107–САНО
1 Довуд саноси. Қўшиқ.
2 Эй Худо, юрагим Сенга содиқ,
Жоним борича Сени куйлаб, қўшиқ айтаман.
3 Уйғон, эй арфа, лира!
Тонгни ҳам мен уйғотаман!
4 Эй Эгам, халқлар орасида Сенга шукрона айтаман,
Эллар орасида Сенга ҳамду сано куйлайман.
5 Содиқ севгинг самолардан ҳам юксакдир,
Садоқатинг булутлардан ҳам баланддир.
6 Эй Худо, фалакдан ҳам юқорида юксалавер!
Шуҳратинг бутун замин узра ёйилсин.
7 Ўнг қўлинг ила ғалаба ато қилгин,
Илтижоимга жавоб бергин,
Суюкли бандаларинг нажот топсин.
8 Эй Худо, Ўз муқаддас маконингдан ваъда бергансан :
“Шодланиб Шакамни бўлиб ташлайман,
Сухот водийсини тақсимлаб бераман.
9 Гилад Меникидир, Манаше Меникидир,
Эфрайим дубулғамдир, Яҳудо салтанат ҳассамдир.
10 Мўаб Менинг қўлювгичимдир,
Эдом узра чориғимни отаман ,
Филистлар узра зафар ила ҳайқираман.”
11 Эй Худо, қанийди мустаҳкам шаҳарга мени олиб борсалар,
Эдомга мени бошлаб борсалар.
12 Ахир, бизни Ўзинг рад этдинг–ку!
Энди лашкаримизга йўлбошчилик қилмаяпсан–ку!
13 Душмандан қутқариб, бизга ёрдам бер,
Инсоннинг ёрдами бутунлай беҳуда.
14 Эй Худо, Сен билан биз ғолиб бўламиз,
Душманларимизни Сен янчиб ташлайсан.
107–SANO
1 Dovud sanosi. Qoʻshiq.
2 Ey Xudo, yuragim Senga sodiq,
Jonim boricha Seni kuylab, qoʻshiq aytaman.
3 Uygʻon, ey arfa, lira!
Tongni ham men uygʻotaman!
4 Ey Egam, xalqlar orasida Senga shukrona aytaman,
Ellar orasida Senga hamdu sano kuylayman.
5 Sodiq sevging samolardan ham yuksakdir,
Sadoqating bulutlardan ham balanddir.
6 Ey Xudo, falakdan ham yuqorida yuksalaver!
Shuhrating butun zamin uzra yoyilsin.
7 Oʻng qoʻling ila gʻalaba ato qilgin,
Iltijoimga javob bergin,
Suyukli bandalaring najot topsin.
8 Ey Xudo, Oʻz muqaddas makoningdan vaʼda bergansan :
“Shodlanib Shakamni boʻlib tashlayman,
Suxot vodiysini taqsimlab beraman.
9 Gilad Menikidir, Manashe Menikidir,
Efrayim dubulgʻamdir, Yahudo saltanat hassamdir.
10 Moʻab Mening qoʻlyuvgichimdir,
Edom uzra chorigʻimni otaman ,
Filistlar uzra zafar ila hayqiraman.”
11 Ey Xudo, qaniydi mustahkam shaharga meni olib borsalar,
Edomga meni boshlab borsalar.
12 Axir, bizni Oʻzing rad etding–ku!
Endi lashkarimizga yoʻlboshchilik qilmayapsan–ku!
13 Dushmandan qutqarib, bizga yordam ber,
Insonning yordami butunlay behuda.
14 Ey Xudo, Sen bilan biz gʻolib boʻlamiz,
Dushmanlarimizni Sen yanchib tashlaysan.
