39–БОБ
1 Тоғ эчкилари қачон туғишини биласанми?
Кийиклар болалаганини кўрганмисан?
2 Улар боласини неча ой қорнида кўтариб юришини биласанми?
Улар болалайдиган вақтни–чи?
3 Улар чўккалаб туғади,
Болаларини дунёга келтиради.
4 Уларнинг болалари очиқ жойларда ўсиб, кучга тўлади,
Ота–онасини ташлаб кетади, бошқа қайтиб келмайди.
5 Қулонга ким озодлик берган?
Ким унинг арқонини ечиб ташлаган?
6 Мен даштларни унга макон қилиб бердим,
Шўр ерлар қулоннинг маскани бўлди.
7 Шаҳардаги шовқин–сурондан у кулади,
Ҳеч ким унинг устига миниб, унга бақиролмайди.
8 Қирлар қулоннинг яйловидир,
Ўша ерларда у кўкатларни қидириб юради.
9 Ёввойи буқа сенга хизмат қилишга рози бўладими?
Тунни сенинг оғилингда ўтказадими?
10 Арқон билан уни омочга боғлай оласанми?
У ерларингни ағдариб берадими?
11 Кучи кўп, деб унга ишона оласанми?
Ҳамма оғир ишларингни унга топширасанми?
12 У ҳосилингни йиғиб,
Хирмонга олиб келишига ишонасанми?
13 Туяқуш қанотларини севинч билан қоқаверади,
Аммо унинг қаноту патлари лайлакникига тенг келолмайди .
14 Туяқуш тухумларини ерга қўяди,
Уларни қумда иситади.
15 Биров оёқлари билан тухумларини босиб кетишидан,
Ёввойи ҳайвон уларни эзиб ташлашидан хавотирланмайди.
16 Ўз болаларига бегоналарга ўхшаб бераҳм.
Чеккан заҳмати беҳуда, аммо унга барибир.
17 Чунки Худо унга ақл бермаган,
Уни идрокдан қисиб қўйган.
18 Аммо туяқуш қанотларини ёйиб югурганда ,
Оту чавандозни чангида қолдириб кетади.
19 Отга кучни сен берганмисан?
Унинг бўйнини сен ёл билан қоплаганмисан?
20 Сен отларни чигирткадай сакратасанми?!
Отлар баланд овоз билан кишнаб,
Одамларни қўрқувга солади.
21 Шиддат билан ерни тепади,
Қаттиқ куч билан югуриб, жангга отилади.
22 Қўрқувни билмайди, ваҳимага тушмайди,
Қиличдан ҳам қочмайди.
23 Уларнинг устида ўқдон тарақлайди,
Атрофида қиличу найзалар ялтирайди.
24 Бурғулар чалинганда отлар бир жойда туролмайди,
Улар чопқиллаб, ерни чангитади.
25 Ҳар бурғу чалинганда кишнайди,
Узоқданоқ жанг ҳидини сезади.
Сардорларнинг жангга даъватларию ҳайқириқларини эшитади.
26 Қарчиғайлар қанотларини ёйиб, жанубга учади.
Уларга учишни сен ўргатдингми?
27 Сен буюрганинг учун бургут парвоз қиладими?
Сенинг сўзинг билан баланд жойларда ин қурадими?
28 У қояларда яшайди,
Қиррали қоялар унинг қалъаси.
29 Ўша ердан туриб, бургут ўлжасини топади,
Узоқдан туриб кўзлари кўради.
30 Унинг болалари қонга тўяди,
Жасадлар қаерда бўлса, улар ҳам ўша ерда.”
31 Кейин Эгамиз Аюбга шундай деди:
32 “Қодир Худо билан баҳслашаётган одам энди Уни тўғрилайдими?!
Қани, Худони айблаган гапирсин энди!”
Аюб Эгамизга жавоб беради
33 Шунда Аюб Эгамизга жавоб берди:
34 “Мен сенга жавоб беришга лойиқ эмасман,
Дамим ичимда, оғиз очмайман.
35 Бир–икки гапириб жавоб топмадим,
Энди бошқа гапирмайман.”
39–BOB
1 Togʻ echkilari qachon tugʻishini bilasanmi?
Kiyiklar bolalaganini koʻrganmisan?
