38–БОБ
Еремиёни сардобага ташлашади
1 Маттон ўғли Шафатиё, Пашхур ўғли Гадалиё, Шаламиё ўғли Ёҳухал ва Малкиё ўғли Пешхур Еремиёнинг халққа айтган шу сўзларини эшитган эдилар: 2 “Эгамиз демоқда: «Шаҳарда қолганлар қиличдан, қаҳатчилик ва ўлатдан нобуд бўладилар. Бобилликларнинг олдига чиққанлар эса тирик қоладилар. Бу одамлар ҳеч бўлмаганда ўз жонларини сақлаб қоладилар. 3 Бобил шоҳининг лашкари албатта бу шаҳарни таслим қилиб, қўлга киритади.» Эгамизнинг каломи шудир.”
4 Аъёнлар шоҳга арз қилиб:
— Бу одамни йўқ қилиш керак! — дедилар, — чунки у ўзининг бемаъни гаплари билан шаҳарда қолган жангчилару одамларнинг руҳини туширмоқда. У халқимизнинг фойдасини эмас, зарарини кўзламоқда.
5 — Жуда соз, — деди шоҳ, — у билан хоҳлаганингизни қилинг. Мен сизларга монелик қила олмайман.
6 Аъёнлар Еремиёни ушлаб, арқонларга боғлаб сардобага туширдилар. Соқчилар ҳовлисидаги бу сувсиз сардоба шаҳзода Малкиёга тегишли бўлиб, сардобада балчиқдан бошқа ҳеч нарса йўқ эди. Еремиё балчиққа ботиб қолди.
7 Еремиё сардобага ташлангани ҳақида шоҳ саройининг амалдори Ҳабашистонлик Обидмалек хабардор бўлди. Шоҳ ўша пайтда Бенямин дарвозасидаги маҳкамада эди. 8 Обидмалек саройдан чиқди–да, шоҳнинг олдига бориб деди:
9 — Шоҳ ҳазратлари, Еремиё пайғамбарни сардобага ташлаган одамлар қабиҳлик қилишибди. Шаҳарда нон қолмаган бўлса, Еремиё у ерда очликдан ўлади–ку.
10 Шоҳ Ҳабашистонлик Обидмалекка шундай амр қилди:
— Бу ердан ўттизта одамни олгин–да, бориб Еремиёни сардобадан чиқариб ол. Тағин у ерда ўлиб қолмасин.
11 Обидмалек ёнига одамларни олиб, сарой хазинасининг остки қисмида жойлашган хонага кирди. У ердан эски–туски кийимлар ва латта–путта топиб, уларни арқонларга боғлаб, Еремиёга туширди. 12 Сўнг Еремиёга деди: “Арқон танангизни қийиб юбормаслиги учун латталарни арқон билан қўлтиғингиз орасига қўйинг.” Еремиё айтилгандай қилди. 13 Одамлар Еремиёни арқонлар ёрдамида сардобадан чиқариб олдилар. Еремиё соқчилар ҳовлисида қолди.
Зидқиё Еремиёга маслаҳат солади
14 Шоҳ Зидқиё Еремиё пайғамбарни чақиртирди, уни Эгамиз Маъбадининг учинчи киришида кутиб олди.
— Сендан бир нарсани сўрамоқчиман, — деди шоҳ. — Мендан ҳеч нарсани яшира кўрма.
15 — Сизга ҳақиқатни айтсам, мени ўлдиришингиз аниқ, — деди Еремиё. — Сизга маслаҳат берганим билан, барибир қулоқ солмайсиз.
16 Шоҳ Зидқиё Еремиёга махфий равишда онт ичиб деди:
— Бизга ҳаёт бахшида этган Эгамиз шоҳид, мен сени ўлдирмайман. Жонингга қасд қилаётган одамларнинг қўлига ҳам сени топширмайман.
17 Шундан кейин Еремиё Зидқиёга деди:
— Исроил халқининг Худоси, Парвардигори Олам — Эгамиз демоқда: “Агар сиз Бобил шоҳининг аъёнларига таслим бўлсангиз, ўз жонингизни сақлаб қоласиз, бу шаҳар ҳам оловга ем бўлмайди. Сиз ва бутун хонадонингиз тирик қоласизлар. 18 Борди–ю, Бобил шоҳининг аъёнларига таслим бўлмасангиз, Бобилликлар бу шаҳарни енгиб, унга ўт қўядилар, ўзингиз ҳам уларнинг қўлидан қочиб қутулолмайсиз.”
