134–САНО
1 Эгамизга ҳамду санолар бўлсин!
Эгамизнинг номига мадҳиялар бўлсин!
Ҳамду сано айтинг, эй Эгамизнинг қуллари,
2 Эй Эгамизнинг уйида хизмат қиладиганлар,
Эй Эгамиз уйининг ҳовлисида хизмат қиладиганлар!
3 Эгамизга ҳамду санолар бўлсин,
У яхшидир!
Тараннум этинг Уни, бу ёқимлидир.
4 Эгамиз Ўзи учун Ёқуб наслини танлади.
Ҳа, Ўзимнинг хазинам деб, Исроил халқини танлади.
5 Ҳа, биламан, Эгамиз улуғдир,
Раббимиз барча худолардан юксакдир.
6 Осмонда ҳам, заминда ҳам,
Денгизларда, жамики тубсиз сувларда
Эгамиз истаганини қилади.
7 У ернинг тўрт томонидан булутларни олиб келади,
Ёмғир билан бирга чақмоқ юборади,
Омборларидан шамол олиб келади.
8 Эгамиз Мисрнинг тўнғичларини,
Инсон ҳамда ҳайвонларнинг биринчи туғилганларини нобуд қилди .
9 Фиръавн ва унинг ҳамма аъёнларига қарши
Мисрнинг орасига Эгамиз аломату мўъжизаларни юборди .
10 У кўп эллар, халқларни қирган,
Қудратли шоҳларни бўғизлаган.
11 Амор халқининг шоҳи Сихўнни, Башан шоҳи Ўгни ҳамда
Канъоннинг барча шоҳларини қирган .
12 Уларнинг ерини Исроил халқига мулк қилиб берди.
13 Эгамизнинг номи то абад давом этар,
Эгамизнинг шуҳрати насллар оша давом этар.
14 Эгамиз Ўз халқига адолат қилади,
Ўз қулларига раҳм–шафқат қилади.
15 Халқларнинг худолари эса кумуш, олтиндан,
Инсон қўлларининг маҳсулидир.
16 Бутларнинг оғизлари бор, сўзлай олмаслар,
Кўзлари бор, кўра олмаслар.
17 Қулоқлари бор уларнинг, эшита олмас,
Улар асло нафас ололмас.
18 Бутларни барпо қилганлар, бутларга ишонганлар
Худди уларга ўхшаган бўлиб қолар.
19 Эй Исроил халқи, олқишлар айтинг Эгамизга!
Эй Ҳорун хонадони , мадҳиялар айтинг Эгамизга!
20 Эй Леви хонадони , олқишлар айтинг Эгамизга!
Эй Эгамиздан қўрққанлар, мадҳиялар айтинг Унга!
21 Қуддусда истиқомат қиладиган Эгамизга
Сионда олқишлар айтинг!
Эгамизга ҳамду санолар бўлсин!
134–SANO
1 Egamizga hamdu sanolar boʻlsin!
Egamizning nomiga madhiyalar boʻlsin!
Hamdu sano ayting, ey Egamizning qullari,
2 Ey Egamizning uyida xizmat qiladiganlar,
Ey Egamiz uyining hovlisida xizmat qiladiganlar!
3 Egamizga hamdu sanolar boʻlsin,
U yaxshidir!
Tarannum eting Uni, bu yoqimlidir.
4 Egamiz Oʻzi uchun Yoqub naslini tanladi.
Ha, Oʻzimning xazinam deb, Isroil xalqini tanladi.
5 Ha, bilaman, Egamiz ulugʻdir,
Rabbimiz barcha xudolardan yuksakdir.
6 Osmonda ham, zaminda ham,
Dengizlarda, jamiki tubsiz suvlarda
Egamiz istaganini qiladi.
7 U yerning toʻrt tomonidan bulutlarni olib keladi,
Yomgʻir bilan birga chaqmoq yuboradi,
Omborlaridan shamol olib keladi.
8 Egamiz Misrning toʻngʻichlarini,
Inson hamda hayvonlarning birinchi tugʻilganlarini nobud qildi .
9 Firʼavn va uning hamma aʼyonlariga qarshi
Misrning orasiga Egamiz alomatu moʻjizalarni yubordi .
10 U koʻp ellar, xalqlarni qirgan,
Qudratli shohlarni boʻgʻizlagan.
11 Amor xalqining shohi Sixoʻnni, Bashan shohi Oʻgni hamda
Kanʼonning barcha shohlarini qirgan .
12 Ularning yerini Isroil xalqiga mulk qilib berdi.
13 Egamizning nomi to abad davom etar,
Egamizning shuhrati nasllar osha davom etar.
14 Egamiz Oʻz xalqiga adolat qiladi,
Oʻz qullariga rahm–shafqat qiladi.
15 Xalqlarning xudolari esa kumush, oltindan,
Inson qoʻllarining mahsulidir.
16 Butlarning ogʻizlari bor, soʻzlay olmaslar,
Koʻzlari bor, koʻra olmaslar.
17 Quloqlari bor ularning, eshita olmas,
Ular aslo nafas ololmas.
18 Butlarni barpo qilganlar, butlarga ishonganlar
Xuddi ularga oʻxshagan boʻlib qolar.
19 Ey Isroil xalqi, olqishlar ayting Egamizga!
Ey Horun xonadoni , madhiyalar ayting Egamizga!
20 Ey Levi xonadoni , olqishlar ayting Egamizga!
Ey Egamizdan qoʻrqqanlar, madhiyalar ayting Unga!
21 Quddusda istiqomat qiladigan Egamizga
Sionda olqishlar ayting!
Egamizga hamdu sanolar boʻlsin!
