12–БОБ
1 Насиҳатни севган илм–маърифатни севади,
танбеҳдан нафратланадиган эса аҳмоқдир.
2 Яхши одам Эгамизнинг марҳаматига сазовор бўлади,
нияти бузуқни эса У жазога ҳукм этади.
3 Инсон ёвузлик билан камол топмайди,
солиҳ ҳеч қачон ўрнидан қўзғатилмайди.
4 Яхши хотин эрининг бошидаги тожидир,
эрини уялтирадиган хотин бошга балодир.
5 Солиҳнинг фикри–зикри — адолат,
фосиқнинг маслаҳати эса ёлғондир.
6 Фосиқнинг сўзи қонга ташна,
тўғрининг тили эса қутқаради.
7 Фосиқ ҳалокатга учраб йўқ бўлади,
солиҳнинг уйи эса мустаҳкам туради.
8 Инсонни ақл–идрокига қараб улуғлайдилар,
эгри одам эса нафратга дучор бўлади.
9 Ўзини катта тутиб нонга зор бўлгандан кўра,
оддий бўлиб хизматкор бўлиш яхшироқ.
10 Солиҳ ҳайвонга ҳам меҳрибонлик қилади,
фосиқнинг раҳмдиллиги ҳам золимликдир.
11 Ерга ишлов берган тўйиб нон ейди,
бекор нарсани кўзлаган эса ақлсиздир.
12 Фосиқ ёвузлик тўрига илинтирай дейди,
солиҳнинг илдизи яшнайди.
13 Фосиқ ўз тилидан илинади,
солиҳ эса ғамдан фориғ бўлади.
14 Одам сўзлари туфайли яхши нарсага эришади,
меҳнати уни тақдирлайди.
15 Нодон ўз йўлини тўғри деб ўйлайди,
доно эса маслаҳатга қулоқ солади.
16 Нодон ғазабини дарҳол билдиради,
ақли расо эса ҳақоратланганини беркитади.
17 Тўғри гапирадиган ҳақиқатни айтади,
сохта гувоҳ ёлғон гапиради.
18 Ўйламасдан айтилган сўз қиличдай жароҳатлайди,
дононинг гаплари эса шифо беради.
19 Ростгўй лаблар абадийдир,
ёлғон тил эса бир лаҳзаликдир.
20 Ёмон ният қиладиганнинг юрагида ёлғон,
тинчлик ўрнатувчининг юрагида эса қувонч бор.
21 Солиҳга ҳеч қандай зарар тегмайди,
фосиқ эса ғам–ғуссадан қутулмайди.
22 Ёлғончи тил Эгамизга жирканч,
тўғрилик билан иш қиладиганлар эса Унинг севинчидир.
23 Ақлли билимини кўз–кўз қилмайди,
нодон ўз нодонлигини ошкор қилади.
24 Тиришқоқ ҳукм суради,
дангаса эса қул бўлади.
25 Юракдаги қайғу–алам одамни эзади,
ширин сўз эса юракни шод этади.
26 Солиҳ ўзгаларга йўл кўрсатади ,
фосиқ эса йўлдан адаштиради.
27 Дангаса ўлжасини пиширишга ҳам эринади,
ғайратли эса қимматбаҳо бойликка эга бўлади .
28 Солиҳлик йўли ҳаётга етаклайди,
бу йўлда ўлим йўқдир.
12–BOB
1 Nasihatni sevgan ilm–maʼrifatni sevadi,
tanbehdan nafratlanadigan esa ahmoqdir.
2 Yaxshi odam Egamizning marhamatiga sazovor boʻladi,
niyati buzuqni esa U jazoga hukm etadi.
3 Inson yovuzlik bilan kamol topmaydi,
solih hech qachon oʻrnidan qoʻzgʻatilmaydi.
4 Yaxshi xotin erining boshidagi tojidir,
erini uyaltiradigan xotin boshga balodir.
5 Solihning fikri–zikri — adolat,
fosiqning maslahati esa yolgʻondir.
6 Fosiqning soʻzi qonga tashna,
toʻgʻrining tili esa qutqaradi.
7 Fosiq halokatga uchrab yoʻq boʻladi,
solihning uyi esa mustahkam turadi.
8 Insonni aql–idrokiga qarab ulugʻlaydilar,
egri odam esa nafratga duchor boʻladi.
9 Oʻzini katta tutib nonga zor boʻlgandan koʻra,
oddiy boʻlib xizmatkor boʻlish yaxshiroq.
10 Solih hayvonga ham mehribonlik qiladi,
fosiqning rahmdilligi ham zolimlikdir.
11 Yerga ishlov bergan toʻyib non yeydi,
bekor narsani koʻzlagan esa aqlsizdir.
12 Fosiq yovuzlik toʻriga ilintiray deydi,
solihning ildizi yashnaydi.
13 Fosiq oʻz tilidan ilinadi,
solih esa gʻamdan forigʻ boʻladi.
14 Odam soʻzlari tufayli yaxshi narsaga erishadi,
mehnati uni taqdirlaydi.
15 Nodon oʻz yoʻlini toʻgʻri deb oʻylaydi,
dono esa maslahatga quloq soladi.
16 Nodon gʻazabini darhol bildiradi,
aqli raso esa haqoratlanganini berkitadi.
17 Toʻgʻri gapiradigan haqiqatni aytadi,
soxta guvoh yolgʻon gapiradi.
18 Oʻylamasdan aytilgan soʻz qilichday jarohatlaydi,
dononing gaplari esa shifo beradi.
19 Rostgoʻy lablar abadiydir,
yolgʻon til esa bir lahzalikdir.
20 Yomon niyat qiladiganning yuragida yolgʻon,
tinchlik oʻrnatuvchining yuragida esa quvonch bor.
21 Solihga hech qanday zarar tegmaydi,
fosiq esa gʻam–gʻussadan qutulmaydi.
22 Yolgʻonchi til Egamizga jirkanch,
toʻgʻrilik bilan ish qiladiganlar esa Uning sevinchidir.
23 Aqlli bilimini koʻz–koʻz qilmaydi,
nodon oʻz nodonligini oshkor qiladi.
24 Tirishqoq hukm suradi,
dangasa esa qul boʻladi.
25 Yurakdagi qaygʻu–alam odamni ezadi,
shirin soʻz esa yurakni shod etadi.
26 Solih oʻzgalarga yoʻl koʻrsatadi ,
fosiq esa yoʻldan adashtiradi.
27 Dangasa oʻljasini pishirishga ham erinadi,
gʻayratli esa qimmatbaho boylikka ega boʻladi .
28 Solihlik yoʻli hayotga yetaklaydi,
bu yoʻlda oʻlim yoʻqdir.