19 — Мен Бобилликлар томонга қочиб ўтган яҳудийлардан қўрқаман, — деди шоҳ. — Бобилликлар мени уларнинг қўлига топширишса, улар мени хўрлашади.
20 — Топширишмайди, — деди Еремиё. — Айтганларимни қилиб, Эгамизнинг сўзига итоат қилсангиз, ҳаммаси яхши бўлади, жонингизни сақлаб қоласиз. 21 Борди–ю, таслим бўлишдан бош тортсангиз, Эгамиз менга ваҳий орқали аён қилганлари бажо бўлади: 22 саройингизда қолган ҳамма аёллар Бобил шоҳининг аъёнлари олдига чиқарилади. Ўша аёллар сизга шундай дейишади:
“Ишонган дўстларингиз
Сизни алдаб, енгиб кетишди.
Оёғингиз лойга ботганда,
Ишонган дўстларингиз сизни ташлаб кетишди.”
23 Сизнинг хотину бола–чақаларингиз Бобилликларнинг олдига чиқарилади. Сиз ўзингиз ҳам Бобилликларнинг қўлидан қочиб қутула олмайсиз. Бобил шоҳи сизни қўлга тушириб, шаҳарни ёндириб юборади.
24 — Суҳбатимиз ҳақида ҳеч кимга оғиз очма, акс ҳолда, ўласан, — деди Зидқиё Еремиёга. 25 — Борди–ю, аъёнлар сен билан гаплашганимни билиб қолиб, сенга: “Шоҳ билан нималар ҳақида гаплашдинг? Биздан бирон нарсани яширмай айт, бўлмаса ўласан”, деб айтишса, 26 сен уларга: “Мени Йўнатаннинг уйига қайтариб юборманг, шоҳим, акс ҳолда, у ерда адойи тамом бўламан, деб илтижо қилдим”, дея жавоб бер.
27 Аъёнлар Еремиёнинг олдига келиб, уни сўроққа тутишди. Еремиё шоҳ буюрган гапларни айтиб, жавоб берди. Шундан кейин аъёнлар унга бошқа савол бермадилар, чунки шоҳ билан Еремиё орасида бўлган суҳбатни ҳеч ким эшитмаган эди. 28 Еремиё Қуддус қулаган кунга қадар соқчилар ҳовлисида қолди .
38–BOB
Yeremiyoni sardobaga tashlashadi
1 Matton oʻgʻli Shafatiyo, Pashxur oʻgʻli Gadaliyo, Shalamiyo oʻgʻli Yohuxal va Malkiyo oʻgʻli Peshxur Yeremiyoning xalqqa aytgan shu soʻzlarini eshitgan edilar: 2 “Egamiz demoqda: «Shaharda qolganlar qilichdan, qahatchilik va oʻlatdan nobud boʻladilar. Bobilliklarning oldiga chiqqanlar esa tirik qoladilar. Bu odamlar hech boʻlmaganda oʻz jonlarini saqlab qoladilar. 3 Bobil shohining lashkari albatta bu shaharni taslim qilib, qoʻlga kiritadi.» Egamizning kalomi shudir.”
4 Aʼyonlar shohga arz qilib:
— Bu odamni yoʻq qilish kerak! — dedilar, — chunki u oʻzining bemaʼni gaplari bilan shaharda qolgan jangchilaru odamlarning ruhini tushirmoqda. U xalqimizning foydasini emas, zararini koʻzlamoqda.
5 — Juda soz, — dedi shoh, — u bilan xohlaganingizni qiling. Men sizlarga monelik qila olmayman.
6 Aʼyonlar Yeremiyoni ushlab, arqonlarga bogʻlab sardobaga tushirdilar. Soqchilar hovlisidagi bu suvsiz sardoba shahzoda Malkiyoga tegishli boʻlib, sardobada balchiqdan boshqa hech narsa yoʻq edi. Yeremiyo balchiqqa botib qoldi.
7 Yeremiyo sardobaga tashlangani haqida shoh saroyining amaldori Habashistonlik Obidmalek xabardor boʻldi. Shoh oʻsha paytda Benyamin darvozasidagi mahkamada edi. 8 Obidmalek saroydan chiqdi–da, shohning oldiga borib dedi:
9 — Shoh hazratlari, Yeremiyo paygʻambarni sardobaga tashlagan odamlar qabihlik qilishibdi. Shaharda non qolmagan boʻlsa, Yeremiyo u yerda ochlikdan oʻladi–ku.
10 Shoh Habashistonlik Obidmalekka shunday amr qildi:
— Bu yerdan oʻttizta odamni olgin–da, borib Yeremiyoni sardobadan chiqarib ol. Tagʻin u yerda oʻlib qolmasin.
