46–БОБ
1 Эгам айтар: “Худо Бэл тиз чўкди, худо Наво букилди.
Уларнинг бутлари молу ҳайвонга юк бўлди.
Олдин кўтариб юрганларингиз
Энди толиққанга юк бўлди.
2 Улар эгилди, бирга тиз чўкди,
Улар энди юкни қутқара олмайди,
Ўзлари эса асир бўлиб кетади.
3 Эй Ёқуб насли! Менга қулоқ солинг!
Эй Исроил наслининг омон қолганлари!
Эй халқим! Туғилганингдан бери сени онадай кўтариб юрдим,
Ҳа, дунёга келмасингдан олдин Мен таянчинг бўлдим.
4 Кексайгунингча ҳам Мен Ўшаман,
Сочинг оқарганда ҳам сени кўтариб юраман.
Мен сени яратганман, Ўзим сени кўтараман.
Ўзим сени кўтариб, қутқараман.
5 Мени кимга ўхшатасан?!
Кимга тенглаштирасан?!
Мени кимга таққослайсан?!
Нима, Мен ўшалар билан тенг бўлиб қолдимми?!
6 Мана, одамлар ҳамёндан тилла чиқарадилар.
Кумушни тарозиларда тортадилар.
Уста ёллаб, худо ясаттирадилар.
Улар ўша худосига таъзим қиладилар.
Ҳа, унга сажда қиладилар.
7 Ўша худосини опичлаб олиб кетадилар,
Уни жойига ўрнатиб, турғизиб қўядилар.
У жойидан қимирламай тураверади.
Кимдир унга ёлворганда, жавоб бермайди,
Машаққатидан халос қила олмайди.
8 Буни ёдда тутинг, маҳкам бўлинг!
Эй исёнкорлар, буни эсга олиб туринг!
9 Азалдан бўлганларни ёдда тутинг!
Ахир, Мен Худоман, бошқаси йўқ!
Мен Худоман, Менга ўхшагани йўқ!
10 Охирида нима бўлишини бошидаёқ айтаман.
Содир бўлмаганларни олдиндан билдираман.
«Ниятларим бажо бўлади,
Барча истакларимни ижро этаман», деб айтмоқдаман.
11 Шарқдан йиртқич қушни чақиряпман.
Ҳа, хоҳишимни бажарадиганни
Узоқ юртдан чақиряпман .
Мен Ўз айтганимни бажо қиламан!
Ҳа, ўйлаганимни амалга ошираман!
12 Менга қулоқ солинг, эй ўжарлар!
Ғалаба узоқ, деб ўйлаганлар!
13 Мана, Мен ғалаба келтираман, у узоқда эмас.
Кечиктирмай нажот бераман.
Ҳа, Қуддусга нажот ато қиламан,
Исроилга Ўз улуғворлигимни бераман.”
46–BOB
1 Egam aytar: “Xudo Bel tiz choʻkdi, xudo Navo bukildi.
Ularning butlari molu hayvonga yuk boʻldi.
Oldin koʻtarib yurganlaringiz
Endi toliqqanga yuk boʻldi.
2 Ular egildi, birga tiz choʻkdi,
Ular endi yukni qutqara olmaydi,
Oʻzlari esa asir boʻlib ketadi.
3 Ey Yoqub nasli! Menga quloq soling!
Ey Isroil naslining omon qolganlari!
Ey xalqim! Tugʻilganingdan beri seni onaday koʻtarib yurdim,
Ha, dunyoga kelmasingdan oldin Men tayanching boʻldim.
4 Keksayguningcha ham Men Oʻshaman,
Soching oqarganda ham seni koʻtarib yuraman.
Men seni yaratganman, Oʻzim seni koʻtaraman.
Oʻzim seni koʻtarib, qutqaraman.
5 Meni kimga oʻxshatasan?!
Kimga tenglashtirasan?!
Meni kimga taqqoslaysan?!
Nima, Men oʻshalar bilan teng boʻlib qoldimmi?!
6 Mana, odamlar hamyondan tilla chiqaradilar.
Kumushni tarozilarda tortadilar.
Usta yollab, xudo yasattiradilar.
Ular oʻsha xudosiga taʼzim qiladilar.
Ha, unga sajda qiladilar.
7 Oʻsha xudosini opichlab olib ketadilar,
Uni joyiga oʻrnatib, turgʻizib qoʻyadilar.
U joyidan qimirlamay turaveradi.
Kimdir unga yolvorganda, javob bermaydi,
Mashaqqatidan xalos qila olmaydi.
8 Buni yodda tuting, mahkam boʻling!
Ey isyonkorlar, buni esga olib turing!
9 Azaldan boʻlganlarni yodda tuting!
Axir, Men Xudoman, boshqasi yoʻq!
Men Xudoman, Menga oʻxshagani yoʻq!
10 Oxirida nima boʻlishini boshidayoq aytaman.
Sodir boʻlmaganlarni oldindan bildiraman.
«Niyatlarim bajo boʻladi,
Barcha istaklarimni ijro etaman», deb aytmoqdaman.
11 Sharqdan yirtqich qushni chaqiryapman.
Ha, xohishimni bajaradiganni
Uzoq yurtdan chaqiryapman .
Men Oʻz aytganimni bajo qilaman!
Ha, oʻylaganimni amalga oshiraman!
12 Menga quloq soling, ey oʻjarlar!
Gʻalaba uzoq, deb oʻylaganlar!
13 Mana, Men gʻalaba keltiraman, u uzoqda emas.
Kechiktirmay najot beraman.
Ha, Quddusga najot ato qilaman,
Isroilga Oʻz ulugʻvorligimni beraman.”
