140–САНО
Довуд саноси.
1 Сенга ёлвораман, эй Эгам, ёнимга тез келгин,
Сенга ёлворганимда овозимга қулоқ солгин.
2 Ибодатимни тутатқи назридай қабул қилгин,
Қўлларимни кўтарганимни кечки қурбонлик деб билгин.
3 Эй Эгам, оғзимга посбон қўйгин,
Лабларим эшигини қўриқлагин.
4 Юрагимни қабиҳликка бурмагин,
Ёмон ишларга қўшилишимга йўл қўймагин,
Бадкирдорларнинг жамоасида
Зиёфатларини ейишимга йўл қўймагин.
5 Майли, солиҳ одам мени ураверсин,
Содиқ одам мени тўғриласин,
Бошим шундай аъло мойни рад қилмасин.
Менинг ибодатим муттасил
Бадкирдорларнинг қабиҳ ишларига қаршидир.
6 Уларнинг ҳакамлари қоядан улоқтирилади,
Шунда фосиқлар сўзларим ҳақ эканлигини билиб олишади.
7 Бадкирдорлар айтар: “Шудгор қилиниб, парчаланган ердай,
Суякларимиз қабр оғзида майдаланиб, сочилиб ётибди.”
8 Кўзларим Сендадир, эй Эгам Раббий,
Сендан паноҳ излайман,
Мени ташлаб қўймагин.
9 Бадкирдорларнинг қопқонларидан,
Улар қўйган тузоқдан мени сақлагин.
10 Мен соғ–омон ўтиб кетайин,
Фосиқлар қўйган тўрларига ўзлари тушсин.
140–SANO
Dovud sanosi.
1 Senga yolvoraman, ey Egam, yonimga tez kelgin,
Senga yolvorganimda ovozimga quloq solgin.
2 Ibodatimni tutatqi nazriday qabul qilgin,
Qoʻllarimni koʻtarganimni kechki qurbonlik deb bilgin.
3 Ey Egam, ogʻzimga posbon qoʻygin,
Lablarim eshigini qoʻriqlagin.
4 Yuragimni qabihlikka burmagin,
Yomon ishlarga qoʻshilishimga yoʻl qoʻymagin,
Badkirdorlarning jamoasida
Ziyofatlarini yeyishimga yoʻl qoʻymagin.
5 Mayli, solih odam meni uraversin,
Sodiq odam meni toʻgʻrilasin,
Boshim shunday aʼlo moyni rad qilmasin.
Mening ibodatim muttasil
Badkirdorlarning qabih ishlariga qarshidir.
6 Ularning hakamlari qoyadan uloqtiriladi,
Shunda fosiqlar soʻzlarim haq ekanligini bilib olishadi.
7 Badkirdorlar aytar: “Shudgor qilinib, parchalangan yerday,
Suyaklarimiz qabr ogʻzida maydalanib, sochilib yotibdi.”
8 Koʻzlarim Sendadir, ey Egam Rabbiy,
Sendan panoh izlayman,
Meni tashlab qoʻymagin.
9 Badkirdorlarning qopqonlaridan,
Ular qoʻygan tuzoqdan meni saqlagin.
10 Men sogʻ–omon oʻtib ketayin,
Fosiqlar qoʻygan toʻrlariga oʻzlari tushsin.
