен паноҳ топаман,
Халқларни У менга бўйсундиради.
3 Эй Эгам, инсон зоти кимдирки, унга эътибор берсанг?!
Бандалар кимдирки, улар ҳақда ўйласанг?!
4 Инсон умри оғиздан чиққан нафасга ўхшар,
Одамзоднинг ҳаёти ўткинчи сояга ўхшар.
5 Эй Эгам, кўкларни ёриб, пастга тушгин,
Тоғларга теккин, улардан тутун чиқсин.
6 Чақмоқ чақтир, ёвларни тирқиратгин,
Ўқларингни от, уларни саросимага солгин.
7 Юқоридан узат қўлингни, мени қутқаргин,
Азим сувлардан мени чиқариб олгин,
Бегоналар қўлидан мени қутқаргин.
8 Уларнинг сўзлари беҳуда,
Қўлини кўтариб, улар ёлғон қасам ичади.
9 Эй Худо, Сенга янги қўшиқ куйлайман,
Ўн торли арфа чалиб, Сени тараннум этаман.
10 Шоҳларга Сен зафар ато этасан,
Қулинг Довудни шафқатсиз қиличдан қутқарасан.
11 Келгиндиларнинг қўлидан
Мени халос қил, қутқаргин.
Уларнинг сўзлари беҳуда,
Қўлини кўтариб, улар ёлғон қасам ичади.
12 Ўғилларимиз ёшлигида яхши ўсган кўчатга ўхшасин,
Қизларимиз саройнинг ўймакор устунларига ўхшасин.
13 Омборларимиз ноз–неъматларга тўлиб–тошсин,
Қўйларимиз минглаб, ўн минглаб яйловларда кўпайсин.
14 Ҳўкизимиз оғир юкларни тортсин ,
Деворларимиз дарз кетмасин,
Одамларимиз сургун бўлмасин,
Кўчаларимизда оҳ–воҳ, ғаму кулфат бўлмасин.
15 Нақадар бахтлидир бундай инсонлар!
Бахтлидир Худони Эгамиз деб билган халқ!
143–SANO
Dovud sanosi.
1 Egamga, suyangan qoyamga olqishlar boʻlsin,
U qoʻllarimni urushga, barmoqlarimni jangga oʻrgatgan.
2 Egam doim menga sodiqdir,
U mening qalʼam, qoʻrgʻonim, xaloskorimdir.
Ha, Egam mening qalqonim,
Unda men panoh topaman,
Xalqlarni U menga boʻysundiradi.
3 Ey Egam, inson zoti kimdirki, unga eʼtibor bersang?!
Bandalar kimdirki, ular haqda oʻylasang?!
4 Inson umri ogʻizdan chiqqan nafasga oʻxshar,
Odamzodning hayoti oʻtkinchi soyaga oʻxshar.
5 Ey Egam, koʻklarni yorib, pastga tushgin,
Togʻlarga tekkin, ulardan tutun chiqsin.
6 Chaqmoq chaqtir, yovlarni tirqiratgin,
Oʻqlaringni ot, ularni sarosimaga solgin.
7 Yuqoridan uzat qoʻlingni, meni qutqargin,
Azim suvlardan meni chiqarib olgin,
Begonalar qoʻlidan meni qutqargin.
8 Ularning soʻzlari behuda,
Qoʻlini koʻtarib, ular yolgʻon qasam ichadi.
9 Ey Xudo, Senga yangi qoʻshiq kuylayman,
Oʻn torli arfa chalib, Seni tarannum etaman.
10 Shohlarga Sen zafar ato etasan,
Quling Dovudni shafqatsiz qilichdan qutqarasan.
11 Kelgindilarning qoʻlidan
Meni xalos qil, qutqargin.
Ularning soʻzlari behuda,
Qoʻlini koʻtarib, ular yolgʻon qasam ichadi.
12 Oʻgʻillarimiz yoshligida yaxshi oʻsgan koʻchatga oʻxshasin,
Qizlarimiz saroyning oʻymakor ustunlariga oʻxshasin.
13 Omborlarimiz noz–neʼmatlarga toʻlib–toshsin,
Qoʻylarimiz minglab, oʻn minglab yaylovlarda koʻpaysin.
14 Hoʻkizimiz ogʻir yuklarni tortsin ,
Devorlarimiz darz ketmasin,
Odamlarimiz surgun boʻlmasin,
Koʻchalarimizda oh–voh, gʻamu kulfat boʻlmasin.
15 Naqadar baxtlidir bunday insonlar!
Baxtlidir Xudoni Egamiz deb bilgan xalq!