2 Ular bolasini necha oy qornida koʻtarib yurishini bilasanmi?
Ular bolalaydigan vaqtni–chi?
3 Ular choʻkkalab tugʻadi,
Bolalarini dunyoga keltiradi.
4 Ularning bolalari ochiq joylarda oʻsib, kuchga toʻladi,
Ota–onasini tashlab ketadi, boshqa qaytib kelmaydi.
5 Qulonga kim ozodlik bergan?
Kim uning arqonini yechib tashlagan?
6 Men dashtlarni unga makon qilib berdim,
Shoʻr yerlar qulonning maskani boʻldi.
7 Shahardagi shovqin–surondan u kuladi,
Hech kim uning ustiga minib, unga baqirolmaydi.
8 Qirlar qulonning yaylovidir,
Oʻsha yerlarda u koʻkatlarni qidirib yuradi.
9 Yovvoyi buqa senga xizmat qilishga rozi boʻladimi?
Tunni sening ogʻilingda oʻtkazadimi?
10 Arqon bilan uni omochga bogʻlay olasanmi?
U yerlaringni agʻdarib beradimi?
11 Kuchi koʻp, deb unga ishona olasanmi?
Hamma ogʻir ishlaringni unga topshirasanmi?
12 U hosilingni yigʻib,
Xirmonga olib kelishiga ishonasanmi?
13 Tuyaqush qanotlarini sevinch bilan qoqaveradi,
Ammo uning qanotu patlari laylaknikiga teng kelolmaydi .
14 Tuyaqush tuxumlarini yerga qoʻyadi,
Ularni qumda isitadi.
15 Birov oyoqlari bilan tuxumlarini bosib ketishidan,
Yovvoyi hayvon ularni ezib tashlashidan xavotirlanmaydi.
16 Oʻz bolalariga begonalarga oʻxshab berahm.
Chekkan zahmati behuda, ammo unga baribir.
17 Chunki Xudo unga aql bermagan,
Uni idrokdan qisib qoʻygan.
18 Ammo tuyaqush qanotlarini yoyib yugurganda ,
Otu chavandozni changida qoldirib ketadi.
19 Otga kuchni sen berganmisan?
Uning boʻynini sen yol bilan qoplaganmisan?
20 Sen otlarni chigirtkaday sakratasanmi?!
Otlar baland ovoz bilan kishnab,
Odamlarni qoʻrquvga soladi.
21 Shiddat bilan yerni tepadi,
Qattiq kuch bilan yugurib, jangga otiladi.
22 Qoʻrquvni bilmaydi, vahimaga tushmaydi,
Qilichdan ham qochmaydi.
23 Ularning ustida oʻqdon taraqlaydi,
Atrofida qilichu nayzalar yaltiraydi.
24 Burgʻular chalinganda otlar bir joyda turolmaydi,
Ular chopqillab, yerni changitadi.
25 Har burgʻu chalinganda kishnaydi,
Uzoqdanoq jang hidini sezadi.
Sardorlarning jangga daʼvatlariyu hayqiriqlarini eshitadi.
26 Qarchigʻaylar qanotlarini yoyib, janubga uchadi.
Ularga uchishni sen oʻrgatdingmi?
27 Sen buyurganing uchun burgut parvoz qiladimi?
Sening soʻzing bilan baland joylarda in quradimi?
28 U qoyalarda yashaydi,
Qirrali qoyalar uning qalʼasi.
29 Oʻsha yerdan turib, burgut oʻljasini topadi,
Uzoqdan turib koʻzlari koʻradi.
30 Uning bolalari qonga toʻyadi,
Jasadlar qayerda boʻlsa, ular ham oʻsha yerda.”
31 Keyin Egamiz Ayubga shunday dedi:
32 “Qodir Xudo bilan bahslashayotgan odam endi Uni toʻgʻrilaydimi?!
Qani, Xudoni ayblagan gapirsin endi!”
Ayub Egamizga javob beradi
33 Shunda Ayub Egamizga javob berdi:
34 “Men senga javob berishga loyiq emasman,
Damim ichimda, ogʻiz ochmayman.
35 Bir–ikki gapirib javob topmadim,
Endi boshqa gapirmayman.”