11 Obidmalek yoniga odamlarni olib, saroy xazinasining ostki qismida joylashgan xonaga kirdi. U yerdan eski–tuski kiyimlar va latta–putta topib, ularni arqonlarga bogʻlab, Yeremiyoga tushirdi. 12 Soʻng Yeremiyoga dedi: “Arqon tanangizni qiyib yubormasligi uchun lattalarni arqon bilan qoʻltigʻingiz orasiga qoʻying.” Yeremiyo aytilganday qildi. 13 Odamlar Yeremiyoni arqonlar yordamida sardobadan chiqarib oldilar. Yeremiyo soqchilar hovlisida qoldi.
Zidqiyo Yeremiyoga maslahat soladi
14 Shoh Zidqiyo Yeremiyo paygʻambarni chaqirtirdi, uni Egamiz Maʼbadining uchinchi kirishida kutib oldi.
— Sendan bir narsani soʻramoqchiman, — dedi shoh. — Mendan hech narsani yashira koʻrma.
15 — Sizga haqiqatni aytsam, meni oʻldirishingiz aniq, — dedi Yeremiyo. — Sizga maslahat berganim bilan, baribir quloq solmaysiz.
16 Shoh Zidqiyo Yeremiyoga maxfiy ravishda ont ichib dedi:
— Bizga hayot baxshida etgan Egamiz shohid, men seni oʻldirmayman. Joningga qasd qilayotgan odamlarning qoʻliga ham seni topshirmayman.
17 Shundan keyin Yeremiyo Zidqiyoga dedi:
— Isroil xalqining Xudosi, Parvardigori Olam — Egamiz demoqda: “Agar siz Bobil shohining aʼyonlariga taslim boʻlsangiz, oʻz joningizni saqlab qolasiz, bu shahar ham olovga yem boʻlmaydi. Siz va butun xonadoningiz tirik qolasizlar. 18 Bordi–yu, Bobil shohining aʼyonlariga taslim boʻlmasangiz, Bobilliklar bu shaharni yengib, unga oʻt qoʻyadilar, oʻzingiz ham ularning qoʻlidan qochib qutulolmaysiz.”
19 — Men Bobilliklar tomonga qochib oʻtgan yahudiylardan qoʻrqaman, — dedi shoh. — Bobilliklar meni ularning qoʻliga topshirishsa, ular meni xoʻrlashadi.
20 — Topshirishmaydi, — dedi Yeremiyo. — Aytganlarimni qilib, Egamizning soʻziga itoat qilsangiz, hammasi yaxshi boʻladi, joningizni saqlab qolasiz. 21 Bordi–yu, taslim boʻlishdan bosh tortsangiz, Egamiz menga vahiy orqali ayon qilganlari bajo boʻladi: 22 saroyingizda qolgan hamma ayollar Bobil shohining aʼyonlari oldiga chiqariladi. Oʻsha ayollar sizga shunday deyishadi:
“Ishongan doʻstlaringiz
Sizni aldab, yengib ketishdi.
Oyogʻingiz loyga botganda,
Ishongan doʻstlaringiz sizni tashlab ketishdi.”
23 Sizning xotinu bola–chaqalaringiz Bobilliklarning oldiga chiqariladi. Siz oʻzingiz ham Bobilliklarning qoʻlidan qochib qutula olmaysiz. Bobil shohi sizni qoʻlga tushirib, shaharni yondirib yuboradi.
24 — Suhbatimiz haqida hech kimga ogʻiz ochma, aks holda, oʻlasan, — dedi Zidqiyo Yeremiyoga. 25 — Bordi–yu, aʼyonlar sen bilan gaplashganimni bilib qolib, senga: “Shoh bilan nimalar haqida gaplashding? Bizdan biron narsani yashirmay ayt, boʻlmasa oʻlasan”, deb aytishsa, 26 sen ularga: “Meni Yoʻnatanning uyiga qaytarib yubormang, shohim, aks holda, u yerda adoyi tamom boʻlaman, deb iltijo qildim”, deya javob ber.
27 Aʼyonlar Yeremiyoning oldiga kelib, uni soʻroqqa tutishdi. Yeremiyo shoh buyurgan gaplarni aytib, javob berdi. Shundan keyin aʼyonlar unga boshqa savol bermadilar, chunki shoh bilan Yeremiyo orasida boʻlgan suhbatni hech kim eshitmagan edi. 28 Yeremiyo Quddus qulagan kunga qadar soqchilar hovlisida qoldi .
