123–САНО
Довуднинг зиёрат қўшиғи.
1 Энди Исроил шундай десин:
“Эгамиз биз томонда бўлмаса эди,
2 Ҳа, Эгамиз биз томонда бўлмаса эди,
Ғанимларимиз бизга ҳужум қилганда,
3 Улар бизга ғазабини сочганда,
Бизни тириклайин ютган бўларди.
4 Тўфон бизни гирдобига тортган бўларди,
Сел бизни босиб олган бўларди.
5 Пишқирган сувлар устимиздан босган бўларди.”
6 Эгамизга олқишлар бўлсин,
Йиртқич тишларга бизни ўлжа қилиб қўймади.
7 Биз овчининг тузоғидан қутулган
Қушларга ўхшаймиз.
Тузоқ синиб, биз қутулдик.
8 Еру осмонни яратган Эгамиздан
Бизга мадад келади.
123–SANO
Dovudning ziyorat qoʻshigʻi.
1 Endi Isroil shunday desin:
“Egamiz biz tomonda boʻlmasa edi,
2 Ha, Egamiz biz tomonda boʻlmasa edi,
Gʻanimlarimiz bizga hujum qilganda,
3 Ular bizga gʻazabini sochganda,
Bizni tiriklayin yutgan boʻlardi.
4 Toʻfon bizni girdobiga tortgan boʻlardi,
Sel bizni bosib olgan boʻlardi.
5 Pishqirgan suvlar ustimizdan bosgan boʻlardi.”
6 Egamizga olqishlar boʻlsin,
Yirtqich tishlarga bizni oʻlja qilib qoʻymadi.
7 Biz ovchining tuzogʻidan qutulgan
Qushlarga oʻxshaymiz.
Tuzoq sinib, biz qutuldik.
8 Yeru osmonni yaratgan Egamizdan
Bizga madad keladi.
